21/12/2025
ဘေဘီလေးတိုင်း ဆောင်းရာသီမှာ ကျန်းမာစေဖို့ 😍
📌ဆောင်းရာသီနှင့်ကလေးကျန်းမာရေး
••••••••••••••••••••••••••••••••••••••••••
ဆောင်းတွင်းကာလရောက်လာတဲ့အခါ ရာသီအကူးအပြောင်းမှာ ကလေးတွေဖျားနာတတ်ပါတယ်။ အများစုကတော့ နှာစေးခြင်း၊ နှာပိတ်ခြင်း၊ ချောင်းဆိုးရင်ကြပ်ခြင်းနဲ့ အအေးမိခြင်းတို့ဖြစ်တတ်ပါတယ်။
💠အထူးသဖြင့် ၃လအောက်ကလေးတွေဆိုရင် ပိုပြီးဂရုစိုက်သင့်ပါတယ်။ ဒါ့အပြင် ဂရုစိုက်သင့်တဲ့အရွယ်ကတော့ ကျောင်းနေအရွယ်ကလေးတွေပါ။ ကျောင်းသွားနေတဲ့အခါ တူတူကျောင်းတက်နေတဲ့ကလေးတွေထဲကတစ်ဦးမှာ တုပ်ကွေးမိနေတာဆိုရင် ကလေးချင်းထိတွေ့ကူးစက်ပြီး ဖျားနာတတ်ပါတယ်။
တုပ်ကွေးလို့အများသိကြတဲ့ Influenza ဟာ ဗိုင်းရပ်စ်ပိုးကြောင့်ကူးစက်တဲ့ရောဂါဖြစ်ပါတယ်။ တုပ်ကွေးရောဂါဟာ အသက်ရှူလမ်းကြောင်းကိုဆိုးကျိုးသက်ရောက်မှုပေးပါတယ်။ တုပ်ကွေးရဲ့ရောဂါလက္ခဏာတွေကတော့ အစပိုင်းမှာ ရိုးရိုးအအေးမိဖျားနာတာနဲ့တူပါတယ်။ နှာရည်ယိုခြင်း၊ နှာပိတ်ခြင်း၊ လည်ချောင်းနာခြင်းတို့ဖြစ်တတ်ပါတယ်။ ရိုးရိုးအအေးမိဖျားနာတာထက် တုပ်ကွေးကရောဂါလက္ခဏာပိုပြင်းထန်ပါတယ်။
💠ကလေးလေးတွေ အအေးမိတုပ်ကွေးရောဂါမဖြစ်အောင် ကာကွယ်တဲ့အနေနဲ့
▪️လူကြီးသူမများက လက်ကိုစင်ကြယ်အောင်ဆေးကြောရပါမယ်။ ကလေးလေးတွေကိုလည်း လက်ဆေးတဲ့အကျင့်ပြုလုပ်ပေးပါ။
▪️လူဦးရေအလွန်ထူထပ်နေတဲ့နေရာတွေကို တတ်နိုင်သမျှရှောင်ပါ။ ကလေးတွေကိုခေါ်မသွားပါနဲ့။
▪️ချောင်းဆိုး၊နှာချေရင် လက်ကိုင်ပုဝါနဲ့အုပ်ပါ။
▪️ကလေးကို ကိုယ်ခံစွမ်းအားမြင့်မားအောင် အစားများများကျွေးပါ။ မိခင်နို့တိုက်ပါ။ Vit C ကြွယ်ဝတဲ့ အသီးအနှံတွေကိုကျွေးပေးပါ။
💠ကလေးလေးတွေ အအေးမိတုပ်ကွေးဖြစ်ရင် ဘယ်လိုကုသကြမလဲ?
▪️ကလေးဖျားတဲ့အခါ မိခင်နို့များများတိုက်ပါ။ ၆လအထက်ကလေးဆိုရင် အရညိများများတိုက်ပါ။ ဟင်းချို၊စွပ်ပြုတ်မှသည် ရိုးရိုးရေအထိတိုက်ကျွေးပါ။ ရေဓာတ်ပြည့်ဝဖို့အဓိကလိုအပ်ပါတယ်။
▪️ကလေးကို အဖျားတက်တယ်ဆိုပြီး အစာမကျွေးဘဲမထားပါနဲ့။ သူတို့စားချင်စိတ်ရှိရင် ကျွေးပါ။ အစာပျော့ပျော့ကျွေးနိုင်ရင်ပိုကောင်းပါတယ်။ တစ်ကြိမ်တည်းနဲ့ အများကြီးကျွေးစရာမလိုပါဘူး။ နည်းနည်းနဲ့ ခဏခဏကျွေးပေးပါ။
▪️ညဘက်မှာလည်း ၂နာရီခြား/၃နာရီခြား ကလေးရဲ့ကိုယ်ပူချိန်ကိုတိုင်းတာပါ။
▪️ကိုယ်ပူချိန်တက်ပါက အဖျားကျဆေးကို သတ်မှတ်အညွှန်းအတိုင်း ၆နာရီခြား သို့မဟုတ် ၈နာရီခြားတိုက်နိုင်ပါတယ်။
❗မိမိကလေးရဲ့အခြေအနေကိုစိုးရိမ်ပူပန်မှုရှိပါက ဆေးရုံ/ဆေးခန်း ချက်ချင်းပြပါ။ အကြံဉာဏ်တောင်းခံပါ။
