16/10/2025
🍀ငြိမ်းချမ်းတဲ့ဘဝဆိုတာ🍀
တကယ်တော့ ငြိမ်းချမ်းတဲ့ဘဝဆိုတာ ပြဿနာတွေကင်းပြီး ပူပန်သောကတွေလည်းမရှိ.. အရာရာပြီးပြည့်စုံချမ်းသာနေတဲ့ ဘဝတစ်ခုလို့ မဆိုလိုပါဘူး..။ လူရယ်လို့ဖြစ်လာကတည်းက ဒုက္ခဆိုတာပါလာပြီးသားဖြစ်ပါတယ်..။ အဆင်မပြေမှုတွေရှိမယ်..မမျှတမှုတွေနဲ့ကြုံရမယ်…အနာရောဂါတွေလည်းခံစားရမယ်..ကိုယ်ဖြစ်ချင်သလိုမဖြစ်..ကိုယ်မဖြစ်စေချင်တာတွေလည်းဖြစ်လာနိုင်သေးတာပဲ..။ ဒါကို ဘဝလို့ခေါ်ပါတယ်..။ဘယ်သူမှ အဆင်ပြေပြေ အေးအေးချမ်းချမ်းနဲ့ ဘာဆင်းရဲဒုက္ခမှ မရှိတဲ့သူရယ်လို့ မရှိနိုင်ပါဘူး..။ လူတိုင်းမှာ..ဒုက္ခကိုယ်စီနဲ့ အဆင်မပြေမှုကိုယ်စီနဲ့…သောကကိုယ်စီနဲ့ဖြစ်ပါတယ်..။
ငြိမ်းချမ်းတဲ့ဘဝဆိုတာ အဆင်မပြေမှုတွေကြားထဲမှာ..အဆင်ပြေအောင်ကြိုးစားရုန်းကန်ရင်း..ဒုက္ခတွေကို ညည်းညူရှောင်မပြေးဘဲ လက်ခံလိုက်ခြင်းနဲ့ …သောကတွေနေရာမှာ..စိတ်ကိုထားတတ်အောင် အတွေးတွေကို ငြိမ်းချမ်းတဲ့ဘက် နေရာချထားပေးတတ်ခြင်းပဲဖြစ်ပါတယ်..။
ပြဿနာတစ်ခုခု..အဆင်မပြေတာတစ်ခုခုနဲ့ ရင်ဆိုင်ရတဲ့အခါတိုင်း..ကိုယ်တွေးလိုက်တဲ့အတွေး…ကိုယ်ခံယူလိုက်တဲ့ ခံယူချက်နဲ့..အဲ့ဒိပြဿနာကို ကိုယ်ဘယ်လိုတုံ့ပြန်သလဲဆိုတဲ့ စိတ်နေသဘောထားပေါ်မူတည်ပြီး..သောကတွေကြားမှာဗျာများတတ်သူနဲ့…ငြိမ်းချမ်းစွာနေနိုင်သူရယ်လို့..ကွာခြားသွားတာဖြစ်ပါတယ်..။
ဥပမာဆိုပါတော့…ကိုယ့်မှာအနာရောဂါဝေဒနာတစ်ခုခု ခံစားရပြီဆိုပါတော့…။ သောကဖြစ်တတ်သူက ကိုယ့်ကိုယ်ကိုယ် သနားစရာကောင်းတဲ့ victim နေရမှာထားလိုက်ပြီး…ဘာကြောင့် ငါ့မှာမှ ဒီရောဂါဖြစ်ရတာလဲ…ငါ့လောက်ကံဆိုးတဲ့သူ မရှိတော့ပါလား…ငါ့ဘဝတော့သွားပါပြီ..စသဖြင့် ဒီအကြောင်းကိုပဲ မကျေနပ်တဲ့စိတ်..လက်မခံနိုင်တဲ့စိတ်..ငြင်းဆန်တဲ့စိတ်တွေနဲ့..ထပ်တလဲလဲတွေးလို့မဆုံးတော့ပါဘူး..။ အတွေးတစ်ချက်တိုင်းက ဆူးတစ်ချောင်းလို သူ့နှလုံးသားမှာ ဆူးချက်များစွာ နေရာလပ်မကျန်အောင် တွေးပြီး မခံမရပ်နိုင်အောင် နာကျင်လို့မဆုံးနိုင်အောင်ဖြစ်ရပါတယ်..။ သူ့ဘဝတစ်ခုလုံးဟာ..အမှောင်ထဲမှာနစ်မြုပ်လို့နေပါတယ်..။
