01/08/2023
တစိုက်မတ်မတ်မလုပ်သရွေ့ ဘာမှဖြစ်မြောက်မှာမဟုတ်ဘူး
◾
လူအများစု အောင်မြင်ချင်ကြတယ်။ ကြီးပွားချမ်းသာချင်ကြတယ်။ နေရာတစ်ခု ရောက်ချင်ကြတယ်။ အဲဒီအတွက် လုပ်ရမယ့်အရာတွေကို စလုပ်ဖြစ်တတ်ကြတယ်။ ဒါပေမဲ့ ပြဿနာက ဆုံးခန်းတိုင်အောင် တစိုက်မတ်မတ်လုပ်တဲ့သူ၊ Consistency ရှိတဲ့သူက ရှားတယ်။
ခင်ဗျား သင်တန်းတစ်ခုခုတက်ဖြစ်ရင် သတိထားကြည့်။ စတက်ခါစမှာ လူတွေအများကြီးရှိလိမ့်မယ်။ တဖြည်းဖြည်း လျော့လျော့သွားတာ တစ်လကျော်လောက်ဆို တစ်ဝက်တောင် ရှိချင်မှရှိတော့တာကို တွေ့လိမ့်မယ်။
တစိုက်မတ်မတ် လုပ်တိုင်း ပေါက်မြောက်မယ်လို့ ပြောလို့မရပေမဲ့ တစိုက်မတ်မတ်မလုပ်သရွေ့တော့ ဘာမှဖြစ်မြေက်မှာမဟုတ်တာသေချာတယ်။
ဘယ်အရာပဲဖြစ်ဖြစ် ဖြစ်ဖြစ်မြောက်မြောက်ဖြစ်ဖို့ဆိုရင် ကောက်ရိုးမီးလုပ်လို့မရဘူး။ ခင်ဗျား အတတ်ပညာတစ်ခုကို တစ်ဖက်ကမ်းခတ်တဲ့အထိ ကျွမ်းကျင်ချင်တယ်ဆိုပါတော့၊ နာရီပေါင်းများစွာ တစိုက်မတ်မတ်လေ့ကျင့်ဖို့လိုတယ်။ Malcolm Gladwell ပြောတဲ့ နာရီပေါင်း ၁၀၀၀၀ လောက်မလေ့ကျင့်ဖြစ်ရင်တောင် အချိန်အတိုင်းအတာတစ်ခုထိတော့ တစိုက်မတ်မတ်လုပ်သွားဖို့လိုတယ်။
ပရော်ဖက်ရှင်နယ်ပဲဖြစ်ဖြစ်၊ စွန့်ဦးတီထွင်ပဲဖြစ်ဖြစ် ကြီးကျယ်တဲ့အဆင့်ရောက်သူတိုင်းက စားလည်းဒီစိတ်၊ သွားလည်းဒီစိတ်နဲ့ ရူးရူးသွပ်သွပ်လုပ်ကြသူတွေဖြစ်တယ်။ ဟိုစပ်စပ်ဒီစပ်စပ်လောက် လျှောက်လုပ်နေသရွေ့ ဟိုစပ်စပ်ဒီစပ်စပ်အဆင့်ပဲဖြစ်မယ်။ ဘာမှဖြစ်မြောက်မှာမဟုတ်ဘူး။
“အောင်မြင်မှုဆိုတာ အမြဲတမ်းကြီးကြီးကျယ်ကျယ်ကြီးလုပ်လို့မဟုတ်ဘဲ တစိုက်မတ်မတ်လုပ်ခြင်းကနေ ဖြစ်လာတာဖြစ်တယ်။ တစိုက်မတ်မတ်ကြိုးစားခြင်းက အောင်မြင်မှုရရှိစေတာ။ ပြီးရင် ကြီးကျယ်ခမ်းနားမှုက ဆိုတာ လိုက်လာပါလိမ့်မယ်” လို့ Dwayne Johnson က ပြောတယ်။
တစိုက်မတ်မတ်လုပ်တယ်၊ မလုပ်ဘူးက ကိုယ့်ရဲ့ အလေ့အကျင့် (Habit) နဲ့ အများကြီးဆိုင်တယ်။ တစ်ခုခုဆို ဆုံးခန်းတိုင်တဲ့အထိလုပ်တတ်တဲ့သူဟာ ဘာလုပ်လုပ် ဆုံးခန်းတိုင်အောင်လုပ်တတ်သလို ကောက်ရိုးမီးလိုလူမျိုးကျတော့ ခဏထတောက်ပြီး ငြိမ်းသွားတတ်ကြတယ်။
ဆရာ Hein Zaw
ီ_ဘာ_ဘာ
