15/05/2025
Ameerikal geytimta Qafár egla Qafar rakaakayak Qaadaay, Qunxaaneyta kee Dagar Diig biirô luk cattiimak, 16 takke Qafár Google Transilatiinit culuseh tan Qunxaaneytah 350,000 birri takke lakqo acwah teceeh tanim qaddoosen.
Tama egla Aydukumusiyyí acwa Akah yeceeh Qafár Af Googlit culusak sugteh tan buttak foocat Gifta Qusman Macammad Kande
Tama butta Qafár af dadaluuy, Google Transilationitit edde yantifeqen afittek afak tiyakteena yakkuh Qafár afih maqnissoh caagiidal kaxxa macal abteh tan buttah aytukumusoonuh keenih abeenih yanin acwa kinnim qaddoosen.
Qafár afih maqnisso googlit culusseh tan butta dagoo udduurih addat kaxxaam meqeh tan taama abeenih yaniinim kee xaynal akkalem akak cube waak sugem Qafár af Dagoo udduurih addat Google Transilationit culak mangoh tan afittet kaa maqnisaanamih saami ginniimeh yanim kassinna!
Tama Acwa akah Abeenih yanin Qaunxaaneyti isinní fayxiik Cankâ caddol(numtin amol) Bool alfittel loowinta Qafár afih qangoor kee maxcâ maafo maqnisak Grammar caddo akah dacrisak Googlit culusak kaxxam assakat le taama abeenih yaniinim tamixxige.
Qafár Qunxaaneyti abeh yan kaxxaam meqe taamaak gexxaamah Baad caddol tan maqnissô xoqoysima qasri tarjamâ mansoofat antafaquk Qafár af bartaanam kee Qafár afat angaarawitte elle abaanam xiqaanah yanin aftí oytitteh rakiiboh fanteenal akah gaabowtaah koboxxannah abeenih yaniinim Kassinna
Tama Qunxaaneytah Acwâ taddiirah aracal Yaab abeh yan Qafár rakaakayak Qaadaay, Qunxaaneytaa kee Dagar diig biiroh saqalah yan Gifta Caamid Dulla
Ameerikak Qafár Egla Qunxaaneytah abteh tan Acwah kaxxa gadda gacseh yanim kee Oson abeenih yanin taama Qafár afih feerah dadalah kaxxa tuxxiiq leh tan taama kinnim ascassuk Oson fayyale caddol baaxo kacanuu kee tû ced le mara kinnoonu axcul taama taama kaxxam faatite.
Gifta Caamid Dulla Acwâ tabsih aracal qagisaak iyyeemih Ameerikal grytimta "Qafar egla kee ta aydaadule cugaysot (projektit) gaba assagalluk taamitte marak kulsa le gadda gacisna" iyye.
Tannah tan meqe taama abeh yan marak Qafár af bayti fanah gexaamak bohoy elle sugekkel Qafárah goorileeh kaa dadlissam xiqtah tan xaylo lem isin diggoosseeniih Qafár af kaadu too bohoyuk yewqeeh Too bohoyuk yawqem dubuk hinnay Qafár af Teknoloojii kee qasriinoh edde yabtifiqen af yekkeh maaciseeh toh abtem kaadu Qafár goorile Qafár xaylo kinnim qaddoose.
Gifta Caamid Dulla yaabak Ellecabol Tatruseh yan farmol iyyeemih Qafár af dadlisaanaah kaa yakhdineenim dubuh yeexegem cankâ maraa kee yeexegen buttah masuuliyyat akke waytam Qafár af dadlisaanam inkih tan qafár ummattay addaa kee irol tanih Sunkul radah yan masuuliyak kinnim yescesse.
Ameerikal geytimtah Tan Qafár eglah Awlaytuh yan Dr. Cummad Garad Tama Caagid Wagsiisak xaagih receenâ luk abeh yan angaarawal iyyeemih
"Ameerikal tan Qafár Egla tamannah tan taama akah abtem Afa yaanam inki ummattam dubuh angaaraw af hinnay, umnattak Qaadaay, mamaaxagaay kinnaanee kee aniinak rabiibo kinniimil aminuk abneh nan taama kinni "axcuk qaddoose.
Dr Cummad Garad Qagisaak iyyeemih "Qafár af baad caddol fanah kaa dadlisaanam cakkasitah Qafár af afrikah Cadaarataay Qaadaa kee aydaaduk baxsa le af akke waam" yescesse.
Ameerikal Tan Qafár Eglah awlayti
iyyeemih Qafár Rakaakayak Qaadaay, Qunxaaneyta Kee Dagar Diig biiroh saqal abeh yan sahhaloosiyyaa Kee Qokol Gadda Gacseeh yanim kee Tama biciseenih yanin taddiira meqe gurral orbisoonuh Sittâ Lih Taamitaanam Kaxxam Faxxiimak sugtem Kassiisem kee tama egla tama bisleh tan Qafar afih maslacatat assu waytah taama fooca fanah gexisoonuuy, Qafar af kee dariifâ qaada dadlisoonuh Qusab cugaysoosa gexsoonuh Qaadaay, Qunxaaneytaa kee Dagar diig biirô luk cattiimak taamiteloonum qaddoose.
Qafar Afih maqnisso abteeh Qafár google Transilashinit culuh macalteh tan buttak saqalah suge Gifta Qusmaan Macammad Kandi iyyeemih "Ameerikal geytimta Qafár egla tannah tan acwaa kee kunnabna neh abteemih kulsa le gadda teetih gacisna iyyem kee
Qafár af Qasri teknoloojih caddol culeh masuginnam takkay immay away Qafar af baad afitteh innah Teknoloojih af akkuk geytimah yanim kee Qafar irô baaxol tanih tan ummatta qafar tantifiquh Qafar af googlit culem kaxxa doori lem qaddoosem kee Qafar af googlit culem Qasri Teknoloojih caddol Fooca fanah afay qaadaa kee tû baritto dadlissah kaxxam meqe gita faktah tan taama kinnih tanim yescesse.
Ameerikal geytimtah tan Qafar egla annah taama takkuk nee aydukumusak xaqut nek solteemih kulsa le gadda gacsa iyye.
Qafar afih Maqnissot taamitteh tan buttah adaytah sugeh yan Macammad Ibraahimiy Isí baaxoh goorih abak sugeh yan giclot naddoowel racmatta gacseenim kee Tama toobokoytih aydaadi ummaan waarelem diggoosen.
Gifta Macammad Ibraahim isí baaxo naqboytak dacrisak takke gicloh xaquuk Qafár afaay kinnaanee kee Qaada daccarsimtuh angiicilluk sugem yan agiruk sugem kassiisen.
Tama Prograamih Ellecabol Qafar af dadaluh manol sugem macalak sugeh yan Ganna geyo Jamaal Qabdulkadir reedoh nassakaxxeeh kassinnam kee Dimis kee Reedo Qafar afih feera dadaltuh abeenih yanin giclo Qafar ummattah garil ken aydaadi ummaan waarele.
Away nableh nan Qafar afih dadal kee Qafar af Teknoloogih af yakkuh abak geytimaanah yanin taama Dr Jamaal kee Gifta dimis Daffeesseeh daabisseh cabteh tan ukummo xaak ugut abak yakkeh dadal kinni.
