25/06/2024
“စိတ်ပျော်ချင်ရင် ရုပ်ကို ဂရုစိုက်”
🔳 ရုပ်နဲ့ စိတ်ဟာ အပြန်အလှန် ဆက်စပ်တဲ့သဘော ရှိတယ်။ စိတ်ပိုင်းဆိုင်ရာ အဆင်မပြေရင် ရုပ်ကိုပါ လာထိတယ်။ ရောဂါတွေ ဝင်လာတယ်။ ပုံစံက ညှိုးနွမ်းနေတယ်။ ကြည့်မကောင်းတော့ဘူး။ နောက်ပြီး စိတ်ထားမကောင်းရင် လူက အကြည်ဓါတ်ပျောက်တယ်။ စိတ်ပူလောင်နေရင်လည်း ထိုနည်းတူပဲ။
ရုပ်ပိုင်းဆိုင်ရာမှာ နေထိုင်မကောင်း ဖြစ်ရင်လည်း စိတ်ကို ထိတယ်။ ဒါကြောင့် အပြန်အလှန် ဆက်နွယ်မှု ရှိတယ် ဆိုတာ သတိရဖို့ လိုတယ်။
🔳 အဲဒီအတွက် ရုပ်လှချင်ရင် စိတ်ပျော်အောင်နေ။ စိတ်ပျော်ချင်ရင်လည်း ရုပ်လှအောင်နေ။
ရုပ်လှအောင် ဆိုတာ လွယ်အောင်ပြောလိုက်တာ။ အဓိကက ရုပ်ပိုင်းဆိုင်ရာနဲ့ ပတ်သက်တာတွေကိုလည်း ဂရုစိုက်ဖို့ လိုအပ်တယ်လို့ ဆိုလိုချင်တာပါ။ စိတ်အထားတတ်ဖို့၊ မှန်ကန်တဲ့ နှလုံးသွင်းမှုရှိဖို့၊ ပစ္စုပ္ပန်မှာ တည့်တည့်နေဖို့ စတဲ့ စိတ်ကို စိတ်နဲ့ကုစားတဲ့နည်းတွေအပြင် ရုပ်ပိုင်းဆိုင်ရာရဲ့ အကူအညီလည်း မဖြစ်မနေ လိုပါတယ်။
🔳 ချဲ့ပြောရရင်တော့ -
📌 ၁။ ကျန်းမာရေးနဲ့ ညီညွှတ်တဲ့ လူနေမှုပုံစံ (Healthy lifestyle)
အချိန်မှန် အိပ်မယ်။ အချိန်မှန် စားမယ်။ စားတဲ့အခါမှာလည်း အာဟာရ ပြည့်ပြည့်၀၀ စားမယ်။ အလွန်အကျွံ မစားဘူး။ မတည့်တာတွေ မစားဘူး။ ကိုယ်လက်လေ့ကျင့်ခန်း မှန်မှန်လုပ်မယ်။ တကူးတက အချိန်မပေးဖြစ်တောင် လမ်းမှန်မှန်လျှောက်မယ်။ Active ဖြစ်အောင် နေမယ်။ ဆေးလိပ်၊ အရက်၊ ကွမ်း ရှောင်မယ်။ မရှောင်နိုင်ရင် လျှော့မယ်။
အဲဒီအခါ လူက ပေါ့ပါးလာတယ်။ နေလို့ကောင်းလာတယ်။ ပိန်သွား၊ သွယ်သွားတဲ့အခါ ကိုယ့်ကိုယ်ကိုယ်လည်း ယုံကြည်မှု ရှိလာတယ်။ ဝတ်ရစားရတာ ပိုအဆင်ပြေလာတယ်။
📌 ၂။ တစ်ကိုယ်ရည် သန့်ရှင်းမှု (Personal hygiene)
ရေမှန်မှန်ချိုးမယ်။ ခံတွင်းသန့်ရှင်းရေး ဂရုစိုက်မယ်။ အနံ့အသက် ကောင်းအောင်နေမယ်။ ခြေသည်းလက်သည်း မှန်မှန်ညှပ်မယ်။ ဒါဆို စိတ်ကလည်း ကြည်လင်လာတယ်။
📌 ၃။ တစ်ကိုယ်ရည် သေသပ်သားနားမှု (Personal grooming)
ဆံပင်ပုံစံဆိုလည်း သပ်သပ်ရပ်ရပ်။ ယောက်ျားလေးတွေဆို နှုတ်ခမ်းမွှေး၊ မုတ်ဆိတ်မွှေး သေချာရိတ်မယ်။ Skincare လုပ်မယ်။ ကြည့်လိုက်တာနဲ့ သပ်သပ်ရပ်ရပ် ဖြစ်နေစေမယ်။
