06/07/2026
لقيتعها راقدة في وسط ولادها راقدة فوق الأرض فالبرد
تحضنتها بقوتي ونوضتها بقات بنتي حايرة وفرحانة قالتلي ماما جيتي عندي اني بردانة دفيني قلبي تقطع عليها هزيت ورحت للعجوزة سقسيتها وانا قتلقة ومخنوقة حبيت نضربها
قلتلها كيفاش جات بنتي عندك يا المصيبة ندمت اللي درت فيك الخير كون خليتك ساكنة اللي كنت فيه خير قالتلي
جات وحدها وأنا كي خفت عليها دخلتها للدار شفت فيها شوفة بكل حقد هزيت بنتي وجيت رايحة وهي قالتلي بنتك كانت تلعب طاح عليها الليل وما عرفتش ترجع دخلتها عندي كي تروحي اهدري مع بنتك قوليلها متزيد تروح عند الناس مرة أخرى، انا مدرتش ليها حساب خليتها تهدر قلت الحمدلله لقيت بنتي وتحل هذا المشكل... بعد يومين بنتي زيد راحت ما بان عليها ختي خبر، زيد رحت للعجوزة وأنا قالقة بزاف وحالفة في قلبي نديرلها حاجة كبيرة إذا كانت هي السبة بصح كي وصلت قالتلي بنتك ماشي هنا... بنتك تلقيها فالمقبرة لقديمة قلبي تقبض كي سمعت هذي الكلمة مبقاش فيا عقل رحت نجري للمقبرة وصلت للبلاصة اللي غطاها الماء واضطروا يحفرو على لقبور وينقلوا الرفات لقبرة اخرى وهادي حكاية طويلة صرات عندنا المهم كي وصلت لقيت بنتي راقدة في وسط الردم كامل راقدة بالنوم خلاتني نبقي حايرة كيفاه الطفلة تجي هنا وترقد كيما هكا عيطت عليها، فاقت وشافت فيا كانت راقدة فوق الطوب ما قدرتش نوصل عندها لحجر كان بزاف و لبلاصة فيها بزاف حفر
قلتها اروحي عندي شافت فيا وهزت حجرة ورماتها عليا
هبطت راسي باه ما تقصنيش زيد هزت حجرة آخرى ورماته عليا عيطت عليها باش تحبس بصح هي والو كملت وكانت تضرب فيا بالحجر، حتى جات وحدة في راسي حسيت بوجع كبير حتي طحت فالأرض والدم بدا يسيل من راسي
رجعت للدار وأنا نتوجع وحوايجي كامل بالدم حكيت مع الناس اللي نعرفهم قلتلهم يروحو يجيبولي بنتي، وأنا رحت لسبيطار باش يخيطولي الجرح وبقيت يومين نتوجع
بصح اللي كان أسوأ واش صرا لبنتي حالتها كانت تسوء نهار بعد نهار كانت تجيني وأنا راقدة في الليل وتقلي يا ماما كاين ناس بزاف في الدار هدرتها كانت تخلعني ونبدا نفتش في الدار كامل وما نلقى حتى واحد، و نسمعها عياط اخرجوا من هنا... ما نحبش نشوفكم هذي المواقف كامل دمرت أعصابي حتى قال واحد لراجلي بنتكم عندها مس مالجن بصح ماشي مس عادي هذا مرتبط بحاجة لازم ترجع لصحابها
ما فهمتش واش يقصد وبنتي كانت تزيد تسوء وفي الأخير قررت نرجع للعجوزة، هي لي كانت تعرف حاجة أنا ما نعرفهاش رحت عندها، ووعدتها نعطيها الدراهم إذا قالتلي الحقيقة بصح هي رفضت تهدر وقالتلي اللي صرا لبنتك صرا لولادي كامل حتى قلتلهم ماشي أنا السبب خلاوني وجاو ورا بنتك سقسيتها شكون هذم قالتلي موالي الدار ما فهمتش
ومن بعد قالتلي بنبرة بزاف تخاوف هذي الدار ماشي دارنا... هذي دارهم وما كانش لازم تبنوها بهاد الطريقة منين جبتي الطوب في ذاك الوقت، تفكرت كلش، أنا ما كنتش ندير الخير لوجه الله كنت نديرو باش راجلي يبقى عندو سمعة مليحة ويربح الانتخابات وكي خسر، زدت الخير باش الناس يحبوه ويرجع يربح عمري ما كنت نحب الناس، وما كنتش نحب ندخل لديار الفقراء حتى لي نهار جبت المقاول وبقيت نحكي معاه على السومة تاع الخدمة كنت حابة ندي من دراهم التبرعات، المقاول قالي نوفرو دراهم الطوب كامل ونجيبو طوب مالمقبرة لمهدومة راه مرمي وحتى إذا كان مكسر يصلح نبنو بيه ونوفرو الدراهم لينا وافقت بلا ما نخمم وجابو الطوب وبناو بيه دار العجوزة ضحكت العجوز وقالتلي
هادو سكان الدار القديمة ولا نقلك هذك موالي الطوب لقديم، رفضوا يجي الطوب لهنا وانت ديتيه بسيف عليهم وكانو راح يأذيو ولادي كون مهدرتش انا معاهم ودرك جايين يدو حقهم منك ننصحك كسري الدار ورجعي الطوب وهم يخلو بنتك وأنا ربي يتولاني برحمتو، رحت عيطت على المقاول كسرنا دار العجوزة، ورجعنا الطوب كامل للمقبرة، ورميناه مع باقي الطوب ورحت بمالي الخاص بنيتلها دار جديدة ومن بعد قعدت وحدي نبكي كيما طفلة صغيرة علاش درت الخير ونيتي كانت خايبة علاش عايشة على حساب الناس الفقراء كنت ناكل في دراهمهم ونمد ليها في حوايج ماشي من قيمتهم هما يستاهلو احسن، ربي يحب اللي ينفق من أحسن ما عندو علاش نيتي كانت للدنيا وندير الخير لأهداف تاع رخس علاش ما نديروش الخير لوجه الله وبرك
وقتها نربحو الدنيا والآخرة
بكيت بزاف، وما زلت حتى لليوم ندعي ربي يسامحني.
﴿لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ﴾
سورة آل عمران.
متنساوش ديرو كتابة للصفحة 🫶🏼😘
