11/09/2025
ကလေးမျက်နှာ၊ကိုယ်လုံး ထိခိုက်မှု အနာတရဖြစ်တဲ့အခါ
••••••••••••••••••••••••••••••••••••••••••••••••
ဒီတစ်ခါမှာတော့ ကလေးရှိတဲ့မိဘများသိထားသင့်တဲ့အကြောင်းအရာလေးတစ်ခုကို ရေးသားပေးမှာဖြစ်ပါတယ်။ ကလေးငယ်လေးတွေဟာ အသက် ၂နှစ်ကျော်လာတဲ့အခါ အလွန်ဆော့ကစားလာကြပါတယ်။ အဲဒီအခါမှာ အန္တရာယ်ရှိမယ့်ကစားနည်းမျိုးတွေကို မိဘတွေကကာကွယ်တားဆီးပေးတတ်ကြပါတယ်။ ဒါပေမယ့်လည်း ကလေးသဘာဝ ကစားခုန်ပေါက်တာတွေကိုတားလို့မရတဲ့အခါ ထိခိုက်ရှနာဒဏ်ရာကတော့ တစ်ခုမဟုတ်တစ်ခုဖြစ်တတ်ကြတာပါပဲ။ ဒီတော့ မိဘတွေအနေနဲ့ ကလေးတွေ ထိခိုက်ပွန်းပဲ့ရှနာဖြစ်တဲ့အခါပြုလုပ်ပေးသင့်တဲ့ရှေးဦးသူနာပြုစုနည်းအကြောင်းကိုဝေမျှချင်တာပဲဖြစ်ပါတယ်။
🔹ကလေးများပွန်းပဲ့ရှနာဖြစ်ရင်ဆေးခန်းပြဖို့လိုအပ်သလား?
အသေးစားပွန်းပဲ့ဒဏ်ရာများကိုတော့ အိမ်မှာတင်ပဲ နည်းမှန်လမ်းမှန်နဲ့ပြုစုကုသပေးနိုင်ပါတယ်။ဒါပေမယ့် ဆေးရုံ/ဆေးခန်းပြပြီး ဆေးကုသမှုခံယူရမယ့်အခြေအနေတွေလည်းရှိနိုင်ပါတယ်။
ပွန်းပဲ့ခြင်း သို့မဟုတ် ပြတ်ရှဒဏ်ရာတစ်ခုခုဖြစ်ခဲ့ရင်
▪️အနာကြီးသလား
▪️ဘယ်နေရာမှာဖြစ်သလဲဆိုတာနဲ့
▪️အခြားသောအချက်များပေါ်မူတည်ပြီး ဆေးကုသမှု ခံယူကောင်းခံယူရနိုင်ပါတယ်။ တစ်သတ်မှတ်တည်းတော့မရှိပါဘူး။
🔹ဆေးရုံ/ဆေးခန်းမှာဆေးကုသမှုခံယူရမယ့်အခြေအနေတွေကတော့
▪️ဒဏ်ရာမှာ သွေးများ ပန်းထွက်နေခြင်း
▪️ဒဏ်ရာမှာ အရာဝတ္ထုတစ်ခုခုထိုးဖောက်ဝင်ရောက်ခြင်းမျိုးရှိနေခြင်း
▪️ဒဏ်ရာပေါ်မှ ဖိအားပေးထားတာတောင် သွေးတိတ်သွားခြင်းမရှိခြင်း
▪️ဒဏ်ရာတွင်းသို့ ဖုန်၊သဲ၊မှန်စ၊ကျောက်ခဲစများစွာဝင်နေခြင်း
▪️မျက်နှာနှင့်အရေးကြီးကိုယ်အင်္ဂါအစိတ်အပိုင်း(ဥပမာ မျက်စိ)တစ်ဝိုက်တွင် ဒဏ်ရာရရှိခြင်း
▪️လူ သို့မဟုတ် တိရစ္ဆာန်တစ်ကောင်ကောင် ကိုက်ခဲမှုခံရခြင်း စတဲ့အချက်များရှိနေခြင်း
▪️ကလေးငယ်မှာ မေးခိုင်ကာကွယ်ဆေးမထိုးထားခြင်း စသည်တို့ဖြစ်ပါတယ်။ အထက်ပါအချက်များရှိနေရင်တော့ ချက်ချင်းဆေးရုံ/ဆေးခန်းပြပြီး ဆေးကုသမှုခံယူရမှာပါ။
