09/05/2025
سلام عليكم
قصه طويله شويه يعني حط راسك ع لمخده وانسجم ومره هذي نبي تفاعل كويس كلكم تفاعلو مش خاسرين شي 🤨❤
منطولش صلوو ع رسول الله وخشو ف لعالم ثاني 🫣
لقصه ف مصر هيا لشخص اسمه حسين عاش اسوء ايام حياته بعدما دفنوه حي!!😮 اكيد مش مصدقين صح.
مهم ف سنه 2002 كان في راجل اسمه حسين وكان عمره تقريبا ف ثلاثينات
حسين كان وضعه المادي سئ بكل او والده كان متوفي
فحسين قعد يشتغل ف لمقاهي لمده طويله عشان يصرف ع روحه واهله مرت سنوات حسين وصل عمره 35 سنه
بدا يفكر وقال ليش نزوج وندير حوش عاد خلاص كبرت ومش ديما نقعد عازب
حسين ف لوقت هذاك كان ساكن عزابي يعني مش مع اهله
كان مأجر غرفه وكان يخدم بساعات ويطول يعني من لمقهى للغرفه من الغرفه للمقهى وهكذا واذا حصل اجازه يمشي يزور امه واخواته وكان ولد خالته ساكن معاه ف لغرفه يعني حسين مش بروحه
مهم أم حسين كانت اميتها انها تشوف حسين متزوج وعنده حوش وعنده عيال تبي تشوف احفادها هذا كان حلمها
عموما حسين لما حصل اجازه طول طلع زي لفراره مشي لامه سلم عليها وفتح معاها الموضوع لان عرف يلم قروش وحالته انشاءلله كويسه ويقدر يزوج... لما خبر امه بالموضوع وقال امي انا عاوز اتجوز امه هنا طارت من لفرحه وقالت ي ابني انا هاتجوزلك احسن بنت ف لحته
بس حسين كان حاط عينه ع وحده من بنات ويبي يخطبها
مهم ام حسين لما عرفت لبنت قالتله لالا اذا خذيته انا حنغضب عليك ومش مسامحتك حسين حاول يقنعها بس مفيش فايده. بس حسين صكر راسه وقال انا نخطبها يعني نخطبها
طلع حسين من لحوش ومشي لاهل لبنت وخطبها وبعد فتره بدو يجهزو وحسين كان يجهز ف طلبات لعرس وكان يخدم عشان يقدر يلم
مهم حسين رد حياته طبيعي يخدم ف لمقهى ويرد للغرفه ومن لغرفه للمقهى وكان كل يفكر ف امه لان مش راضيه ع لبنت لي خطبها
قال اكيد بعد فتره تو تعود ع لبنت وترضى
عموما ف يوم كان لمقعى مليان زباين وكان حسين يخدم وكان يوم متعب لما انتهاء حسين من لعمل مشي للغرفه وكان
نعسان نوم وجيعان مش واكل فقال خليني نعبي بطني ونرقد فليله هذك حسين تعشى وحط.راسه ورقد طوول من تعب
رقد ساعات لين جا ولد خالته لي معاه ف لغرفه لقاه مزال راقد قال كيف مزال راقد زعما عنده اجازه استغرب انه حسين راقد من امس ولتوا 6 مغرب مزال مناض
قرب من حسين وبدا يصحي فيه
حسين نوض نوض ي حسين خيرك مزلت راقد عطوك اجازه ليوم
حسين ولا حركه وكأنه صنم ولد خالته خاف مشي جاب ميه وصبه ع وجه حسين ولكن برضو حسين ميتحركش ولد خالته طول مسك تلفون واتصل ع لاسعاف وجت لاسعاف بدت تشوف ف نبض ونفس لكن مفيش نفس ولانبض..؟
هنا خذو حسين وشالوه للمستشفى.
