HO ANAO

31/03/2026

⚖️✨𝐌𝐈𝐀𝐈𝐍𝐀 𝐀𝐎 𝐀𝐍𝐀𝐓𝐘 𝐓𝐄𝐁𝐈𝐓𝐄𝐁𝐈𝐍-𝐓𝐒𝐀𝐈𝐍𝐀 𝐀𝐍𝐃𝐑𝐎 𝐀𝐌𝐀𝐍’𝐀𝐋𝐈𝐍𝐀 𝐈𝐑𝐄𝐎 𝐌𝐏𝐈𝐀𝐍𝐀𝐓𝐑𝐀 𝐀𝐅𝐀-𝐏𝐀𝐍𝐀𝐃𝐈𝐍𝐀𝐍𝐀 𝐇𝐎 𝐌𝐏𝐈𝐓𝐒𝐀𝐑𝐀 𝐍𝐎𝐇𝐎 𝐍𝐘 𝐓𝐒𝐀𝐇𝐎 𝐌𝐈𝐄𝐋𝐘 𝐒𝐘 𝐑𝐄𝐒𝐀-𝐁𝐄 𝐀𝐍-𝐓𝐀𝐌𝐁𝐀𝐙𝐎𝐓𝐑𝐀𝐍-𝐓𝐒𝐄𝐑𝐀𝐒𝐄𝐑𝐀‼️

▫️ Hatreto dia olona 06 voasambotra tamin’ny fivarotana mialoha ny laza adina nanaovana fifaninana hidirana ho Mpitsara eto Madagasikara. 03 tamin’izany nahiditra am-ponja vonjimaika eny Avaradrano‚ raha napetraka eo ambany fanarahamason’ny Fitsarana ny 03 ambiny. Izy ireo izay voarohirohy tamin’ny fivarotana laza adina mialoha ny fanadinana tamin’ny sarany 01 Tapitrisa Ariary.

▪️Manoloana izany dia mandeha ny resa-be sy tsaho an-tambazotran-tserasera mba hisontonana ny sain’ny manampahefana sy tompon'Andraikitra eo anivon'ny Fitsarana fa indrindra ny Ministera mpiahy amin’ny tokony hanafoanana na hamerenana iny fifaninana ka miteraka adin-tsaina vaovao‚ sy tebiteby ary ahiahy amin’ny mety hampidirana ireo izay tsy afa-panadinana na sanatria misy zanaka mahitahita tsy tafiditra ka ho ampidirina...

☑️ Malahelo izahay izay efa nanao ezaka rehetra‚ tsy mandry alina‚ tsy mandry antoandro mianatra lesona‚ lany vola nivezivezy avy any amin’ny faritra miakatra aty Antananarivo‚ nilofo mafy‚ sns‚ mba ahafahana tamin’iny fifaninana iny nefa izao kasaina foanana na averina tsotra izao noho ny endrika kolikoly na fitiavan-tenan’ny sasany izay tia kely‚ tsy mitsinjo ny mangarahara sy ny hoavin’ny taranaka‚ hoy ny fanehoan-kevitra nataon’ireo mpianatra miantso ny Filohan'ny Fanavaozana ny Repoblika Malagasy ( Présidence de la Refondation de la République de Madagascar - PRRM ) ‚ ny Praiminisitra Lehiben'ny Governemanta ( Primature - Lapan'i Mahazoarivo ) ary ny Minisitry ny Fitsarana ( Ministère de la Justice de Madagascar ) mba hijery akaiky momba io raharaha fifaninana eo anivon'ny ENMG io ary hampihatra lalàna amin’ireo tratra nanao hosoka na nivarotra laza adina na nanjifa izany.

✅ Aoka ny lalàna no ampiharina amin’ireo voakasik’izany fa tsy ny Zanaka Malagasy rehetra ho potehina noho ny fitiavan-tenan’olom-bitsy ! Tokony hamafisina ny fanadihadiana ka izay tratra nandika lalàna faizina fa tsy ny Mpianatra na Mpifaninana rehetra izay nanao ezaka mafy ho an’ny hoaviny. Misy ireo kamboty‚ misy zanaka Tantsaha Sahirana‚ misy ireo efa somary nahazo taona (mety ho tratry ny limite d'âge)... Niezaka mafy mba ahafahana mahazo vokatra tsara ho an'ny hoaviny nefa potehina tsotra izao‚ tsy rariny‚ hoy hatrany izy ireo naneho ny alahelony manoloana ny zava-misy.

📌 Andrasana araka izany ny fanapahan-kevitry ny Minisitry ny Fitsarana sy ireo Manampahefana momba izany mba hijery ny rarany ary ampihatra ny hitsiny hoan’ny Zanaka Malagasy.

- - Aboaho Ankiaka ⚖️🇲🇬