🔹ကလေးငယ်ထိခိုက်ရှနာဖြစ်တဲ့အခါ မိဘများအနေနဲ့ ပြုလုပ်ပေးရမယ့်အချက်များ
▪️ဒဏ်ရာမှ သွေးများပန်းထွက်နေလျှင် Towel တဘက်တစ်ခုကိုယူပြီး အနာပေါ်မှ ဖိထားပေးပါ။ Pressure ပေးပြီးသွေးထွက်နည်းအောင်ပြုလုပ်ပေးခြင်းဖြစ်ပါတယ်။ ဒဏ်ရာမှ သွေးတိတ်သွားလျှင် ရေဖြင့်ဆေးကြောပြီး ပတ်တီးစီးခြင်း သို့မဟုတ် ပလတ်စတာစည်းခြင်း ပြုလုပ်ရပါမယ်။ ပြီးလျှင်တော့ အနီးဆုံး ဆေးရုံ/ဆေးခန်းပို့ဆောင်ရမှာပါ။
▪️ဒဏ်ရာမှာ အရာဝတ္ထုတစ်ခုခုထိုးဖောက်ဝင်ရောက်ခြင်းမျိုးရှိနေလျှင် အတင်းဆွဲထုတ်ဖို့မကြိုးစားပါနဲ့။ ဒဏ်ရာပတ်ပတ်လည်ကို Towel တဘက်တစ်ခုကိုယူပြီး ဖိထားပေးပါ။ ပြီးလျှင်တော့ အနီးဆုံး ဆေးရုံ/ဆေးခန်းပို့ဆောင်ရမှာဖြစ်ပါတယ်။
🔹ကလေးငယ်ဖြစ်သော ပွန်းပဲ့ရှနာဒဏ်ရာဟာ အသေးစားဖြစ်ပြီးသွေးထွက်မှုမရှိလျှင် သို့်မဟုတ် သွေးစို့ရုံသာဖြစ်ပြီးသွေးထွက်မှုနည်းလျှင်တော့ အိမ်မှာတင် အောက်ပါအချက်များအတိုင်းလုပ်ဆောင်ပေးလို့ရပါတယ်။
▪️ဒဏ်ရာရသွားတဲ့ကလေးငယ်ကို စိတ်တည်ငြိမ်အောင်ချော့မော့ပေးပါ။
▪️အနာမှသွေးထွက်နေလျှင် သန့်ရှင်းသောအဝတ်စနဲ့ဖိထားပေးပါ။ ၁၅မိနစ်ကျော်တဲ့အထိသွေးဆက်ထွက်နေရင်တော့ ဆေးခန်းပြရမှာဖြစ်ပါတယ်။
▪️ဒဏ်ရာမှသွေးတိတ်သွားရင် ဖုန်နဲ့အညစ်အကြေးတွေပြောင်စင်အောင် စီးဆင်းနေတဲ့ရေ(ဥပမာ ရေဘုံဘိုင်)အောက်မှာ ရေဆေးပေးပါ။ အနာကိုပွတ်တိုက်ပြီးဆေးကြောခြင်းမပြုရပါ။
▪️Normal Saline သို့မဟုတ် Antiseptic Solution အပျော့စားကို အနာပေါ်မှဆေးကြောပေးပါ။ အနည်းငယ်စပ်နိုင်ပါတယ်။ ဒါပေမယ့် ပိုးမွှားများဝင်ရောက်ခြင်းကနေကာကွယ်နိုင်ပါတယ်။
▪️အနာပတ်ဝန်းကျင်ကို သန့်စင်သောပတ်တီးစ သို့မဟုတ် ရေနွေးစိမ်ထားသောတဘက်စအသေးနဲ့ သန့်ရှင်းပေးပါ။ ဂွမ်းခြောက်ကိုအသုံးပြုရင် ဂွမ်းအစအနအမှုန်များ အနာတွင်းသို့ဝင်နိုင်လို့ သတိပြုသုံးရပါမယ်။
