08/06/2026
Nun día coma hoxe, o 8 de xuño de 1901, contraían matrimonio na cidade da Coruña Elisa Sánchez e Marcela Gracia, as primeiras mulleres en casar entre elas na Galiza e o Estado Español.
Tras varios anos de relación e convivencia en distintos lugares da provincia da Coruña, no ano 1901 esta parella de mestras decidiu contraer matrimonio. Para tal fin, Elisa adoptou unha apariencia masculina, facéndose pasar por Mario Sánchez. Inventouse tamén un pasado, contando que pasara a súa infancia en Londres e que seu pai era ateo, polo que non fora bautizado. O párroco Víctor Pérez, da igrexa de San Xurxo da Coruña, sería o encargado de bautizar e dar a comuñón a "Mario", lexitimando a súa existencia a ollos da Igrexa e habilitándoo para contraer matrimonio. O casamento foi selado na mesma igrexa e polo mesmo párroco.
A natureza do matrimonio tardaría pouco en saír a luz, sendo a parella portada de diarios galegos e madrileños. Unha orde de busca e captura sería ditada contra ambas, o que as levaría a fuxir a Porto. Alí viven como marido e muller ate que son detidas e encarceradas a petición da policía española. Tras ser liberadas, e para evitar ser extraditadas ao Estado Español, poñen rumbo ao exilio en Arxentina, país onde rematarían os seus días.
Podedes coñecer máis en profundidade a historia de amor desta parella no libro "Elisa e Marcela. Amigas e Amantes", de Narciso de Gabriel, e no filme "Elisa y Marcela", de Isabel Coixet.
Vivan as noivas e viva o amor libre!!! 🏳️🌈🏳️🌈🏳️🌈