11/05/2026
ប៉ុន្មានថ្ងៃនេះ ឃើញមានការជជែករឿងអ្នកឆក់ត្រី ដោយមានការសម្តែងក្តីអាណិតអាសូរអ្នកប្រើឧបករណ៍ឆក់ដែលមានជីវភាពខ្វះខាត។ ព័ត៌មានចុងក្រោយដូចជាតុលាការបានអនុញ្ញាតឱ្យនៅក្រៅឃុំហើយ ដោយធ្វើកិច្ចសន្យាឈប់ឆក់។
ច្បាប់ជលផលបានកំណត់ដាក់ទោសធ្ងន់ណាស់ចំពោះការប្រើឧបករណ៍ឆក់នេះ ព្រោះវាបង្កផលប៉ះពាល់ធ្ងន់ដល់ជីវៈចម្រុះក្នុងទឹក មិនត្រឹមតែត្រីដែលជាគោលដៅឆក់នោះទេ។
ជាអ្នកស្រុកទន្លេ ហើយកាលពីក្មេងធ្លាប់ទាំងប្រើឧបករណ៍នេះទៀត ពេលច្បាប់យើងមិនទាន់តឹងរឹង និងខ្វះការយល់ដឹងពីវិនាសសកម្ម ខ្ញុំយល់ច្បាស់ពីផលប៉ះពាល់នៃឧបករណ៍ឆក់។ ខ្ញុំធ្លាប់ជួយសុំការយោគយល់ឱ្យអ្នកភូមិបានរួចខ្លួនមួយចំនួនដែរ ក្រោយសមត្ថកិច្ចចាប់ខ្លួនព្រោះប្រើឧបករណ៍ឆក់នេះ។ តែក្រោយមកខ្ញុំប្រកាសថា មិនជួយសុំការយោគយល់ពីអាជ្ញាធរទៀតទេ ដូច្នេះបងប្អូនត្រូវតែឈប់ ព្រោះវាប៉ះពាល់ធ្ងន់ណាស់ដល់ធនធានក្នុងទឹក។
សម្រាប់ខេត្តក្រចេះខ្ញុំ កាលពីប៉ុន្មានឆ្នាំមុន ស្ថានភាពសត្វផ្សោតរងគ្រោះធ្ងន់ណាស់ងាប់ច្រើន កើតតិច។ ហេតុផលចម្បងមួយក្នុងចំណោមហេតុផលដទៃទៀតនោះ គឺការនេសាទដោយប្រើឧបករណ៍ឆក់នេះ។ ក្រោយមានវិធានការក្តៅ ផ្សោតប្រែមកស្ថានភាពល្អវិញ ពោលកើតច្រើន ហើយមិនសូវមានស្លាប់ទេ។
យើងនាំគ្នានិយាយថា ជីវភាពខ្វះខាតទើបឆក់ ចុះបើគ្រប់គ្នាយកហេតុផលខ្វះខាតហើយចាប់យកការឆក់គ្រប់គ្នា តើស្ថានភាពត្រី និងជីវៈចម្រុះក្នុងទឹកនឹងត្រូវទៅជាយ៉ាងណា? ដូច្នេះយើងមិនអាចយកហេតុលផលខ្វះខាតហើយទៅប្រព្រឹត្តល្មើសនឹងច្បាប់នោះទេ។ ច្បាប់មានអានុភាពគ្របគ្រប់គ្នារស់ក្នុងសង្គម។
សូមរួមគ្នាការពារធនធានធម្មជាតិក្នុងទឹក កុំនេសាទដោយប្រើឧបករណ៍ខុសច្បាប់គ្រប់ប្រភេទ។