▪️သန့်ရှင်းရေးပြုလုပ်ရာမှာ အနာဆီသို့ ဦးတည်ပြီးမလုပ်ရပါ။ အနာမှဝေးရာပတ်ဝန်းကျင်သို့ ဦးတည်ပြီးသန့်ရှင်းပေးရမှာဖြစ်ပါတယ်။
▪️ဒဏ်ရာပေါ်သို့ Petroleum Jelly အလွှာပါးပါးလိမ်းပေးနိုင်ပါတယ်။
▪️ပြီးလျှင် ပိုးသတ်ထားသော အနာကပ်ပလာစတာကပ်ထားနိုင်ပါတယ်။ အနာကြီးလျှင်တော့ သန့်စင်သောပတ်တီးစည်းထားရပါမယ်။
▪️အနာကို သန့်ရှင်းခြောက်သွေ့အောင်ထားရပါမယ်။
၂၄နာရီတစ်ခါ Dressing လဲပေးရပါမယ်။ (Dressing လဲခြင်းဆိုသည်မှာ အနာကို Saline သို့မဟုတ် ရေနွေးနဲ့ဆေးကြောခြင်း၊ ဆေးထည့်ခြင်း ၊ ပတ်တီးစည်းခြင်း သို့်မဟုတ် အနာကပ်Plasterကပ်ခြင်း တို့ဖြစ်ပါတယ်)
▪️၂-၃ရက်နောက်ပိုင်းမှာ အနာကိုအုပ်ထားဖို့မလိုတော့ပါ။ ဖွင့်ဟထားလို့ရပါပြီ။
▪️ဒဏ်ရာအနာဖေးတက်တဲ့အချိန်မှာ ကလေးက အနာကိုမခွာဖို့ဂရုပြုပေးပါ။ ပိုးဝင်နိုင်ပါတယ်။
🔺ဒါ့အပြင် အနာတစ်ခုဖြစ်တဲ့အခါ ပိုးဝင်ခြင်းရှိမရှိသတိပြုရပါမယ်။ အနာမှ နာကျင်ကိုက်ခဲခြင်း၊ ရောင်ရမ်းခြင်း၊ နီရဲခြင်း၊ ခရမ်းရောင်သန်းလာခြင်း၊ ပူခြင်း ၊ ပြည်တည်ခြင်းများရှိလာလျှင် ဆေးခန်းပြရမှာဖြစ်ပါတယ်။
ဒီအချက်လေးတွေကတော့ ကလေးများထိခိုက်ရှနာ့ဖစ်တဲ့အခါ မိဘများအနေနဲ့အိမ်မှာတင်ပြုလုပ်ပေးနိုင်တဲ့ ရှေးဦးသူနာပြုစုနည်းများဖြစ်ပါတယ်။
🔹ကလေးငယ်ရှိတဲ့အိမ်တိုင်းမှာ
▪️ပိုးသတ်ထားသောပတ်တီး (2လက်မ,4လက်မဆိုက်ဒ်တစ်လိပ်စီ)
▪️ဂွမ်းထုပ်
▪️အရက်ပြန် သို့မဟုတ် Antiseptic Solution အပျော့စား
▪️ အနာကပ် Plaster စတဲ့အရာတွေကိုဆောင်ထားသင့်ပါတယ်။
အခုဆိုရင်တော့ ကလေးလေးတွေထိခိုက်ဒဏ်ရာရတဲ့အခါ မိဘများအနေနဲ့အိမ်မှာတင်ပြုလုပ်ပေးနိုင်တဲ့ ရှေးဦးသူနာပြုစုနည်းလမ်းလေးတွေနဲ့ အိမ်မှာဆောင်ထားသင့်တဲ့ပစ္စည်းလေးတွေစာရင်းကို ရေးသားပေးခဲ့တာဖြစ်ပါတယ်။
အားလုံးကျန်းမာပျော်ရွှင်ကြပါစေရှင်။
မောင်(ဆေး-၁)မာမီ
✅စာများကို လွတ်လပ်စွာ share နိုင်ပါတယ်။ ခွင့်ပြုချက်တောင်းရန်မလိုပါ။
🔺တစ်ဆင့်ပြန်လည်ကူးယူခြင်း ခွင့်မပြုပါ။
