24/01/2026
Abinda Ya Sa Na Shiga Karatun Lauya — Sarkin Kano Sanusi
Sarkin Kano Muhammadu Sanusi II, ya ce shiga karatun lauya da ya yi a Jami’ar Northwest da ke Kano cikar wani buri ne da ya daɗe yana rike da shi, inda ya bayyana cewa ilimin lauya ginshiƙi ne na adalci da zaman lafiyar al’umma.
Da yake magana bayan halartar darasi a ranar Alhamis, Sarkin ya ce sha’awarsa ga ilmin dokoki ta samo asali ne daga tunani da kishi na ilimi, ba tare da wata alaƙa da shari’o’in da ya taɓa fuskanta a baya ba. Ya ce wannan shi ne digirins kashi na uku, bayan ya karanci tattalin arziki a Jami’ar Ahmadu Bello, Zariya.
Ya bayyana cewa doka tana shafar rayuwar yau da kullum — daga harkokin iyali zuwa kwangila da tsaron al’umma — kuma ita ce ginshiƙin adalci a kowace ƙasa. Ya kuma ce ya zaɓi jami’ar mallakar jiharsa ne domin tallafa wa cibiyoyin ilimi na gida da malaman Najeriya.
Game da yadda yake haɗa karatu da sarauta, Sanusi ya ce yana zuwa darasi da safe, yayin da yake gudanar da ayyukan sarauta da rana, tare da shiga darussa ta yanar gizo idan bukata ta taso.
Sarkin ya yi kira ga matasa da manya da su rungumi karatu na tsawon rayuwa, tare da roƙon gwamnatoci da masu zaman kansu su ƙara zuba jari a fannin ilimi, yana mai jaddada cewa ilimin ɗan Adam shi ne babbar dukiyar ƙasa.
