05/01/2026
"හරි ෂෝක් නේද පුතේ ...?" කියලා ඔන්චිලි පැද්දුවා නේද? - අම්මයි තාත්තයි මැද්දේ හිටපු ඒ අහිංසක පුතාගේ අත පැනපු හැටි (Nursemaid's Elbow)
හවසට පාක් එකේ, පාරේ ඇවිදින්න යනකොට අපි නිතරම දකින සුන්දර දසුනක් තියෙනවා. අම්මා දරුවාගේ වම් අතින් අල්ලගන්නවා. තාත්තා දරුවාගේ දකුණු අතින් අල්ලගන්නවා. "වන්... ටූ... ත්රී... උඩ!" දෙන්නත් එක්කම දරුවාව මැද්දෙන් උඩට උස්සනවා. දරුවා කකුල් උඩ දාගෙන හරිම ආසාවෙන් ඔන්චිලි පදිනවා.
"බලන්න එයාගේ හිනාව... හරිම ආසයි නේද?" අම්මා අහනවා. ඔව්, ඒ හිනාව හරිම ලස්සනයි. හැබැයි ඊළඟ තත්පරයේ ඒ හිනාව, මුළු පාක් එකම දෙවනත් වෙන මර අඳෝනාවකට පෙරළෙනවා කියලා ඒ අම්මා දන්නේ නෑ.
එකපාරටම දරුවාගේ අතින් "ටක්" ගාලා සද්දයක් ඇහෙනවා. දරුවා හයියෙන් කෑ ගහලා අඬන්න ගන්නවා. අම්මා බය වෙලා දරුවාව බිමින් තියනවා. "ඇයි පුතේ...?" දරුවා අඬන එක නතර කරනවා. හැබැයි... එයා අර ඔන්චිලි පැදපු අත හොලවන්නේ නෑ. ඒක නිකන් පණ නැති රබර් කෑල්ලක් වගේ ඇඟට හේත්තු කරගෙන ඉන්නවා.
අම්මේ, තාත්තේ... ඔබ නොදැනුවත්ව කරන ඒ පුංචි සෙල්ලම නිසා දරුවාගේ වැලමිට පැන්නා (Pulled Elbow / Nursemaid's Elbow).
💁♀️ ඇයි පොඩි දරුවන්ගේ අත් මෙච්චර ශක්තියෙන් අඩු ?
අවුරුදු 5ට අඩු දරුවන්ගේ ඇටකටු සහ නහර වැඩිහිටියන්ගේ වගේ හයිය නෑ. ඒවා තාම හැදෙමින් පවතින්නේ. විශේෂයෙන්ම වැලමිට ළඟ තියෙන "අස්ථි බන්ධන" (Ligaments) හරියට බුරුල් රබර් පටියක් වගේ.
ඔබ දරුවාගේ අතින් අල්ලලා හයියෙන් අදිනකොට, නැත්නම් දරුවාව අතින් අල්ලලා උඩට උස්සනකොට, වැලමිටේ තියෙන අස්ථියක් (Radius bone) අර බුරුල් රබර් පටිය අස්සෙන් ලිස්සලා එළියට පනිනවා.
මේක වෙන්න පුළුවන් ප්රධාන අවස්ථා 3ක් තියෙනවා:
👉 මේ කතාවේ කීවා වගේ අම්මයි තාත්තයි මැද්දේ අත් දෙකෙන් එල්ලී යාම.
👉 සමහර ළමයි හරිම දඟයි.මුරණ්ඩියි. ඉතිං දරුවා බිම දාගෙන, කියන දේ අහන්නේ නැති වුණාම, අම්මලා තාත්තලා තරහෙන් දරුවාගේ අතින් ඇදගෙන යනකොට
👉 දරුවා ලිස්සලා වැටෙන්න යනකොටම, අපි දරුවාව බේරගන්න අතින් ඇදලා අල්ලනවා. (මේක අහම්බෙන් වෙන දෙයක්).
