04/04/2026
රු.420/- බැගින් Marvel පැකට් 6ක් මීගමුවේ තොග කඩයකින් ගෙන ගෙවල් ලඟ ෆාමසියකට රු.380/- බැගින් අලෙවි කොට පටන් ගත් Diaper Deal ව්යාපාරයට අදට වසර 9කි.. (04/04/2026) පළමු ගණුදෙනුවෙන් වූ දළ අලාභය රු.240/-කි..
එච්චර මෝඩදැයි කෙනෙක් අසන්නට පුලුවන්ය.. නමුදු අදටත් ඒ මගේ පළමු ගණුදෙනුකරු බව දන්නේ මා පමණක්ය. Diaper Deal පටන් ගන්නට කළ පළමු තොගය මා වෙත ලැබීමට තිබුනේ එදින හවසය. ඒ දවස්වල තාත්තා අසනීපව රෝහල්ගත කර තිබූ බැවින් මා ෆාමසියට ගියේ බෙහෙත් වගයක් මිලදී ගන්නටය. ගෙදර ඉඳන් පටන් ගන්නට යන මගේ බිස්නස් එක ගැන නිකමට මෙන් මා පැවසූවේ එනිසාය. 'පටන් ගන්නයි යන්නේ' කියනවාට වඩා 'මං පොඩි පැම්පස් බිස්නස් එකක් කරනවා'.. මොනා හරි ඕන උනොත් කියන්න' යැයි කීවේ එම මොහොතේම ඇණවුමක් ලැබේයැයි කිසිවිටකත් නොසිතූ නිසාය.
'මං company එකෙන් වෙනදට ගන්නේ, ලොරිය එන්න තව දවස් 3ක් යනවා. මට Marvel Large 16pcs packs 6ක් එතකල් ගන්න පුලුවන්ද?' ඇත්තටම කිව්වොත් තාම මං ලඟ එක පැක් එකක්වත් නැතැයි කියන්නට හැකියාවක් නැත. 'හරි, මං දැන් hospital එකට යන ගමන්. එද්දි ගෙනත් දුන්නට කමක් නැද්ද?' කීවේ දෙගෙඩියාවෙනි. ඔහු වෙනදා මිලදී ගන්නා රු.420– මිලට දීමේ පොරොන්දුව මත පළමු ඇණවුම බාර ගත් මට එය මීගමුවෙන් මිලදී ගන්නට වූයේද එකක් රු.420/- කටය. ඒත් පාඩුවක් නැත. මට තිබුණේ සතුටකි, ආපසු ෆාමසියට ආ විට ඔහු ඉතා කාරුණිකව කීවේ ඔහු බිල් පරික්ෂා කරන විට එය ඔහුට අවසානයට ලැබී ඇත්තේ රු.380/-කට බවත් එම මිලට මට දීමට හැකිදැයි විමසීය. එලෙසින් රු.420/- බැගින් ගත් පැකට් 6, රු.380/- බැගින් විකුණා මා පළමු ගණුදෙණුව සිදු කරන ලදී..
වසර 9ක් ගෙවී ගියද අදටත් ඒ සිදුවීම මට ගෙන දෙන්නේ සතුටක්ය. ඒ පළමු ගණුදෙනුව නිසාම නොවේය. පාඩුවට වූවද ඔහුට පොරොන්දු වූ මිලට මට දීමට හැකි වීම නිසාය. ඇතැම් විට ඒ මගේ පළමු ගනුදෙණුව බව ඔහු දන්නේ නම් ඇතැම් විට ඔහු රු 420/-ටම ගන්නට තිබූ බව මා දනිමි. අදටත් මේ කිසිවක් ඔහු දන්නේ නැත.
නැකත්, ලාභ අලාභ, හොඳම වෙලාව නොබලා පටන් ගත් අද වන විට ශාඛාවන් තුනකි. එදා මෙන් අදද මට අවැසි වූයේ තැබූ විශ්වාසය රැකීමටය. කියූ වචනයක් රැකීමටය. පටන් ගැන්ම අපහසු වුවද කෙනෙකුගේ විශ්වාසය රකිමින් යන ගමන බොහෝ දුරය.. බොහෝ ශක්තිමත්ය.. බොහෝ සැනසීමය.. ❤️
Diaper Deal - The Trusted Store
(C) - Maajini Mahadanaarachchi
