10/08/2026
‼️ بنات، كيف حالكم؟ ❤️
حابّة نوضح نقطة بخصوص طلبيات شي إن عند متجر هديل الدوكالي.
والله يجوني كل يوم طلبات، وفيه أكثر من 100 زبونة تبّي طلبيتها تكون مستعجلة، لكن مستحيل ناخذ طلبية وأنا عارفة إنها ممكن تتأخر ونوعد بوقت مش مضمون، بس باش نكسب وخلاص. المصداقية عندي أولًا وقبل كل شي. 🤍
شحن شي إن شحن دولي، يعني مش بإيدي نتحكم في وقت وصوله. مرات توصل الطلبية في أسبوع، مرات 11 يوم، مرات 15 يوم، وممكن في بعض الحالات توصل حتى خلال 25 يوم، وهذا كله يعتمد على الشحن، مش عليّا.
طبعًا نقدر ناخذ الطلبية ونقول للزبونة إنها بتوصل في وقت معين، خاصة إن أغلب الطلبيات فيها عربون أو حتى المبلغ كامل، لكن هالشي مستحيل نديره، لأني نحب الزبونة تكون عارفة كل التفاصيل من البداية وما يكونش فيه أي وعود غير مضمونة.
لهذا، أي زبونة تطلب من شي إن بسعر الموقع وبدون عمولة، من البداية نقولها الوقت المتوقع بكل صراحة. وأنا دائمًا نحسبلها مدة أسبوعين كمدة آمنة، ولو وصلت قبلها، أول ما توصل نعطيها خبر مباشرة. ❤️
شكرًا لكل وحدة واثقة فيّا، وإن شاء الله ديما نكون عند حسن ظنكم. ثقتكم هي رأس مالي قبل أي ربح. 🤍🌷
