30/01/2026
ኣብ ትግራይ ዳግማይ ዝተወለዓ ግርጭት ንቀርኒ ኣፍሪቃ ናብ ዘየድልይ ጎንፂ ዘእትው ብምዃኑ ደው ኢሉ ወዕሊ ፕሪቶሪያ ሙሉእ ንሙሉእ ዝትግበረሉ ኩነታት ብህፁፅ ክፍጠር ኮሚቴ ጉዳያት ወፃኢ ቤት ምኽሪ ኣሜሪካ ፀዊዑ።
" ኣብ ትግራይ ተፃብኦታት ዳግም ምጅማሩ ብዝምልከት ዝወፀ መግለፂ " ብዝብል ኮሚቴ ጉዳያት ወፃኢ ባይቶ ኣሜሪካ ሎሚ ኣብዘውፅኦ መግለፂ "ኣብ ቀረባ እዋን ኣብ ትግራይ ዝካየድ ዘሎ ውግእ፡ ንኢትዮጵያ ህይወት ሚልዮናት ኣብ ሓደጋ ዘእቱ ድግም ናብ ኩናት ሕድሕድ ዝመልስ እዩ " ክብል ገሊፁ ።
ካብዚ ብተወሳኺ " እቲ ኩነት ነቲ ሕዚ ዘሎ ዘስካሕክሕ ሰብኣዊ ቅልውላው ዘጋድድ እዩ " ዝበለ ኮሚቴ ጉዳያት ወፃኢ ባይቶ ኣሜሪካ ብሓፈሻ ድማ ዞባዊ ዘይምርግጋእ ዘስዕብ ሓደጋ ኣለዎ " ክብል ገሊፁ ።
" ካብ ጎነፅ ተጠቃሚ ክኸውን ዝኽእል ወገን የለን" ዝበለ መግለፂ ኮሚቴ ጉዳያት ወፃኢ ባይቶ ኣሜሪካ ኩሎም ወገናት ብህፁፅ ኩሉ ተፃብኦታት ደው ከብሉን ሰብኣዊ ድጋፍ ዝህቡ ትካላት ብዘይዕንቅፋት ናብ ዝተፀገሙ ወገናት ሰብኣዊ ሓገዝ ክበፅሑን ፀዊዑ ።
ኣብ ወርሒ ሰነ ኣብ ኢትዮጵያ ተኣማንነት ዘለዎ መረፃ ክካየድ እንተተደልዩን ክቕፅል እንተኾይኑን ኣብ 2022 ኣ.ፈ ኣብ ፕሪቶርያ ዝተኸተመ ስምምዕ ምቁራፅ ተፃብኦታት ምሉእ ብምሉእ ምትግባር ኣገዳሲ እዩ ክብል ኮሚቴ ጉዳያት ወፃኢ ባይቶ ኣሜሪካ ኣተሓሳሲቡ ።
ውዕሊ ፕሪቶሪያ ሕገ መንግስታዊ ግዝኣት ትግራይ ክኽበር ፣ ተመዛበልቲ ናብ መረበቶም ክምለሱ ፣ ወረርቲ ሓይልታት ካብ ግዝኣት ትግራይ ክወፁን ዳግመ ሕውየት ትግራይ ክሳለጥን ይፅውዕ ። ሰብኣዊ ሓገዝ እውን ብዘይ ገለ ዕንቅፋታ ንኽቀረብ እዩ ዝድንግግ ።
እንተኮነ ግና መንግስቲ ኢትዮጰያ ዋላ ሓዲኦም እዃ ዛጊድ ክትግበሮም ኣይከኣለን ። ዛጊድ ንትዕግስቲ ምምሕዳርን ህዝብን ትግራይ ዝሰምዕ ኣካል ክረኽብ ኣይካኣለን።
ኢትዮጵያ ዘጋጥማ ዘሎ ፖለቲካዊ ብድሆታት ኣብ ዓውደ ውግእ ክፍታሕ ኣይከኣልን ዝበለ እቲ ኮሚቴ ዲፕሎማሲን ነፃን ፍትሓውን መረፃ ጥራይ'ዩ ተግባራዊ መሳርሒታት ክብል ድማ ኣብ መግለፂ ኣመላኺቲ ።