لما وصلو للمستشفى الدكاتره استقبلوه ودخلوه لغرفه لانعاش بدو يكشفو عليه مفيش نبض ولا نفس وجسمه كان بارد وبدو يديروله فحص اذا كان في اشارات فدماغ ولا شي
بس مفيش ولا حاجه!!!!
طلع دكتور وقال لولد خالته البقيه فحياتك حسين ميت!
بدو يديرو تصريح دفن وشهاده الوفاه
خلاص ولد خالته مكانش مستوعب انهار وضايق وكلم اهل حسين وخبرهم بالقصه وجو لعند لمستشفى وقعد عياط امه بدت تبكي وقلبها تقطع ع لحسين
مسكينه انتم عارفين شعور لام.
مهم بعد ماغسلو جثه حسين وكفنوه وصلو عليه ودارو جنازه
ودفنوه أم حسين كانت ندمانه انه كانت مش موافقه ع لبنت لي كان يبي يخطبها (هوا خطبها بس هيا كانت نادمه عشان مكانتش راضيه عليه)
ناس كلها جيرانه واقاربه ولي يعرفه كلهم كانو زعلنين عليه لان كان طيب واخلاق كويسه مع ناس وكانو مفجوعين لانه مات موته فوجائيه..
مهم بعد العزاء عدا اول يوم وثاني يوم وثالث يوم وفي رابع
يوم حسين صحى من لغيبوبه 🫣!!!!
نعم؟ كيف صحى؟
ايوه ناض من لغيبوبه في رابع يوم!!!
صحى حسين لقاه روحه ف روحه قاعد ف ضلام بدا يفك نفسه ونزع لقطن الي في وذنه وخشمه لما حول لقطن من خشمه شم ريحه معفنه كأنه في جثه بني ادم جنبه حسين خاف وبدا ينوض بيش يطلع شاف روحه مرب وملفوف وبدا يفك ف نفسه ومستغرب شن صاير معاه؟؟
لما فك نفسه بدا يتلمس حس بشي زي لعضام هنا عرف انه قاعد مدفون ف مقبره..!! لان اغلب لمقابر ف مصر كانو يدفنو فيهم ف غرفه مقفله باب حديد هكي سمعت انا الله واعلم.
مهم لما عرف روحه فمقبره بدا ناض وبدا يخبط ع لباب ويعبط ي ناس ي عالم طلعووني ي ناس
كان في شخص يمشي في لمقبره سمع صوت ولما قرب عرف صوت طالع من لقبر انفجع لمسكين 😂 مشي لعند لحارس متاع لمقبره وقاله في حد يعيط ف لمقبره لحارس قاله كيف اخر جثه دفناه قبل اربعه ايام حتى كان حي مفروض يعيط اول يوم مش بعد اربع ايام؟؟ الراجل قاله انا مش عارف بس والله سمعت صوت حد يعيط الله واعلم من شيطان عفريت مهم في حد يعيط لحارس قاله تمام هيا نمشو نشوفو لما قرب لحارس من لقبر الا فعلا ف صوت حد يعيط ويقول طلعوني 😮..!
لحارس مش قادر يفتح باب القبر لان فيها مسؤليه
ف طول طلق رجليه جري لعند مركز لشرطه وخبرهم بالقصه
لان ممنوع حد يفتح باب لقبر من دون مايبلغ سلطات
اتصلت الشرطه بممرض وخذوه معاهم للمقبره عشان كان في حد ف لقبر حي يفحصوه...
مهم لما وصلو لمقبره وبتحديد لعند القبر مكانش في صوت؟
كيف وين صوت!
لحارس قال والله سمعت صوت حد يخبط هنا في لقبر هذا بضبط مشو لعند لقبر وفتحو الباب!
لما فتحو الباب كان لقبر مضلم وكان في صوت حد يتحرك جوا
الشرطه قالو للحارس خش وجيب الشخص الي جوا اين كان
الحارس قال نعم؟ انا مش شوري انتم لي شوركم طلعو مش انتم لامن.!
