27/10/2019
සිනහවේ ඇති බලය ගැන අද අපි කථා කරමු. ඔබ සිනහ වෙන්නට කැමති කෙනෙක් වෙන්න. හදවතින්, අවංකව සිනහවෙන කෙනෙක් වෙන්න. සිනහවේ ඇති බලය ගැන ඇසුවහොත්, ඒ අවවාදයේ වැදගත්කම තේරේවි.
සිනහවේ අගය සහ බලය
හොඳින් සිනහ වීම ඔබේ රුධිර පීඩනය අඩු කරනවා. සිනහ වෙන, සතුටින් සිටින අය වැඩි කාලයක් ජීවත් වෙනවා වගේම ජීවිතය සාර්ථක කරගන්නත් වැඩි සම්භාවිතාවයක් තියනවා. ඒ බව පර්යේෂණාත්මකව තහවුරු කර තිබෙනවා.
සිනහ වෙන අයට වැඩිපුර යහළුවන් සිටිනවා. ඔබේ විවාහ ජීවිතය සාර්ථක වෙන්නටත් සිනහව ගොඩක් උදව් වෙනවා.
සිතන්න ඔබ මානසික ආතතියෙන් හෝ දුකින් සිටින මොහොතක, කුමන හෝ කාරණයකට ඔබේ යහළුවෙක් විහිළුවක් කලා කියා. එවිට ඔබ දෙදෙනාම හොඳින් සිනහ වුණා කියා. ඊට පසු ඔබ ආතතිය හෝ දුක පහ වී ගිය අයුරු ඔබට මතකද?
අප සිනහ වන විට, අපගේ යටිසිතට මෙන්න මේ ආකාරයට දැනෙන්නට පටන් ගන්නවා.
"මම සිතුවේ මම දුකින්, ආතතියෙන් ඉන්නවා කියලා. එත් ඔබ සිනහ වෙනවා. ඒ කියන්නේ මම ඉන්නේ ආතතියෙන් නොවේ."
එවිට යටිසිත, ඔබට ඇති වී තිබෙන ආතතිය, දුක අමතක කර දමනවා.
හොඳින් මතක තියාගන්න, සාර්ථකත්වයට, ආතතිය හෝ දුක හෝ තරහව මගින් උදව්වක් ලැබෙන්නේ නැහැ. ඔබ සැහැල්ලුවෙන් හිඳින තරමටම ඔබට හරි තීරණ ගන්නට පහසුයි.
ඒ නිසා සිනහවෙන් ආශීර්වාදය ලබන්න. සතුටින් ඉන්න. සියල්ල අවසානයේ සතුටින් ඉන්න සිතන්න එපා.
ඔබ සාමාන්යයෙන් සිනහ වෙන්නට පුරුදු නැති කෙනෙක් නම්
සුදුසු අවස්ථාවලදී, ආයාසයෙන් සිනහ වෙන්න. ඔබට හමුවන හිත මිතුරන් සමඟ සිනහ වෙන්න. කෙනෙක් සමඟ කථා කරන විට සිනා මුසුව කථා කරන්න. ඔබ අවට සිටින අය වෙනදාට වඩා "හොඳ වී" ඇති බව ඔබට දැනෙන්නට පටන් ගනීවි.
සිනහව මගින් මළානික පුද්ගලයන් ඔබෙන් ඈත් කර තබනවා
සිනහව මගින් ඔබ වෙතට සජීවී පුද්ගලයන් ආකර්ෂණය කරනවා. එය ඔබට තවත් උපකාර වේවි. ඒ වගේම ඇල්මැරුණ, සෘණාත්මක පිරිස් ඔබෙන් ඉවත් වෙනවා. එය ඔබට තවත් උපකාර වේවි.
