01/03/2017
بين منطوق لم يقصد و مقصود لم ينطق تضيع الكثير من المحبة .
قليل الى ماكانش ناذرا فاش كايعطيك القدر فرصة تلامس فيها نجوم و تعيش فوسط الغيوم هاد الفرصة هي بحال شي تذكرة تهرب بيها من الواقع لعالم الخيال ، العالم لي فيه كولشي زوين ،و أي حاجة حلمتي بيها غاتحقق ، و مكينش سواد حيت كاع الألوان كاتكون زاهية هاد التأشيرة سميتها الحب ❤ فاش كندخلو فشي علاقة كولشي فينا كيتبدل من بعد سنين ديال الوحدة و العزلة و العتمة كانشوفو النور بحال شي حد دوز حياتو كلها عمى و فاش حل عينيه أول مرة بقى مدة طويلة واقف و كايتأمل نوع من الخلعة و الدهشة ، كانتعرفو على أشياء جديدة ، كنشوفو ألوان ، كانشوفو كولشي بنظرة مختلفة ، الانسان لي كانبغيو هو العين لي خلاتنا نشوفو النور ، منقدروش نستغناو عليه و منقدروش نتخيلو حياتنا كيفاش غاتكون الى ماكنش ، حيت حتى شي حد ماكيبغي يعيش حياتو فالظلام . هاد الإنسان بالذات هو لي كايوقف معانا فظروفنا الصعيبة ، هو لي كايتحمل المزاجية ديالنا ، العصبية ديالنا . كايتحملنا فأي ظرف و فأي حالة كنا فيها ، حنا فالحب كانرجعو دراري صغار فاش كنلقاو إنسان متمسك بينا و باغينا كانتفششو عليه و كانديرو بزاف الأخطاء و شي مرات نقدرو نجرحوه و حنا عارفين أنه مهما درنا مغيتخلاش علينا حيت كايبغينا ؟ و هنا كانرجعو أنانيين بزاف ،شي مرات كانديرو شي تصرفات و كانقولو شي حوايج واخة منكونوش قاصدينها و لكن كانجرحو بيها الانسان لي كانبغيو جرح عميق الانسان لي صبر و هز لينا هبالنا مرة و جوج و ثلاثة وصل المرحلة أنه مابقاش قدر يتحمل هاد الضغط و مابقاش قدر يتحمل الألم لي كل مرة كايحس بيه و كايخبيه فقلبو ، فالوقت لي خاصنا نتمسكو بيه بكل قوة ، حيت بسبابو شفنا النور ، حنا كانجرحوه و كنآديو بطريقة لي ميستهلهاش ، و مكنعرفو بقيمتو حتى كانفقدوه 💔 حيت كاينين شي حوايج كبر من الحب ، كاين كرامة و كل إنسان كيشوف كرامتو فوق أي شيئ كيف ما كان . أصعب و أخيب شعور ممكن تحس بيه هو فاش كاضيع منك شي حاجة غالية بزاف ماتشريهاش بثمن فالوقت لي رجعو الاحاسيس كيتشراو بلفلوس .
رسالة لأي واحد لقى إنسان كايبغيه ماتحولوش ضغطو عليه و تجرحوه بشي حاجة واخة ماتكونش مقصودة حيت لأي حاجة فيها درجات و حتى الصبر عندو درجات و حتى شي إنسان ما مجبر أنه يتحمل شخص آخور بدل مايجازيه بالخير كايزيد يصعب عليه الحياة . و حيت فالأخير أخيب شعور تفقد الشخص لي كاتبغيه بتهور منك . ماتخليوش الأنانية ديالكم ، عصبيتكم ، مزاجيتكم مشاكلكم يأثرو فعلاقتكم..