📌 ၄။ ဝတ်စားဆင်ယင်မှု (Outfit)
ကိုယ်နဲ့ လိုက်ဖက်တဲ့ပုံစံ ဝတ်စားမယ်။ သက်သောင့်သက်သာ ရှိပြီး ကိုယ့်ကိုယ်ကိုယ် ယုံကြည်မှုတက်စေမဲ့ ပုံစံမျိုးတွေ ဝတ်မယ်။
📌 ၅။ နေထိုင်တဲ့ ပတ်ဝန်းကျင် (Environment)
ဒါလည်း အရေးကြီးတယ်။ အိမ်ရှင်းတာ၊ အခန်းကို လှလှပပလေး ဖြစ်အောင် ထားတာ၊ ပစ္စည်းအထားအသို နေရာရွှေ့တာ စသဖြင့် လုပ်လို့ရတယ်။ စိတ်ကို ကြည်လင်ပြီး အပြောင်းအလဲ ဖြစ်သွားစေတယ်။
📌 ၆။ တစ်နေ့တစ်နေ့ လုပ်ဆောင်နေတဲ့ အပြုအမူတွေ (Daily Routine)
ဆိုရှယ်မီဒီယာပဲ တချိန်လုံး ထိုင်သုံးနေပြီး စိတ်ကြည်လင်ချင်တယ်တော့ လုပ်လို့မရဘူး။ သူနဲ့ ပတ်သက်တဲ့ အကြောင်းတွေပဲ ထိုင်တွေးနေပြီး Move on ချင်တယ်တော့ ပြောလို့မရဘူး။ တစ်ခုခုမှာ အာရုံစိုက်ထားတာ၊ လုပ်စရာတစ်ခုခု ရှိနေတာ၊ ပရဟိတလုပ်တာ၊ အားကစားလုပ်တာ စသဖြင့် ကောင်းတဲ့ အပြုအမူတွေတော့ လုပ်နေဖို့ လိုပါတယ်။
🔳 ရုပ်နဲ့စိတ်က အပြန်အလှန် ဆက်စပ်နေတာမို့ စိတ်ညစ်တဲ့အခါဆို အဲဒါတွေ ဘာတစ်ခုမှ မလုပ်ချင်ဘူး။ ရေလည်း မချိုးချင်ဘူး။ အလှလည်း မပြင်ချင်ဘူး။ အပြင်လည်း မထွက်ချင်ဘူး။ ကိုယ့်ကိုယ်ကိုယ်ရော၊ အိမ်ကိုပါ သန့်ရှင်းရေး မလုပ်ချင်ဘူး။
အဲဒီအခါ စိတ်တွေက ပိုညစ်ညူးပြီး သံသရာလည်နေရော။
ဒါကြောင့် ဒီသံသရာစက်ဝန်းကို ရုပ်ပိုင်းဆိုင်ရာကနေ စဖြတ်တောက်ကြည့်စေချင်တယ်။
🔳 အိမ်သန့်ရှင်းရေး ထလုပ်လိုက်။ ပစ္စည်းတွေ ဟိုပြောင်းဒီပြောင်း လုပ်လိုက်။ ရေထချိုး၊ ခေါင်းထလျှော်လိုက်။ အမွှေးအမျှင်တွေ ရိတ်လိုက်။ သပ်သပ်ရပ်ရပ် ဝတ်စားလိုက်။ သိသိသာသာ စိတ်တွေ ကြည်လင်လာလိမ့်မယ်။
ရေရှည်အတွက်ကိုလည်း Healthy Lifestyle မွေးမြူ။ ကိုယ်လက်လေ့ကျင့်ခန်း မှန်မှန်လုပ်။ ပြေးတာ၊ စက်ဘီးစီးတာ၊ ကြက်တောင်ရိုက်တာ တစ်ခုခုကို တစိုက်မတ်မတ်လုပ်။ တစ်နေ့တစ်နေ့ ကိုယ်အရောက်သွားနေတဲ့ ပန်းတိုင်တစ်ခု သတ်မှတ်ထား။
ဒါတွေက ရုပ်ပိုင်းဆိုင်ရာ အလုပ်တွေ ဆိုပေမဲ့ စိတ်အပေါ်ကိုလည်း သက်ရောက်မှု ရှိပါတယ်။ တစ်ခါတလေ ဘာကြောင့်မှန်းမသိ စိတ်တွေရှုပ်နေတာကစလို့ ကြီးကြီးမားမား စိတ်ပိုင်းဆိုင်ရာ ပြိုလဲမှုတွေအထိ အသုံးတည့်နိုင်တဲ့ နည်းစနစ်တွေလည်း ဖြစ်ပါတယ်။
ဒေါက်တာ ဖြိုးသီဟ
၂၃.၆.၂၀၂၄
,
