10/07/2024
من قلبي
هذا منشور خاص للماكثات و العاملات في المنزل
مهنة الخياطة فيها بزاف تعب و عين وكل وحدة خياطة تقدر تأكدلي هاذ الكلام ..
علاه؟ لأنها من أفضل الحِرف والمهن المناسبة للمرأة وخاصة لي تخدم فالدار العيون كلهم عليها و كأنها راهي دخّل ملاير 😊! و هي فالحقيقة نربحو التعب اكثر من الفائدة المالية 😔 لأنو كل وحدة قاعدة فدار و الاغلبية يحبو لوكان عندهم مدخول و كي يشوفو وحدة دارت طريق و لقات كيفاه دخل هذاك المصروف و من البيت فقط و يشوفو عندها زبائن و طلبيات قليل لي يبارك ولكن الأغلبية تحسد عن قصد او من غير قصد ....
الخياطة هي مهنة تستر و تحققلك نوع من الحرية المالية الحمد لله لكن ماتغنيكش ومشي رح تبني بيها القصور... خاصة التعامل مع الناس و اختلاف العقليات يخليك دائما في اضطراب و إرضاء الناس غاية لاتُدرك.
ومع ذلك تبقى أفضل من الجلوس من غير أي عمل... و انا نشجّع كل وحدة قاعدة فدار تلقى حاجة ديرها ودخل منها مصروف زيادة (حلوى خياطة بائعة ملابس اواني اكسسوارات.... الخ) أفضل من تبقى مع القيل و القال و المسلسلات و تشوف الآخرين واش حققو و تبكي ويديها مكتوفين لأنو الخياطة مراهيش علم كبيييير شوي ممارسة و تبدا باسم الله لا اتكلم على خياطة الملابس الجاهزة و الأعراس و الازياء الرسمية ..... هاذوك على الاقل لازملهم تكوين لكن كاين بزاف مشاريع بسيطة تقدر تبداهم أي مبتدئة
أن شاء الله توصل رسالتي لعلها تنفع !
