14/08/2024
හුඟක් අම්මලට පුංචි දරුවොත් එක්ක ගෙදර දොරේ වැඩ කරද්දී හරි හරියට කේන්ති යනවා. තරහ අරගෙන කෑ ගහනවා. දරුවන්ට ගහනවා. ඊටපස්සෙ කුස්සියට වෙලා තමන්ම තනියම කියව කියව බනිනවා. මැසිවිලි නඟනවා. ඉතින් මේ කේන්තිය ඇත්තෙන්ම අම්මට හොඳත් නෑ, දරුවන්ට හොඳත් නෑ, මේක හින්දා මේ දෙගොල්ලන්ගම මානසික සෞඛ්යය පිරිහෙනවා. ඉතින් මෙන්න මේ වගේ උපක්රම ටිකක් ඒ වෙනුවෙන් උත්සාහ කරල බලන්න..
💞උපුටා ගැනීමකි 💞
✳️ ඔයාව කේන්තියට පත් කරන්නේ මොකක්ද කියල හරියටම දැනගන්න.
බොහෝවිට දරුවන්ට බැණ වැදීමෙන් හෝ ඒ කේන්තිය නිවුණට පස්සෙ ඔයාම ඒ ගැන පසුතැවෙනවා. ඉතින් දරුවන් එක්ක කේන්ති ගත්තු එක ගැන ඔයාට වරදකාරී හැඟීමක් ඇති වෙන මොහොතේදි කල්පනා කරන්න ඇත්තටම ඔයාව තරහ ගස්සපු හේතුව මොකක්ද කියල. අපිට දැනෙනවා අපේ ළමයි අපිව තරහා ගස්සනවා කියලා. නමුත් ඔයාගෙ කෝපයට පිළිතුර බොහෝ විට දරුවන් නෙවෙයි. ඒ වෙලාවෙ ඇත්තටම ඔයා හිටියෙ වෙනත් හේතුවක් නිසා හෝ වෙනත් පුද්ගලයෙක් එක්ක කේන්තියකින් වෙන්න පුළුවන්. ඔයාටත් නොදැනිම අහිංසක දරුවා ඔයාගෙ කේන්තිය සහ කලකිරීම පිට කිරීමේ මාධ්යය බවට පත්වෙලා වෙන්න පුළුවන්.
✳️ ඔක්කොම වැඩ ඔයා බදාගන්නෙ නැතුව ඔයාගෙ husband , දරුවො එක්ක වගකීම් බෙදාගන්න.
දරුවොත් එක්ක ගෙවන ජීවිතය පහසු හෝ සරල නෑ, ඉතින් හුඟක් මව්වරුන් අධික වෙහෙසටත් කේන්තියටත් පත් වෙන්නේ දවස පුරාම වෙහෙස වෙලා වැඩිපුර වැඩ කිරීම හින්දා. ඒ නිසා දවස සැලසුම් කරගෙන ඔයාගේ සහකරුගෙන් වගේම දරුවන්ගෙනුත් උදව් ලබාගන්න. එයාලට වගකීම් බෙදාදෙන්න. ඇඳුම් සෝදගන්න, සෝදපු ඇඳුම් නවල අල්මාරියෙන් තියන්න, කාමරය අතුගාන්න වගේ දරුවන්ගෙ වයසත් එක්ක කරන්න පුළුවන් එයාලට ගැලපෙන වැඩ එයාලට කරන්න දෙන්න. සියල්ලම තමන් මත පටවගෙන අධික ආතතියකින් වැඩ කරන්න එපා. එතකොට තමයි ගෙදර අයත් එක්කත් කේන්ති යන්නේ, පවුලක් සතුටින් ඉන්න නම් ඒ ගෙදර අම්මා සතුටින් සැහැල්ලුවෙන් ඉන්න එක අත්යවශ්ය කාරණාවක් !
✳️ ඔයාගෙ දවස කලින් සැලසුම් කරන්න.
මවක් විදියට ඔයාට කරන්න පුළුවන් වැදගත්ම පුරුද්දක් තමයි ඔයාගෙ දවස සැලසුම් කිරීම. ඒක ඔයාගෙ දවස ආතතියෙන් තොර සාමකාමී එකක් බවට පත් කරනවා. ඔයාට පුළුවන් මෙන්න මේ වගේ දේවල් සැලසුම් කරන්න වගේම weekly & daily to do list හදාගෙන ලස්සනට කලබලයක් නැතුව වැඩ ටික කරන්න.
Cleaning list
Shopping list/ grocery plans
Meal planner
Washing & drying..
ඒවගේම හෙට දවස ගැන අද රෑට පොඩි සැලසුමක් හිතල ලියල තියාගන්නත් පුළුවන්. හිතට ගතට අනවශ්ය පීඩනයක් නැති තරමට කේන්ති යන වාර ගණනත් අඩු වෙනවා.
