31/07/2022
စာကိုစောစောစီးစီးရေးသင်စေချင်တဲ့မေမေတွေ မူကြိုကျောင်းက ဘာလို့စောစောရေးမသင်တာလဲဆိုတာ သိချင်တဲ့မေမေတွေ အဆုံးထိဖတ်ပေးပါနော်
အောက်က X-ray ပုံလေးကို တွေ့ဖူးမယ်ထင်ပါတယ်။
ဘယ်ဘက် အပေါ်က ၃နှစ်ကလေးရဲ့ လက်ပုံနဲ့ ညာဘက် အပေါ်က ၆-နှစ်ကလေးရဲ့ လက်ပုံမှာ အရိုးတည်ဆောက်ပုံဟာ တော်တော်လေး ကွာတာကို တွေ့ရမှာပါ။ ၃ နှစ်ကလေးရဲ့ လက်ကောက်ဝတ် အရိုးလေးတွေကို သေချာ ကြည့်ကြည့်ပါ။ အရိုးနုလေးတွေပဲ ရှိပါသေးတယ် ။ အရိုးလေးတွေ တခုနဲ့တခုကြား နေရာလေးတွေ လွတ်နေပါသေးတယ် ။ ဆက်ပြီး ကြီးထွားဖို့ရာ လိုအပ်နေပါသေးတယ်။ ညာဘက်အောက်က ၁၄-နှစ်ကလေးရဲ့ လက်နဲ့ ၆ နှစ်ကလေးရဲ့ လက်က အရိုးလေးတွေတောင် ကွာခြားနေပါသေးတယ်။
၃-၅ နှစ် မူကြိုအရွယ်လေးတွေဟာ ကျောင်းသားအရွယ် ကလေးတွေနဲ့ လူကြီးတွေလို စာရေးနိုင်၊ လုပ်နိုင်ဖို့ဆိုရင် လက်ကလေးတွေ သန်မာဖို့ အများကြီး လိုပါသေးတယ်။
တကယ်လို့ မူကြိုအရွယ်လေးတွေ စာမရေးချင်ဘူး၊ ပုံမဆွဲချင်ဘူးဆိုရင်လည်း အရမ်းကြီး တွန်းအား မပေးသင့်သေးပါဘူး။ စိတ်ညစ်စရာလည်း မလိုပါဘူး။တချို့ လုပ်နိုင်ပေမယ့် တချို့ မလုပ်နိုင်သေးပါဘူး။ သူတို့ အရွယ်ကြီးလာတာနဲ့အမျှ လက်က အရိုးကလေးတွေ ၊ ကြွက်သားလေးတွေကလည်း ပိုသန်လာတာမို့ သူ့ အချိန်တန်ရင် ရေးနိုင်၊ဆွဲနိုင်လာမှာပါ။
လက်ကလေးတွေ သန်မာဖို့ အားပေးတဲ့ ကစားနည်းနဲ့ လှုပ်ရှားမှုလေးတွေကို လုပ်ပေးရင် စာရေးဖို့ အဆင်သင့် ဖြစ်လာမှာပါ။ ဒါမှလည်း စာရေးရ ၊ ပုံဆွဲရ ၊ အရုပ်ဆက်ရတာ အတင်းဖိအားပေးပြီး လုပ်ရတာထက် ပိုပျော်စရာကောင်းလာမှာပါ ။ (လက်မနာမညောင်းတော့ဘူးပေါ့။)
လက်ကလေးတွေ သန်မာအောင်
ပုံဆွဲခြင်း၊ ဆေးရောင်ခြယ်ခြင်း( ခဲတံတုတ်တုတ် ၊ crayon တွေနဲ့ ပုံဆွဲတာ၊လက်ချောင်းတွေနဲ့ ဆေးခြယ်တာ ၊ ကိုင်ရတာ လွယ်ပြီး ကြီးတဲ့အရာတွေနဲ့ ဆေးခြယ်တာမျိုးဆို ပိုကောင်းပါတယ် ။
ဂျုံနဲ့ ကစားခြင်း။
စာရွက်တွေ ညှပ်ခြင်း၊ ဆုတ်ဖြဲခြင်း။ (ကလေးဆုတ်လို့ ညှပ်လို့ရတဲ့ စာရွက်တွေ ပေးထားဖို့ လိုပါတယ်။)
ကော်ကပ်ခြင်း။
အပေါက်ကလေးတွေ ဖောက်စေခြင်း။ (စာရွက်မှာ သွားကြားထိုးတံလိုမျိုးနဲ့ ဖောက်ပြီး ကစားကြည့်ပါ။)
မြေကြီးတူး၊ သဲတူးခြင်း။
အရွယ်စုံ ခွက်တွေနဲ့ ခြင်တွယ်ခြင်း။ ( ရေ ၊ ဆန်၊ သဲတွေနဲ့ ခြင်တာ၊ သယ်တာ ကစားနိုင်ပါတယ်။)
block တုံး၊Legoဆက်ခြင်း။
ပုတီးစေ့သီစေခြင်း။ ( ကတ္ထူပြားလေးမှာ အပေါက်လေးဖောက်ပြီး ကြိုးသွင်းစေတာ၊ပိုက်ကလေးတွေ ဖြတ်ပြီး သီစေတာမျိုး လုပ်နိုင်ပါတယ်။)
အသက်အလိုက် puzzles ဆက်ခြင်း။
အရွယ်စုံဘောလုံး ပစ်ခြင်း။ ဖမ်းခြင်း။
လက်နဲ့ ဖျစ်ညှစ်စေခြင်း။ (stress balls, ရေစိုနေတဲ့ ဖော့တုံး တို့ကို ဖျစ်ညှစ်ပြီး ဆော့ကစားနိုင်ပါတယ်။)
ကစားစရာများနဲ့ ကစားခြင်း။( ကားတွန်းတာ၊ အရုပ်ကောက်တာ ၊ ထားတာ၊ ဘောလုံးလှိမ့်တာတွေကို ကြည့်ပြီး ကလေးရဲ့ လက်ချောင်းသန်မာမှုကို သိနိုင်ပါတယ်)
