12/03/2020
بغيت نعاود ليكم كيف دازت هذ 22 يوم ديال كورونا في إيطاليا
نهار 16 فبراير واحد السيد في عمرو 38 سنة ساكن في نواحي مدينة لودي لي جات قريبة لميلانوا، مشى للمستعجلات حيت فيه الكحبة و السخانة، عطاوه الدوا على حساب السخانة و بغاو يشدوه عندهم، هو رفض و رجع لداروا.
من بعد يومان، 18 فبراير. رجع للمستعجلات، حتى واحد ما فكر انها تقدر تكون كورونا فيروس حتى قالت ليهم مراتوا بلي في اوائل فبراير تعشا مع واحد manager كان عاد راجع من الشينوا.
صافي داروا لو التحاليل، جاتهم الصدمة، صدق postive.
بداو كيديروا التحاليل للناس لي تلاقا معاها في دوك الايام، لقاو مراتو، الطبيب ديالوا، واحد خدام معاه، و 2 معاه في la sale de sport و الدري لي خدام في البار لي موالف امشي افطر فيه كاملين فيهم كورونا فيروس. و 5 ديال الممرضات في للمستعجلات و الطبيب لي قلبو في المستعجلات و شي ناس كانوا في المستعجلات داك النهار حتى هوما مراض بي كورونا.
ناضت الروينة،بداو كيديروا التحاليل للعائلات ديال دوك الناس كاملين و صحابهم و الناس لي خدامين معاهم.
و لقاو البشار مطلي بيه.
في 5 ايام دارو كثر من 10000 تحليلة. لقاو كثر من 500 ديال البشار عندهم الفيروس.
قررو يسدوا 11 مقاطعة و منعوهم من الخروج، 50 الف ديال البشار سدوا عليهم في ديورهم.
ناد الصداع و الشعب تقسم على 2، كاين لي كيقول راكم زدتوا فيه، راه فيروس عادي بحال الانفلونزا لي كتجي كل عام، و النص الآخر خايف و كيقول ليهم را حنا غادين نوليو بحال الشينوا.
الناس لي خافت ليسدوا عليهم حتى هوما، ناضوا تقداو المؤونة ديال كثر من شهر . ناض التخاطيف و les supermarket خواو من السلعة.
و الماسكات مابقاوش كيدور في جهة Lombardia كاملة.
الناس كاين لي بدا يبروفيطي و المسك كان داير 2 euro ولى داير 20 euro او اكثر.
شويا الفيروس بدا كيديع من مدينا لمدينا، لقاو بزاف ديال الحالات حتى في ميلانوا و بيرغامو و بريشيا.
المستشفيات بداو كيعمروا بالناس، بداو كيموتوا الناس الشارفين لي عندهم كورونا، وو بنادم قوا في المستشفيات و تعاداو اطباء و ممرضين، في المستشفى الكبير ديال بريشيا تعداو 50 واحد غير بين اطباء و ممرضين.
صافي الدولة قررت يسدوا المستشفيات، و لي مريض و شك في راسوا عندوا كورونا يعيط 1500 غادين يجيو عندوا حتى الدار يهزواه.
بقاو كيديروا في التحاليل و كنعسوا في المستشفى غير لي مخنوق و فيه السخانة. اما لي ما حاس بوالو واخى عندوا كورونا كيسدوا عليه في دارو هو و عائلتوا.
القضية ترونات، عدد الاموات كيتزاد كل نهار و حتى عدد المرضى، الدولة خسرات الملايير ديال الفلوس و على التحاليل، حاجة لي حتى دولة في اوربا مادارت بحالها. الطاليان اصلا معروفة انها ماكضرب حسبة فاش القضية كتكون فيها الصحة.
المهم، قرروا انهم يوليو يديروا التحاليل غير للناس لي عندهم اعراض كورونا. حيت بنادم قوا عليهم.
كثروا الناس في الانعاش و الدولة بدات كتخاف لا يعمرو البلايص المجهزة للانعاش، خوصوصا جهة. Lombardia لي لقاو فيها الناس بزاف مراض، و هي فيها 800 سرير للانعاش.
ممكن 800 يبان ليكم رقم قليل، لكن راه كبير بالنسبة لجهة فيها 10 او 11 مدينة.
مع مرور الايام وصلوا عدد المرضى ل كثر من 5000 ديال البشر. و الموتى كثر من 200، و بداو كيبانوا معتدين بالفيروس حتى في جهات أخرا من اطاليا، الدولة قالت للناس ديال جهة Lombardia ما يبقاوش يسافروا، و الناس الشارفين يجلسوا في ديورهم ما يخرجوش حيث هوما لي معرضين للخطر أكثر.
و قررو يسدوا المدارس و الجامعات كاملين ديال جهة lombardia لغاية 2 مارس.
الدولة بدات كتزيد تجهز في بلايص ديال الانعاش، و حتى بلايص عاديين.
الدولة سدات المدارس و الجامعات باش بنادم يجلس في دارو، لكن للاسف بزاف ديال بنادم كان كظن ان غير الإعلام لي زاد فيه، و عطاوها غير الدوران، و الناس ماشين vacance و طالعين للجبال يتزلجوا، و لديسكوات يشطحوا و مامسوقينش.
حالات العدوة وصلات 7000 و الموتى 400 و الناس و لا بغات تحشم.
السبت لي فات، 7 مارس، جميع اماكن التزلج صابحات عامرة بالناس.
الحكومة قررت ان جهة lombardia كاملة zone rouge. ممنوع الخروج من الدار الا للعمل او التقدية. و سدات كلشي .
السبت من 11 ديال اليل ملي سمعوا الاخبار، جميع الناس لي كانو في lombardia غير من اجل الدراسة او العمل، خداو القطار من ميلانو و رجعو لعند عائلاتهم في جهات أخرا.
كاين لي خدا taxi ب 1200 اورو باش يمشي من ميلانو لشي جهة اخرى.
اوا لبارح أعلنت الحكومة الإيطالية انا اطاليا أصبحت كلها zone rouge. سدوا المطارات و كلشي. و منعوا الخروج من الدار منعا كليا.
البوليس دايعين و لي لقاوه خارج يدور بدون سبب، فيها 3 شهور سجن.
ممكن بنادم يخرج من داروا غير للعمل او للتقدية. مع العلم انا غير الشركات لي مازالين خدامين، اما البرات و المطاعم الحلاقين الخ.... كلهم سدوا.
اليوم وصلوا حالات المرضى ل 10149 حالة، و الموتى واصلو 631, غالبهم فايت 70 سنة العمر ديالوا.
و لحد الآن 1000 تشفات شفاء كلي و رجعوا لديورهم.
و الله يحفظ بلدنا المغرب .
المهم. الصين سايطرات على الفايروس و وصل عدد المتشافين كثرمن 60 الف متشافي.
