24/12/2022
د جنازې اعلان
کتاب، قلم، ښوونځی او ټولګی وروڼه،
ناتکمیل شوې سپينې کتابچې، د کتابونو ګردوهلې بکسې، د پرمختللي ژوند هیلې، نه ستړې کېدونکې هلې ځلې او هڅې؛ خویندې،
د لیک لوست زده کېدونکي توري، سپېره پېنسلونه او خړ پړ رنګه ګان؛ ماماګان،
په کانکور ازموینه کې د بریا لپاره تر نیمې شپې مطالعې، د درسونو شوګیرې او ورک شوي خوبونه، ورېرونه،
د ښوونځي او پوهنتون پر لاره له خدای سره د ذکر په ژبه راز او نیاز، په وچو شونډو د دوبي په اوږدو ورځو روژې، د شپې تهجدونه او د سهارني تلاوت آزانګې؛ عمه ګانې،
د ارزښتونو په تله تللی دروند حجاب او پړونی د پلار ورور.
د ځان او خدای پېژندنې درسونه، د کایناتو په رموزو پوهېدنه، د بریالي ګډ ژوند جوړونې خوبونه او د نېک سیرته صالح او مصلح اولاد روزنې آرمانونه؛ د پلار د کاکا زامن.
په دې توګه ټولو دوستانو ته خبر ورکول کېږي چې د افغانستان په نوم جبروهلې، زنګ وهلې، کرخته او بې حسه جغرافیې په لر او بر کې د رڼا او تمدن د ترویج په پار له کابو یوې پېړۍ ناکامو هڅو او د جهالت تبې نیولې ټولنې د دردونو له تحمل وروسته بالاخره نن د میلیونونو نجونو پر مخ د پوهنتونونو د دروازو په تړلو سره «په افغانستان کې د پوهنې ساه وخته» او د اجل داعي ته یې لبیک ووایه. په داسې حال کې چې د جهالت قهرېدلو تورو استازو یې د تکفین، تدفین او جنازې د مراسمو لپاره یوازې څو ساعته فرصت ورکړی، له ټولو خواخوږو هیله کېږي چې نن چهارشنبه د لیندۍ (قوس) ۳۰مه د ماسپښین یوه بجه د کابل پل خشتي جومات انګړ کې د «پوهنې» جنازه کې ګډون وکړي. که په ټول عمر مو د کورنۍ حتی یو تن هم (الف، با) زده کړې وي؛ کېدای شي له «مرحومې پوهنې» سره د رشتې او تړاو احساس ولرئ او همدا احساس مو پښې د هغې د جنازې پر لور راوکاږي.
د یادونې وړ ده چې د «اروښادې پوهنې» جنازه به د کابل ښار په شهدای صالحین هدیره کې خاورو ته سپارل کېږي.
دوستان دې خبر وي. 🥲
انا لله و انا الیه راجعون
لطفا دا اعلان تر نورو هم درسره ورسوئ، هسې نه د دې بدمرغې جغرافیې په کومه څنډه کې د پوهنې کوم بې خبره لېونی مینوال او لېوال انسان بې خبره پاتې شي.copy
