13/07/2021
ခုချိန် မြန်မာပြည်မှာ မိုးရာသီဆိုပေမဲ့ ထိုင်ဝမ်မှာတော့ အခုမှ နွေဝင်ခါစပဲ ရှိပါသေးတယ်။ ခုလိုပူလောင်လှတဲ့နွေရာသီမှာ လူတိုင်းအေးမြတဲ့အရာတွေ၊ အစားစားတွေ စားဖို့တောင့်တမိမှာပါ။
ဒီတစ်ခေါက် မိတ်ဆက်ပေးမှာကတော့ ထိုင်ဝမ်ရဲ့ နာမည်ကြီး သရက်သီး စနိုးရေခဲသုတ် ဖြစ်ပါတယ်။ ထိုင်ဝမ်က ထွက်တဲ့ သရက်သီးဟာ နာမည်ကြီးသလို နှင်းလေးတွေကျပြီး အထပ်ထပ်လေးတွေ ဖြစ်နေသလို ရေခဲကို အထပ်လိုက်ကလေးတွေ ခြစ်ထားတဲ့ ထိုင်ဝမ် ရေခဲသုတ်ဟာလည်း နာမည်ကြီးလှတာပါ။
နွေရာသီဆိုလျှင် စနိုးရေခဲသုတ်အပြင် အအေးအစရှိတဲ့ နွေရာသီ နှင့်သင့်တော်တဲ့ ရာသီစာ ရောင်းချပေးတဲ့ ဆိုင်လေးတွေ အမြောက်အများရှိကြပါတယ်။
ဒီထဲကမှ စနိုးရေခဲသုတ် ဆိုင်တွေကတော့ နိုင်ငံခြားသား အများအပြားပါ လာရောက်တန်းစီး သုံးဆောင်ကြတဲ့အထိ လက်မလည်အောင် ရောင်းကောင်းကြတာပါ။
July လရဲ့ နေပြင်းပြင်းဒဏ်ကို အန်တုဖို့ ရေခဲသုတ်ကတော့ အကောင်းဆုံး ရွေးချယ်စရာတစ်ခုပါပဲ။
ယုံခမ်းလမ်းကိုရောက်ပြီဆိုလျှင် ရေခဲသုတ်ဆိုင် အများကြီးထဲမှ Snow Bao ကိုတော့ အမြဲရွေးချယ်မိပါတယ်။ နေရာထိုင်ခင်း ကျယ်ဝန်းတာကြောင့်ဖြစ်သလို သူ့ဆိုင်ရဲ့ သရက်သီး ရေခဲသုတ် အရသာဟာ ချိုအီမနေပဲ ဆိုင်နာမည်နဲ့အညီ တော်တော်ကို smooth ဖြစ်ပါတယ်။ အဓိကအကြောင်းရင်းကတော့ သရက်သီးကို အလတ်ဆတ်ဆုံး အနေထားဖြစ်အောင် ထိန်းသိမ်းထားနိုင်တာပါပဲ။ ထိုင်ဝမ်ထွက် အိုက်ဝင်သရက်သီး (愛文芒果) အသုံးပြုထားတာ ဖြစ်ပါတယ်။ အိုက်ဝင်သရက်သီးဟာ ဂျပန်လူမျိုးတို့ အလွန်နှစ်သက်ကြပြီး ဂျပန်နိုင်ငံအထိ တင်ပို့ရောင်းချရတဲ့ သရက်သီးအမျိုးအစားပါ။ ကိုဗစ်မတိုင်မီ ကာလများဆီကလည်း ယုံခမ်းလမ်းက စနိုးရေခဲသုတ်ဆိုင်တိုင်းမှာ တန်းစီနေတဲ့ ဂျပန်နှင့် ကိုရီးယားလူမျိုး အများအပြားကို တွေ့ရနိုင်ပါတယ်။ အိုက်ဝင်သရက်သီးရယ် နှင်းလေးတွေလို အထပ်ထပ်ဖြစ်နေတဲ့ ရေခဲခြစ်ရယ် အပေါ်က နို့ပူတင်းလေးတင်ပြီး နို့ဆီလေးဆမ်းထားတဲ့ စနိုးရေခဲခြစ်ကို စားလိုက်ရတယ်ဆိုရင်ဖြင့် နွေခေါင်ခေါင်ပေမဲ့ ရင်ထဲမှာ နှင်းတွေဝေသွားသလို ခံစားရမှာ သေချာပါတယ်။ သရက်သီးအပြင် သစ်သီးမျိုးစုံဖြင့် တွဲဖက်စားသုံးနိုင်ရန် ရောင်းချပေးသလို အပေါ်ဆုံးမှ နို့ပူတင်းအစား ရေခဲမုန့် အစရှိသည်တို့လည်း ဖြစ်နိုင်ပါတယ်။ တစ်ရွာတစ်ပုဒ်ဆန်း ဆိုသလို ဆိုင်အမျိုးမျိုးမှာလည်း ပြင်ဆင်ရောင်းချပုံ ကွာခြားနိုင်ပါသေးတယ်။ အဓိက တူညီမှု တစ်ခုကတော့ နွေရာသီမှာ ယုံခမ်းလမ်းရောက်ပြီဆိုလျှင် သရက်သီး စနိုးရေခဲခြစ်ကို အသည်းအသန် ပြေးစားမိကြတာပါပဲ။ လူတော်တော်များများ သိပြီးစားဖူးပြီးသား ဖြစ်တာကြောင့် အထူးတလည် မိတ်ဆက်ပေးမနေတော့ပဲ ကိုဗစ်တွေငြိမ်တဲ့အခါ သရက်သီး စနိုးရေခဲခြစ်လေး ပြေးစားပြီး အပူတွေငြိမ်းဖို့ သတိပေးနှိုးဆော်ပါရစေ။
ယခုမျှဝေပေးတဲ့ သရက်သီးစနိုးရေခဲခြစ် ဓာတ်ပုံလေးတွေ ကြည့်ရင်းလည်း တကယ်အပြင်မှာ စားရသလို အပူတွေ ပြေလျှော့နိုင်ကြပါစေရှင်။
Copy from
အေးသုမွန်ဟန်
#အစားတစ်လိုင်းထိုင်ဝမ်
