08/06/2026
Зүгээр л дурсамжаа цуврал байдлаар хуваалцмаар санагдлаа. Сэтгэгдэлээ хуваалцмаар санагдаад... яагаад болохгүй гэж... Тиймээ..?
Булга үслэг эдлэлийн бизнесээ эрхэлж эхлээд багагүй олон жилийг үджээ. Энэ хугацаанд өнгөрүүлсэн цаг мөчүүдээ дурсан санаад харилцагч та бүхэнтэйгээ хуваалцмаар санагдлаа.
2018 оны 11 сард манай том охин маань БНТурк улсад их сургуульд суралцахаар болон бид гэр бүлээрээ хамт амьдрахаар очиж байлаа. Өмнө нь олон удаа Туркт очиж бизнесийн талаар багагүй судалж байсан болохоор очингуутаа л хамтарч ажиллах уулзалтуудаа хийн даруй ажилдаа орж байлаа.
Туркийн дэлхийн брэнд болох гоо сайхны L’ACTONE болон O’Juvi үнэртэй усны брэндийн албан ёсны эрхүүдийг аван эрч хүчтэйгээр ажиллаж эхэллээ. L’ACTONE брэнд нь бүтээгдэхүүнээ зөвхөн Америк руу экспортолдог том брэнд байлаа. Харин үнэртэй усны O’Juvi брэнд нь Европ төдийгүй дэлхий 41 оронд бүтээгдэхүүнээ экспортолдог брэнд. Монголд салбар нээх, холбогдох зөвшөөрлүүд, зар сурталчилгаа, карго тээвэрлэлтийн зохицуулалт гээд ажил ч ундарч эхэлж билээ.
Үүний хажуугаар үслэг эдлэлийн хамтарч ажиллах GILBERTI, GOLDEN FOX, GIORGIO ROTTI, BEST, LEVINSTON, GATA, FRANKO ARMONDI, ARDEM зэрэг брэндүүдтэй бизнес уулзалтууд гээд Истанбул хот дахь завгүй өдрүүд маань ундарч эхэлж билээ.
2019 оны эхний хагас жилд L’ACTONE болон O’Juvi брэндийн маань Монгол дахь бэлтгэл ажил дуусаж, эхний борлуулалт хийгдээд урам зоригтой байлаа. Бэлтгэл ажлын үед шинжилгээний болон бусад зорилгоор дээж явуулахад хамгийн их бэрхшээлтэй болон хөгжилтэй мөчүүдийг их туулдаг байжээ. Ялангуяа Монгол талын хил гааль дээр мөн ч их нээрэв бардаг байж билээ. Үнэндээ одоо ч тэр бэрхшээлүүд байсаар байдаг нь харамсалтай.
Бүх бэлтгэл дуусаад, зар сурталчилгааны зураг авалтууд дуусаад тэр байтугай эхний борлуулалт, захиалгууд авагдаад маш урам зоригтойгоор эхлэж байтал гайтай Ковид19 гэгч тахал бүх зүйлийг орвонгоор нь эргүүлсэн дээ. Яг энэ үед юу болоод байнаа, үгүй байлгүй дээ гээд итгэж чадахгүй байсан. Хил гааль, карго тээвэрлэлт гээд бүх зүйл хэдхэн хоногийн дотор бүгд боломжгүй болсон. Брэндийн үйлдвэрүүд маань хүртэл нэг л өдөр тэр чигээрээ зөвхөн Ковид19-ын эсрэг бүтээгдэхүүний үйлдвэрлэгч болоод ачаалаллаа дийлэхээ больсон.
Боддоо... нөр их хөдөлмөр, цаг хугацаа, санхүү, тэр их бэлтгэл ажил бүгд алга эргүүлэх мэт алга болсон доо.
Харин энэ үед манай үслэг эдлэлийн салбар огт зогсоогүй үйл ажиллагаа нь явагдаж байсан нь санаандгүй байж байгаад уналтанд орсон надад маш том боломж өгсөн дөө. Тэр бүү хэл дэлхий даяар бүх үйл ажиллагаа зогссон тухайн үед үслэг эдлэлийн брэндийнхэн маань онлайн худалдаа эрхлэх бүхий л боломжийг бүрдүүлэн хамтарч эхэлсэнд маш их баярладаг.
Тэр дундаа GILBERTI брэндийн хамт олон маань бүхий л зүйлээр хамтран ажиллахаар болон урам зоригтой ажиллаж эхэлсэн. Ковидын хөл хориотой үед үйлдвэрлэгчийн тусгай эрхтэйгээр Истанбулын авто замаар машинтайгаа эсвэл метронд ганцаараа шахам явдаг байлаа.
Ингээд л 2019 оны эхнээс үслэг эдлэлийн бизнес рүүгээ эргэлт буцалтгүй сэтгэл шулуудсан даа.
Үргэлжлэл бий...
