29/04/2026
"ခွဲစိတ်ခန်းဝင်ခဲ့ရတဲ့ မေမေများ သို့"
ဒီဧပြီလဟာ "C Section Awareness month"ဖြစ်ပါတယ်။C section ဆိုတာ မေမေ့ဗိုက်သားနဲ့သားအိမ်ကို ခွဲစိတ်ပြီး ရင်သွေးကို ထုတ်ပေးတဲ့ ကလေးမီးဖွားနည်းဖြစ်ပါတယ်။
ခွဲစိတ်မွေးဖွားခြင်း (C-section) ဆိုတာ အလွယ်လမ်းမဟုတ်သလို၊ မေမေတစ်ယောက်ရဲ့ မေတ္တာနဲ့ သတ္တိကို အတိုင်းထက်အလွန် ပြသခဲ့ရတဲ့ "ဂုဏ်ယူစရာ အမှတ်အသား" တစ်ခုပါ။ ဒီခရီးကို ဖြတ်သန်းနေရတဲ့ မေမေတို့အတွက် အားပေးစကားလေးတွေ ဝေမျှပေးချင်ပါတယ်။
(၁)။မေမေဟာ အနှိုင်းမဲ့ မေတ္တာရှင်ပါ။
ဗိုက်ကို ခုနစ်လွှာခွဲပြီး အသက်အန္တရာယ်ကြားကနေ ရင်သွေးကို လောကထဲ ခေါ်ဆောင်လာဖို့ ဆုံးဖြတ်ခဲ့တာဟာ ကြောက်ရွံ့မှုထက် ချစ်ခြင်းမေတ္တာက ပိုကြီးမားလို့ပါ။ ခွဲစိတ်ခန်းထဲက အေးစက်စက် အငွေ့အသက်တွေကြားက သတ္တိဟာ ကမ္ဘာပေါ်မှာ အလှဆုံးအရာတစ်ခုပဲ ဖြစ်ပါတယ်။
(၂)။မေမေ့ ဝမ်းဗိုက်ပေါ်က အမာရွတ်ဟာ ရှက်စရာမဟုတ်ပါဘူး။
ဒါဟာ ကိုယ့် ရင်သွေးလေး လုံခြုံစွာ ထွက်ပေါ်လာဖို့အတွက် ပေးဆပ်ခဲ့ရတဲ့ "အောင်ပွဲရ အမှတ်အသား" (Badge of Honor) ပါ။ ဒီအမာရွတ်ကို ကြည့်တိုင်း "ငါဟာ ငါ့ကလေးအတွက် ဘာမဆို လုပ်ပေးနိုင်တဲ့ အမေပဲ" လို့ ကိုယ့်ကိုယ်ကိုယ် ယုံကြည်မှုအပြည့်နဲ့ ဂုဏ်ယူလိုက်ပါ။
(၃)။အလွယ်လမ်း" လို့ ပြောတဲ့သူတွေကို ဂရုမစိုက်ပါနဲ့။
ခွဲစိတ်ပြီးပြီးချင်း နာကျင်နေတဲ့ ဒဏ်ရာနဲ့ ကလေးနို့တိုက်ရတာ၊ လမ်းစလျှောက်ရတာ၊ အနာမကျက်သေးခင်မှာပဲ ကလေးကို ချီပိုးပြုစုရတာတွေဟာ ဘယ်လိုမှ မလွယ်ကူပါဘူး။ တခြားသူတွေ ဘယ်လိုပဲမြင်မြင်၊ သင်ဟာ သဘာဝအတိုင်း မွေးဖွားသူတွေနည်းတူ (ဒါမှမဟုတ် ပိုပြီးတော့တောင်) ပင်ပန်းဆင်းရဲမှုကို ကျော်ဖြတ်ခဲ့ရတာပါ။
(၄)။ မေမေဟာ မျိုးစုံသော ခံစားချက်တွေကို ခံစားခွင့်ရှိပါတယ်။
ခွဲစိတ်မွေးဖွားပြီးနောက်မှာ ဝမ်းသာမှု၊ စိုးရိမ်မှု၊ နာကျင်မှု၊ အားနည်းမှု။ဒီလိုခံစားချက်တွေကို တပြိုင်နက်တည်း ခံစားနေရနိုင်ပါတယ်။အဲဒါတွေက “မေမေမကောင်းလို့” မဟုတ်ဘူး။ဒါဟာ မေမေတစ်ယောက်အဖြစ် ပြောင်းလဲလာတဲ့ ခရီးစဉ်တစ်ခုပါ။ခံစားချက်တိုင်းကို လက်ခံပြီး ကိုယ့်ကိုယ်ကိုယ် နူးညံ့စွာ ပြုမူပါ။
(၅)။ အကူအညီတောင်းဖို့ မရှက်ပါနဲ့။
ခန္ဓာကိုယ်က ပြန်လည်သက်သာဖို့ အချိန်လိုပါတယ်။အိမ်ထောင်ဖက်၊ မိသားစု၊ မိတ်ဆွေတွေကို အကူအညီတောင်းတာဟာ အားနည်းခြင်းမဟုတ်ပါဘူး။မေမေတစ်ယောက်တည်း မဟုတ်ပါဘူး။ဘေးမှာ ကူညီပေးမယ့်လူတွေရှိပါတယ်။
(၆)။ကိုယ့်ကိုယ်ကိုယ် အချိန်ပေးပါ။
မေမေတစ်ယောက်ဖြစ်ဖို့ သင်ယူနေရင်း တစ်ဖက်မှာလည်း ခန္ဓာကိုယ်ရဲ့ ကြီးမားတဲ့ ဒဏ်ရာကို ကုစားနေရတာပါ။ အရာအားလုံးကို ချက်ချင်းပြီးပြည့်စုံအောင် မလုပ်နိုင်ရင်လည်း စိတ်မပူပါနဲ့။ သင်ဟာ အကောင်းဆုံး ကြိုးစားနေတဲ့ မေမေတစ်ယောက်ပါ။
မေမေ!
သင့်ခန္ဓာကိုယ်က အားနည်းနေနိုင်ပေမဲ့ သင့်ရဲ့ စိတ်ဓာတ်ကတော့ တောင်တစ်လုံးထက် ပိုခိုင်မာပါတယ်။ သင်ဟာ အံ့မခန်း ခွန်အားရှင်တစ်ယောက်ပါပဲ။
"(C-section မေမေတွေ အနေနဲ့ ခွဲစိတ်ခန်းထဲမှာပဲဖြစ်ဖြစ်၊ ခွဲစိတ်ပြီးနောက်ပိုင်းမှာပဲဖြစ်ဖြစ် ဘယ်အချိန်မှာ "ငါ တကယ်တော်တယ်၊ ငါ့ကလေးအတွက် ငါဒါကို ကျော်ဖြတ်နိုင်ခဲ့ပြီ" လို့ ကိုယ့်ကိုယ်ကိုယ် ဂုဏ်အယူဆုံး ဖြစ်ခဲ့ရလဲ? တခြားမေမေတွေ ခွန်အားရအောင် ဝေမျှပေးပြီး ဒီစာလေးကို ဘဝတူ C sectionမေမေတွေ မြင်အောင် shareပေးသွားနော်)။
ညနေမိုး(ကလေး)
Section awareness