❗ကလေးဖျားနေစဉ် လူအများရှိတဲ့အပြင်ကိုမခေါ်ပါနဲ့ (ဆေးခန်းပြတာမှလွဲ၍)
❗အဖျားကြီးတဲ့ကလေးကို ကိုယ်တုံးလုံးထားတာမျိုးမလုပ်ပါနဲ့။ ထို့အတူ လေသလပ်ပြီးပြန်ဖျားမယ်ဆိုတဲ့အတွေးမှားတွေးပြီး ထူထဲတဲ့အဝတ်တွေအများကြီးဝတ်ပေးထားတာမျိုးလည်းမလုပ်သင့်ပါဘူး။ ချွေးစုပ်တဲ့ ချည်ထည်မျိုးသာ ပေါ့ပေါ့ပါးပါးဝတ်ဆင်ပေးပါ။
❗ဖျားနေတဲ့ကလေးကို မက်ကလောင်မခြစ်ရပါ။ ရောဂါပိုးကူးစက်ခြင်း ပိုဆိုးဝါးပြီး sepsis ဟုခေါ်တဲ့သွေးဆိပ်တက်ခြင်းဖြစ်ကာ အသက်အန္တရာယ်ရှိနိုင်ပါတယ်။
❗၃လအောက်ကလေးငယ်ဖျားရင် မိမိသဘောနဲ့မိမိဆေးမတိုက်ရပါ။ဆရာဝန်ပြပါ။
💠ကလေးငယ်တွေဟာ များသောအားဖြင့် ရိုးရိုးအအေးမိဖျားနာရင် အိမ်မှာပဲစနစ်တကျပြုစုတဲ့အခါ ၃-၄ရက်နဲ့ ပြန်ကောင်းတတ်ကြပါတယ်။ ဒါပေမယ့်
လည်း ခြွင်းချက်တွေတော့ရှိပါတယ်။
▪️ကလေးငယ်ဟာ ၃လအောက်ကလေးငယ်ဖြစ်နေမယ်ဆိုရင်
▪️ကလေးငယ်ဟာ ၃လမှ၆လအရွယ်ဖြစ်နေပြီး အပူချိန်မှာ 39'C ကျော်နေမယ်ဆိုရင်
▪️အဖျားကြီးခြင်းနဲ့အတူ အနီစက်တွေ ခန္ဓာကိုယ်မှာထွက်လာတာကိုတွေ့ရမယ်ဆိုရင်
▪️၃ရက်ကျော်တဲ့အထိအဖျားဆက်ရှိနေမယ်ဆိုရင်
▪️အစာလုံးဝမစားရင်/နို့မစို့ရင်
▪️အဖျားကျဆေးတိုက်တာတောင် ကိုယ်ပူမကျလျှင်
▪️ရေဓာတ်ခမ်းခြောက်တဲ့လက္ခဏာတွေ( ဆီးနည်းခြင်း၊ ငိုရင်တောင် မျက်ရည်မထွက်ခြင်း၊ ငယ်ထိပ်ချိုင့်ခြင်း၊ မျက်တွင်းချိုင့်ခြင်း) တွေ့ရှိရရင်
ဆရာဝန်နဲ့ မဖြစ်မနေပြသသင့်ပါတယ်။
💠နောက်တစ်ခုကတော့ နှာစေးတဲ့ကိစ္စပါ။
နှာစေးရုံပဲဆိုရင်တော့ မေမေတို့အနေနဲ့ ကလေးလေးကို
▪️နို့မစို့ခင်မှာ Physiodose ( saline ) အစက်ချဆေးကို နှာခေါင်းပေါက်တစ်ဖက်စီကို တစ်စက်မှ နှစ်စက်စီချပေးပါ။
▪️နှာခေါင်းထဲက အချွဲတွေကို နှပ်သန့်စင်တဲ့ကိရိယာနဲ့ ဖယ်ရှားစုပ်ထုပ်ပေးပါ။ ဂွမ်းတုတ်တွေမသုံးရပါ။
ကလေးနှာခေါင်းအတွင်းပိုင်းအထိ အတင်းထိုးမထည့်ရပါ။
▪️အဲကွန်းခန်းနဲ့ပဲအမြဲထားရင် အခန်းထဲမှာ Humidifier ထားပါ။
▪️ပြီးတော့ ကလေးလေးတွေ (အထူးသဖြင့် လသားအရွယ်)တွေကို အမြဲနွေးထွေးအောင်ထားပါ။ ညအိပ်ရင် ခေါင်းစွပ်လေးဝတ်ပေးပါနော်။
▪️ပြီးတော့ ကလေးလေးကို အာဟာရပြည့်အောင် နို့များများတိုက်ပါ။ ခြောက်လအထက်ဆို အစားသေချာကျွေးပါ
▪️အရေးကြီးဆုံးအချက်ကတော့ ကလေးကိုတစိမ်းတွေ မချီစေ၊ မနမ်းစေပါနဲ့နော် အင်မတန်ဆိုးတဲ့ Covid 19 အပြင် RSV ဆိုတဲ့ဗိုင်းရပ်စ်ကူးနိုင်ပါတယ်။
အားလုံးကျန်းမာပျော်ရွှင်ကြပါစေ။
မောင်(ဆေး-၁)မာမီ
▪️မူရင်းပို့စ်ကို လွတ်လပ်စွာ share နိုင်ပါတယ်။
▪️တဆင့်ပြန်လည်ကူးယူခြင်း ခွင့်မပြုပါ။