💁♀️ දරුවාගේ අත පැන්නා කියලා දැනගන්නේ කොහොමද?
මේකේ ලක්ෂණ අත කැඩුණාම එන ලක්ෂණ වලට වඩා වෙනස්.
👉 සාමාන්යයෙන් අත ඉදිමෙන්නේ නෑ.
👉 අත හොලවන්න හැදුවොත් දරුවා කෑ ගහලා අඬනවා.
👉 දරුවා අත දිග ඇරගෙන හෝ ඇඟට හේත්තු කරගෙන ඉන්නවා. වැලමිටෙන් නමන්න බෑ. අත උස්සන්න බෑ. ඒ අතින් මොනවත්අල්ලන්න බෑ.
💁♀️ දොස්තර මහත්තයාගේ මැජික් එක
ඔබ මේ විදිහට දරුවාව රෝහලට අරන් ගියාම, දොස්තර මහත්තයා කරන්නේ හරිම පුදුම දෙයක්. එතුමා X-Ray ගන්නේ නෑ. බෙහෙත් දෙන්නේ නෑ. එතුමා දරුවාගේ අත විශේෂ විදිහකට අල්ලලා, පොඩි කරකැවීමක් කරනවා. (Reduction Maneuver). "ටික්" ගාලා පොඩි සද්දයක් ඇහෙනවා.
විනාඩියක් යන්න කලින්, අර අත පණ නෑ වගේ හිටපු දරුවා, හිනාවෙලා ඒ අතින්ම සෙල්ලම් බඩුව අල්ලනවා. දෙමාපියන්ට මේක හිතාගන්නවත් බෑ. ඒත් මතක තියාගන්න...
⚠️⚠️ මේක දොස්තර මහත්තයාට විතරක් කරන්න පුළුවන් වැඩක්. ගෙදර අය අත අඹරන්න යන්න එපා. එතකොට අත කැඩෙන්න වුනත් පුළුවන්.
🙅 අදින් පස්සේ මේ දේ කරන්න එපා
දරුවාට වයස අවුරුදු 5-6ක් වෙනකල්, එයාගේ වැලමිට හරිම දුර්වලයි.
👉 දරුවාව වඩාගන්න ඕන නම්, බිම ඉඳන් උඩට ගන්න ඕන නම්, කවදාවත් මැණික් කටුවෙන් හෝ අතින් අදින්න එපා. කිහිලි යටින් (Underarms) අල්ලලා උස්සන්න.
👉 අත් දෙකෙන් අල්ලලා පද්දන සෙල්ලම අදම නවත්වන්න.
👉 දරුවා පාරේ යන්න බෑ කියලා හිතුවක්කාරකම් කරනකොට, අතින් ඇදගෙන යන්න එපා. වඩාගෙන යන්න.
ඒ පුංචි අත, ඔබේ මුළු ශරීරයේ බර දරන්න තරම් තාම හයිය නෑ. ආදරේට කරන සෙල්ලම, දරුවාගේ ඇස්වල කඳුළු පුරවන මතකයක් කරගන්න එපා.
මේ වගේ අත්දැකීම් ගොඩක් අපිට හම්බවෙලා තියෙනව.මේ වගේ අත්දැකීම් ඔයාටත් තියෙනවනම් ඔයාගේ අත්දැකීම් සහ අදහස් පහලින් comment කරගෙන යන්න. මේ පණිවිඩය හැකිතාක් Share කර තවත් කෙනෙක්ගේ ජීවිතයක් බේරාගන්න ඔයත් අපිට උදව් කරන්න 😊❤️
අපේ පිටුව තාමත් follow කරේ නැත්තන් follow කරන්න අමතක කරන්න එපා.. ❤️
ස්තූතියි
හෙදියකගේ දිනපොත
⚠️ අවසරයකින් තොරව උපුටා පළ කිරීම තහනම්.
(Share button එක භාවිතා කරන්න).
©️ [ හෙදියකගේ දින පොත ] - All Rights Reserved.
#හෙදියකගේදිනපොත
