30/04/2024
https://www.facebook.com/share/p/AryAAjQQoEwvjcJE/?mibextid=ox5AEW
သူများလုပ်ရင်ခံမလာရစေနဲ့ ပြန်လုပ်နော်
ပြဿနာဖြစ်ရင်လိုက်ရှင်းမယ်ဆိုပြီး ပြောခဲ့ဖူးတဲ့ ကျွန်မ 😔
~~~~~~~~~~~~~~~
တစ်နေ့ သားငယ်လေးကျောင်းအကြိုအပြန် အိမ်ရှေ့လမ်းထောင့်မှာနေတဲ့ ကလေးနှစ်ယောက်ရန်ဖြစ်နေကြတာမြင်လို့ဝင်ဆွဲလိုက်ရတာ ကျွန်မလိုလူကြီးတောင် တော်တော်ခြေကုန်လက်ပန်းဖြစ်သွားပါတယ်။
ဘာဖြစ်ကြတာလဲလိုမေးတော့ တစ်ယောက်က
-သားခြေထောက်ကိုသူလာနင်းမိလို တွန်းလိုက်သလိုဖြစ်သွားတာ သူ ချော်လဲသွားတာ ဒူးပွန်းသွားလို သားကတောင်းပန်ပါတယ်ပြောတာကို လက်မခံဘဲ သားကိုလာထိုးလို့ ပြန်ထိုးတာတဲ့
နောက်တစ်ယောက်ကိုမေးတော့
-မေမေနဲ့ဖေဖေကမှာထားတယ် ကျောင်းကအပြန် အိမ်ကိုဒဏ်ရာနဲ့ပြန်လာရင်ပဲဖြစ်ဖြစ်
ရန်ဖြစ်လိုခံလာရတာပဲဖြစ်ဖြစ် ပြန်လာရင် ထပ်ရိုက်မယ်ဆိုလို့ သားသူ့ကို ပြန်ထိုးတာတဲ့လေ
မတော်တဆဖြစ်တာကို သူငယ်ချင်းက တောင်းပန်ပြီးပြီပဲ သားရယ် သူငယ်ချင်းကိုပြန်ထိုးဖို့အထိမှမလိုပဲ မဟုတ်ဘူးလား
ခုတော့ နှစ်ယောက်လုံး ပွန်းပဲ့ပြီး အနာတရတွေဖြစ်ကုန်ပြီ ဆိုတော့ ... သားပြန်မလုပ်ခဲ့ရင် ခံလာပြန်ပြီလားဆိုပြီး အိမ်ကျထပ်အရိုက်ခံရအုံးမှာတဲ့လေ
ကဲလာ...သားဖေဖေနဲ့ မေမေကို အန်တီလိုက်ပြောပေးမယ်နော်ဆိုပြီး ချော့မော့ကာအိမ်ပြန်ပို့ရင်း ကလေးအဖေနဲ့အမေကိုလည်း ကလေးနဲ့ ပတ်သတ်ပြီး သေချာရှင်းပြပေးခဲ့ရပါတယ်...
အော် တစ်ချိန်က ကျွန်မလည်း သူများလုပ်ရင်ခံမလာရစေနဲ့ ပြန်လုပ်နော် ပြဿနာဖြစ်ရင်လိုက်ရှင်းမယ်ဆိုပြီး ပြောခဲ့ဖူးပါတယ်...
တကယ်တော့ ဝေသန္တရာတောင် ကိုယ့်သားသမီးကိုထိတော့ အမျက်ထွက်မလိုဖြစ်သေးတာမို့ ကျွန်မတိုလိုပုတုစဉ်လူသားတွေက ကိုယ့်သားသမီးကိုထိလာရင် ကိုယ့်သားသမီးခံလာရရင်မကြိုက် ဒေါသထွက်တာ မှန်ရိုးဖြစ်ပေမယ့် မိဘရဲ့ အမှုမှတ်အမှတ်မဲ့ စကားတစ်ခွန်းဟာ နူးညံ့တဲ့ကလေးတိုရဲ့စိတ်ကို အရိုင်းဆန်သွားစေနိုင်တယ်ဆိုတဲ့အချက်လေးကို ကျွန်မသတိလက်လွတ်လေးဖြစ်သွားခဲ့ပါတယ်။
ခုနကလေးနှစ်ယောက်အဖြစ်ကိုမြင်မှ ပြောခဲ့ဖူးတဲ့ကျွန်မစကားအတွက် ကျွန်မနောင်တလည်းရ ရင်လည်းမောသွားလို့ သက်ပြင်းတိုးတိုးလေး ချလိုက်ပြီး
သားလေးကိုလည်း
ကျောင်းမှာသူငယ်ချင်းတွေက ရန်ပြုလာခဲ့ရင် ဆရာမကိုအရင်တိုင်ရမယ်နော်...
သူများကိုကိုယ်ထိလက်ရောက် ထိုးတာ ရိုက်တာမျိုးမလုပ်ရဘူး... အိမ်ရောက်ရင်လည်း မေမေ့ကိုသေချာပြန်ပြောပြ... မေမေကသားသားကိုရန်ပြုတဲ့ သူငယ်ချင်းတွေရှိတယ်ဆို သူတို့ဖေဖေမေမေတွေဆီကို သွားတိုင်ပြောပေးမှာ...ဒါဆို နောက်တစ်ကြိမ် သူတို့သားကို ရန်ပြုမှာမဟုတ်တော့ဘူး....
သူငယ်ချင်းအချင်းချင်း သူနိုင် ငါနိုင် ရန်ဖြစ်ရင် သူလည်းဒဏ်ရရာ ကိုယ်လည်းဒဏ်ရာရ ဖြစ်ကြမယ်... ခုနကိုကိုတွေကိုတွေ့တယ်မို့လား
ထစ်ကနဲဆိုလက်ပါတတ်ရင် ဘယ်သူကမှ မပေါင်းချင်တော့တဲ့ လူဆိုးကြီးဖြစ်သွားလိမ့်မယ်...
လူလိမ်မာတွေက ရန်ဖြစ်တဲ့အလုပ်ကိုမလုပ်ကြဘူး... ဒါမို့ရန်ဖြစ်တာမျိုးကို အတက်နိုင်ဆုံး ရှောင်ရမယ်နော်သားလေး ဆိုပြီး ကလေးနားဝင်အောင် ပြန်လည်ရှင်းပြပေးခဲ့ပါတော့တယ်။
❖ ❖ ❖ ❖ ❖ ❖ ❖ ❖
နူးညံ့ယဉ်ကျေးတဲ့ သားသားမီးမီးလေးတွေကို ပြုစုပျိုးထောင်ပေးနိုင်တဲ့ မိခင်ဖခင်ကောင်းများဖြစ်စေလိုသောစိတ်စေတနာဖြင့် ....
ချစ်တဲ့
True Learning
------------------------
True Learning မှ မိခင်တို့အတွက် ရင်တွင်းဖြစ်စာလေးများကို လွတ်လပ်စွာ share ပြီး တင်နိုင်ပါတယ်ရှင်။ တစ်ဆင့်ပြန် Copy လုပ်ပြီး မတင်ဖို့ မေတ္တာရပ်ခံပါရစေနော်။
#ကလေးစာပေ #ကလေးစာအုပ်
