13/01/2023
နဘုလယ်ဒေသမှာ မနေ့က ပစ်သတ်ခံရသူဟာ ပျုစောထီးမဟုတ်ဘူးလို့ ဒေသခံတွေပြော
တနင်္သာရီတိုင်းမ်၊ ဇန်နဝါရီ ၁၂
ရေဖြူမြို့နယ်၊ နဘုလယ်ဒေသမှာ ပစ်သတ်ခံလိုက်ရတဲ့ အုပ်ချုပ်ရေးမှူးဟောင်း ဦးစိုးသိန်းဟာ ပျူစောထီးမဟုတ်ဘူးလို့ ဒေသခံတွေကဆိုပါတယ်။
မနေ့က ညနေ ၃ နာရီခွဲအချိန်မှာ လဲရှောင်ကျေးရွာက ဦးစိုးသိန်းဟာ ရွာထဲကဘိလိယက်ခုံတစ်ခုမှာပစ်သတ်ခံခဲ့ရတာဖြစ်ပြီး သူဟာ စစ်ကောင်စီကတာဝန်ပေးထားတဲ့ပျူစောထီးဖြစ်တဲ့အတွက် ရှင်းလင်းခဲ့တယ်လို့ T.PDF က ထုတ်ပြန်ခဲ့ပါတယ်။
နဘုလယ်ဒေသခံတွေကတော့ အဲဒီထုတ်ပြန်ချက်နဲ့ပတ်သက်ပြီး ဦးစိုးသိန်းဟာ ပျူစောထီးမဟုတ်ဘူးလို့ငြင်းဆိုကြပါတယ်။
" သူက ဒလန်တို့ ပျူစောထီးတို့မဟုတ်ပါဘူး။ ဒီဒေသမှာအကုန်သိနေကြတာပါပဲ။ အားလုံးနဲ့အဆင်ပြေပြီး လူတွေကိုကူညီတတ်တဲ့သူပါ။ ဘာမှဒုက္ခပေးတာလည်းမရှိပါဘူး" လို့ ဒေသခံတစ်ဦးကပြောပါတယ်။
နောက်ထပ် ပြည်သူ့ကာကွယ်ရေးတပ်တွေနဲ့နီးစပ်တဲ့ဒေသခံကလည်း " အခုလုပ်တဲ့အဖွဲ့ကရတဲ့သတင်းအပေါ် စိစစ်မှုမရှိတာလို့ပဲထင်တယ်။ သတင်းလာပေးတဲ့သူက ပုဂ္ဂိုလ်ရေးမကျေနပ်ချက်ကြောင့်လည်းဖြစ်နိုင်တယ်လေ" လို့ပြောပါတယ်။
ပစ်ခတ်ခဲ့တဲ့ T PDF အဖွဲ့ကို တနင်္သာရီတိုင်းမ်က ဆက်သွယ်မေးမြန်းချိန်မှာတော့ ဦးစိုးသိန်းဟာ ပျူစောထီးခေါင်းဆောင်ဖြစ်ပြီး စစ်ကောင်စီကိုသတင်းပေးတဲ့သူဖြစ်တာကို စုံစမ်းတွေ့ရှိထားတယ်လို့ တုံ့ပြန်ပြောဆိုပါတယ်။
"ကျွန်နော်တို့စုံစမ်းသိထားသလောက်တော့ဦးစိုးသိန်းကနိုင်ငံရေးအစဖြစ်တဲ့အချိန်ကတည်းကထာ၀ယ်မြို့ပေါ်မှာလည်းတော်တော်လေးဂြိုလ်မွှေဖူးတယ်သူကြောင့်လည်းပြေးနေရတဲ့သူတွေလည်းများပြီ။ စကစစစ်ကြောင်းတွေမှာလည်းသူကိုယ်တိုင်ပါ၀င်နေပြီး လမ်းပြပေးနေတာကိုနယ်မြေခံအချို့ကတိုင်ကြားထားပါတယ်" လို့ T.PDF Page က စာနဲ့ပြန်လည်ဖြေဆိုခဲ့ပါတယ်။
ရေဖြူမြို့နယ်မှာ အရင်နှစ်က လက်သည်မပေါ်တဲ့ အငြင်းပွားဖွယ်ရာ အသတ်ခံရမှုဖြစ်စဥ်တွေရှိခဲ့ပါတယ်။
The Tanintharyi Times
ဓာတ်ပုံ - ဦးစိုးသိန်း
------------
တနင်္သာရီတိုင်းမ်သတင်းဌာနရဲ့သတင်းတွေကို
Website --> https://www.tntynews.com/
Telegram --> https://t.me/tanintharyitimes
YouTube --> https://www.youtube.com/c/TheTanintharyiTimes
Twitter ----> https://twitter.com/tntynews
တို့မှာလည်းဝင်ရောက်ဖတ်ရှုနိုင်ပါတယ်။