العسكري قاله مش انت الحارس متاع مقبره الي تنزل في جثه وتحط ف لقبر؟ الحارس قال ايوه انا نحط في لقبر بس منطلعش من لقبر 😂
العسكري مسكه بالقوه وقاله توا تخش اطلع الي جواا انت الي تحط معنها انت الي طلعه
المسكين لحارس خش وكان قلبه قريب يوقف ولما ولع كشاف بيله شاف حسين وكان ابيض وشعره مصبي ومنضر يجيب لهول وگانه جثه تتحرك لحارس شهق شهقه قويه وجته جلطه وطاح
طلع حسين يسحف وكانت رجله كله دم في حاجه خشت ف رجله لما كان ف لقبر دارله جرح عميق
مهم لما طلع من لقبر الشرطه كلها ولممرض من لخوف طلقوها جري وسيبوه بروحه
لمسكين حسين كان يتألم ومفجوع ومش فاهم شي ليش ناس هربت وبدا خايف ويرجف من صقع
مهم في مراه كانت تسكن قريب من لمقبره وكانت تزور في قبر لما عرفت لقصه وشافت حسين مشت لعند لحوش جابت غطا وغطاته بيه والله مراه قويه وقلبها قوي رجاله هربو وهي جت تساعد فيه 🫣
مهم بعدها الشرطه تشجعو وجو خذو حسين للمستشفى اول م دخلوه قالولهم هذي حاله لقيناها ف لمقابر ومدفون له اربع ايام تقريبا ومنضر حسين كان مرعب صراحه عضم ع جلد دكاتره كلهم كانو خايفين وهربو مفيش حد راضي يعالجه
لمستشفى هنا اتصلت بصحه وقالوله نبو دكاتره ضروري عندنا حاله هنا ممكن تموت!!
ف الصحه طول رسلتلهم كم دكتور عشان يلحقو ع حسين ويعالجوه
حسين ف لوقت هذاك كان مش قادر ع نطق ولا كلمه ف دكاتره خذوه وحطوله مغذيات وخذو منه عينه دم وبدو يديروله ف تحاليل
حسين كان تعبان وهالك شويه وخش ف غيبوبه وعيونه كانت مفنصه مفتوحه وهوا في غيبوبه!!
المستشفى رنة عل اخوات حسين وكلموهم انه في شخص اسمه حسين جابوه من لمقبره ومزال حي تعالو شوفوه هل هذا خوكم ولا
ف خوت حسين استغربو قالو خلينا نتأكد من لموضوع قبل مانخبر امنا عشان مايجيها جلطه ولايصيرلها شي
لما مشوه لمستشفى بدو يفكرو كيف حسين عايش احنا دفناه من خمسه ايام مستحيل يكون عايش!!
