03/05/2021
Oduu Ammee:
Manni jireenyaa H/D ABO, Obbo Daawud Ibsaa waraana mootummaatiin cabsamuufi naannichatti dhukaasni qawwee dhaga'amuu maddi OMN hime...
Galgala kana waraanni mootummaa toora mana jireenyaa Obbo Daawid Ibsaa marsuun, naannoo sanarra sochiin kamuu akka hin taasifamneef jiraattota ittisuu isaanii namni OMN dubbise himee jira.
Qondaala adda biliisummaa Oromoo biyya keessaa kan ta'e namni OMNiif yaada kenne, sodaa addaa akka hin qabne dubbatee waan nutti dhufu hunda dandeenyee kaayyoo Biliisummaa Oromoof aarsaa kaffaluuf har'a miti dur of qopheessine jechuun sodaa akka hin qabbe dubbata.
Erga har'a guyyaatii Obbo Daawid Ibsaa akka quba hin qabne kan himu qondaalli kun, haalli amma toora mana isaanii jiru ulfaata ta'usaa odeeffannoo bilbilaan argateen quba akka qabu hima.
Waraanni bakka sana buufate hedduu ta'uufi meeshaalee gurguddaafi Konkolaataan waraanaatiin naannoon sun marfamuu hima. Yeroo ammaa kanatti manni jireenyaa Obbo Daawid waraana mootummaatiin cabsamee itti ol seenamee jiraachuu kan himu namni kun, isa dura dhukaasni dhaga'amaa akka tures dubbata.
Halkan kana waan dhalachuu malu hin beeknu kan jedhu namni kun, erga manni cabee hooda bilbilli nama mana sana keessa jiran hundaa cufaa ta'uusaa dubbatee uummatni haala naannoo sana dammaqinaan akka hordofu dhaamee jira qondaalli Adda Biliisummaa Oromoo kun.
Obbo Daawid Ibsaa fi namoonni mana isaanii keessa jiran gara alaatti akka gad hin baane erga taasifamanii ji'a tokko caaluuf akka adeemu gabaasuun keenya ni yaadatama.
Obbo Daawid Ibsaa dabalatee namoonni kan biroo mana sana keessa jiran bilbilli isaanii cufaa waan ta'eef, yaalii OMN isaan argachuuf taasise hin milkoofne.