✳️ ඔයා වෙනුවෙන් පුංචියට හරි me time එකක් අරගන්න.
හැම උදෑසනකම දවස ආරම්භ කරන්න කලින් හෝ දරුවන් නින්දට ගියාට පස්සෙ පැය භාගයක්, පැයක් විතර ඔයා ඔයත් එක්කම ගුණාත්මක කාලයක් ගත කරන්න. ඔයා කැමති දේවල් කරන්නට, ටිකක් නිවීසැනසිල්ලේ ඉන්නට, ටිකක් නිදහසේ ඉඳගෙන තේ එකක් බොනගමන් කැමති පොතක් කියවන්න, ඔයාගෙ විනෝදාංශ වලට වගේ ඔයාගෙ self care වෙනුවෙන් ඒ කාලය වෙන් කරගන්න. දවස නැවුම්ව උද්යෝගිමත්ව පටන් ගන්නත් සාමකාමීව අවසන් කරන්නත් මේක හුඟක් ප්රයෝජනවත් වෙනවා. දන්නවද නිතරම ආතතියෙන් දුකෙන් කේන්තියෙන් ඉන්න අම්මගෙ මූණ දකිනකොට දරුවන්ගෙ මානසික යහපැවැත්ම පහළ යනවා. නිතරම හිනාවෙලා සතුටින් ඉන්න අම්මෙක් ඉන්නකොට දරුවන්ගෙ මානසික සෞඛ්යය ඉහළ යනවා..
✳️ Journalling කරන පුරුද්ද ගොඩනගා ගන්න.
සමහර වෙලාවට අපේ සමහර හැඟීම් අපේ පවුලට, යාලුවන්ට කියන්න අමාරුයි. කිව්වත් ලොකු විස්වාසයක් නෑ, ඉතින් ඒකට හොඳම ක්රමයක් තමා journal එකක් ලිවීම. ඒක ඔයාගෙ හොඳම මිතුරා කරගෙන ඒකත් එක්ක සිතුවිලි හැඟීම් බෙදා ගන්න පුළුවන්. අනවශ්ය විනිශ්චය කිරීම් හෝ විශ්වාසය ගැන ගැටලු නැති නිසා ඒක හරිම වාසියි. ඉතින් හොඳ දේවල් වගේම ඔයාට හුඟක් තරහ යන කෙනෙක් නම්, අද ඔයාට මොකක් හරි හේතුවකට දරුවොත් එක්ක තරහ ගියා නම්, ඒකත් මතක් කරල ලියන්න. ඊටපස්සෙ අනේ ඒ වෙලාවෙ මට මෙහෙම කරන්න තිබ්බා කියල ඔයාට දැන් හිතෙන දේවල් ලියන්න. ඊලග වතාවෙ තරහ නොගෙන ඉන්න ඒව ඔයාට උදව් වෙයි. මේක හරිම ප්රයෝජනවත්. Journal එකක් ලිවීමෙන් ලොකු මානසික සැහැල්ලුවක්, සන්සුන් බවක් දැනෙනවා.
✳️ මේ මොහොතේ ජීවත් වෙන්න.
උදාවෙයිද කියල හරියටම කියන්නවත් බැරි අනාගතේ වෙනුවෙන් වගේම ගෙවිල ඉවර වුණු අතීතය ගැන අනවශ්ය විදියට තැවෙන්නෙ නැතුව මේ මොහොතේ ජීවත් වෙන්න. මේ මොහොත කියන්නෙ තෑග්ගක් ! සමහර වෙලාවට ඔයා දරුවට කෑම කවද්දි, ඉස්කෝලේ වැඩ කරවද්දි ඔයාගෙ සිහිය තියෙන්නෙ ටෙලිනාට්යක වෙන්න පුළුවන්. නැත්තන් කරන්න තියෙන තවත් වැඩක් ගැන, අල්ලපු ගෙදර ගැන වෙන්නත් පුළුවන්. එතකොට ඔයා ඇත්තටම ඒ මොහොතෙ දරුවත් එක්ක ඉඳල නෑ, ඒත් ඔයා දරුවත් එක්ක සම්පූර්ණයෙන්ම ඉන්නවා කියන්නෙ වර්තමානයේ මේ මොහොතේ ඉන්න එකට. ඔයාගෙ දරුවොත් එක්ක කරන හැම දෙයක්ම හැම මොහොතක්ම ආදරෙන් භුක්ති විඳින්න.
🦋
අපි අපේ දරුවන්ට දෙන්න පුළුවන් ලොකුම තෑග්ග තමයි දවසක මතක් කරල සතුටු වෙන්න පුළුවන් අන්දමේ ප්රීතිමත් ළමා කාලයක් හිමිකර දීම.. 🎁
.........................................................
උපුටා ගැනීමක් .....