وصولو لمستشفى وقاللهم دكتور انه حسين توا قاعد في غيبوبه دخلو لغرفه وشافو حسين وكان منضره مرعب
اخوانه خافو وقالو مستحيل يكون هذا حسين صغير وشكله مش هكي هضا كأنه شايب عمره 70
حسين كان نحيف عضم وجسمه ابيض وشعره جااف وعيونه مفنص 👀
مهم حسين صحى من لغيبوبه وشاف اخوانه قاعدين بس كلهم مبعدين ويشوفو فيه من بعيد لانهم كانو خايفين
بس اخوانه قالو خلينا نكلم امنا ونخبرها بالموضوع لان هيا حزينه وزعلانه نخبرها بيش تفرح
مشو جابو لام للمستشفى وبدو يكلمو فيها الام قالتلهم
شن فيه ليش جبتوني هنا قالولها لا غير في غلط بسيط صار بنخبروك بيه قالو ان حسين مكانش ميت كان في غيبوبه دكاتره يحسابوه
ميت بس طلع حي.! لام طارت م فجعه وتزغرط ف مستشفى
ومشت لعند حسين وشافت حسين وكانت مصدومه قربت حضناته وحسين كان يبكي مش مصدق. لكن فجاءه امه طاحت جلطه قلبيه وماتت من كثر فرحه وصدمه ماقدرت تحمل
هنا حسين بدا يعيط واخوانه يعيطو مستشفى كلها سمعت صوت لعياط ف بدال ماتكون فرحه تما حزن وبكا مساكين والله
مهم بعد ماصار موقف لام ودفنوها اخوان حسين بدو يوسوسو منه قالو هذا لما قرب منه لحارس جته جلطه ومات ولما حضنته امي جتها جلطه وماتت لالا شكله نحس ومش كويس وبدو يخافو منه وكرهوه ومعش زاروه ف لمستشفى وسيبوه بروحه ولا كأنهم يعرفوه
عموما حسين قعد ف لمستشفى فتره وكان يعالج ع رجله لي كانت تعبانه وداروله كم عمليه ع رجله لعند ماقدر يمشي بعكاز وقعد فتره ف لمستشفى بعدها تحسن وطلع من المستشفى..! تقريبا جلس ف مستشفى حوالي سنه ونص
وطلع ف سنه 2004
لما طلع من مستشفى تلفزيون دار معاه مقابله وحكى قصته و القنوات التلفزيونيه بدت تتكلم عنه لان هذي حاله غريبه ماتكرر يوميا
وبعد مادارو معاه مقابلات وناس كله بدت تعرف قصته مشي حسين عند اخواته بس كلهم لزوه وسكرو الباب ف وجه
ناس كلها بدت تخاف منه وما تسلم عليه
مشي عند خالته برضو متبيش تستقبله وكذلك مشي عند خطيبته اذكرتوها لبنت لي امه كانت متبيش يخطبها خلاص هذي هيا
عموما لما مشي لخطيبته قالتله نعم انت من؟
معش تجيني هني ي حسين لا نعرفك ولا تعرفني اقلب وجهك
حسين مشي فشارع ومهموم واخونه كلهم لزوه فشارع ومفيش حد حس بيه
مهم حسين قال مستشفى هيا سبب لي صار كله لانهم شخصوه وفحصوه غلط.. خليني نمشي نشكي فيهم
مهم مشي حسين لمحكمه ودار دعوه لمستشفى بس ماقدر يشكي فيهم عارفين عليش؟ لانه حسين اول مشخصوه ودار اوراق وشهاده وفاه هيا مستشفى هذي واول مطلع من لقبر حي شالوه ع لمستشفى نفسها
هنا مدير لمستشفى ومسؤلين لما سمعو بالقصه خافو وقالو هذا اكيد بعد ماصحى اكيد يمشي يشكي فينا
ف شن دارو خذو لاوراق وحرقوهم وماخلوش ولا دليل شفتو خباثه لمدير ..!
حسين قعد يثبت انه هذي مستشفى هيا سبب انه شخصوه غلط بس مفيش دليل ولا في فايده
ف قعد يفكر لين اذكر انه لحارس لمقبره اصلن اتوفى وميعرفو وين تصريح دفن!
عموما حسين سيب لمنطقه ومشي لمنطقه ثانيه بعيد بيش ناس متعرفه وتقعد تخاف منه ف بدا يمشي ع عكاز ويخدم يشري من محل ويبيع لين بعد فتره ضرباته سياره..ومعش قدر يخدم وبدي عاطل عن لعمل وقعد راقد ف غرفه عايش ع لمساعدات وشكله محزن لمسكين مشكله
معش تعرف شن غلط؟؟
مستشفى غلطانه ولا دكتور غلطان ولا تشخيص كان غلط
في شي ف موضوع غريب لان تشخيص ف مستشفى يقولو
ركبوله جهاز ومكانش في نبض ولا في اشارت في لمخ ماتعرف من غلطان شي غريب مستحيل انها تصير مع انسان 🫣
الـنهــايـه ❤