ဒီအဖြစ်ကိုပဲ ငြိမ်းချမ်းအောင်တွေးတတ်သူကျတော့…ပထမဆုံး ကိုယ့်မှာဖြစ်နေတာကို..အရှိအတိုင်းပဲ လက်ခံလိုက်ပါတယ်..။ ပြီးတော့ မှန်ကန်စွာ နှလုံးသွင်းဆင်ခြင်ပါတယ်..။ ဟုတ်တယ်..ငါ့မှာ ဒီရောဂါတော့ဖြစ်လာပြီ..ခန္ဓာရှိမှတော့ ဝေဒနာဆိုတာ ရှိရမှာပဲလေ..။ ဒီရောဂါက ငါတစ်ယောက်တည်းမှာ ဖြစ်တတ်တာမျိုးမှမဟုတ်ဘဲ…။ သူများတွေလည်းဖြစ်တတ်တာပဲ..။ခုမဖြစ်လည်း တစ်နေ့နေ့တစ်ချိန်ချိန်တော့ ဖြစ်နိုင်သေးတာပဲ..။ ခန္ဓာကိုယ်ဆိုတာ…အချိန်မရွေး ဖောက်ပြန်တတ်တဲ့ အစိုးမရတဲ့… တရစပ်ဖြစ်ပျက်ပြောင်းလဲနေတဲ့ သဘာဝတရားတစ်ခုပဲ…။ ဒီတာ့ ဒီဝေဒနာကြောင့်တော့…ငါ့စိတ်မှာ မနာစေရဘူး…ခန္ဓာပဲနာပါစေ..စိတ်မနာအောင်နေမယ်..စတဲ့ မှန်ကန်သင့်တင့်တဲ့အတွေးနဲ့ နှလုံးသွင်းမှန်ကန်အောင် ကြိုးစားပါတယ်..။
ရောဂါအတွက်..ဆေးကုသမှုခံယူမယ်…ဘဝနေထိုင်ပုံနေထိုင်နည်းတွေကို ပြုပြင်ပြောင်းလဲမယ်…။ အတတ်
နိုင်ဆုံး ကိုယ်စိတ်မဆင်းရဲရအောင်..စိတ်မှာမနာကျင်အောင်နေမယ်…။ ကိုယ့်စိတ်ကို သက်သာငြိမ်းချမ်းစေမယ့် တရားလေးတွေနာမယ်..။ ကိုယ့်အပေါ် ဂရုတစိုက် ဖေးမကြင်နာတတ်တဲ့ မိတ်ဆွေသူငယ်ချင်းတွေနဲ့ဆုံမယ်..စကားပြောမယ်..သူတို့ပြောတာကို နားထောင်မယ်..အကြံဥာဏ်ပေးသမျှကို တန်ဖိုးထားစွာ ခံယူမယ်..။ ရယ်မောစရာလေးတွေပြောပြီး ရယ်မောဖို့ ကြိုးစားမယ်..။ ရောဂါအကြောင်း မတွေးမိအောင် မေ့မေ့ပျောက်ပျောက်နေမယ်…။နေရောင်ခြည်နွေးနွေးလေးဆီက အနွေးဓါတ်ကို ခံယူမယ်..။ ကိုယ့်စိတ်ကို ငြိမ်းချမ်းကြည်လင်စေမယ့် နေရာလေးတွေကို ရှာဖွေဖန်တီးထားမယ်…။ စိတ်နှလုံးကြည်လင်အေးချမ်းစေဖို့ ပုံမှန်တရားထိုင်မယ်..။ စာအုပ်လေးတွေဖတ်မယ်..။ ကိုယ့်ကြောင့် တစ်ပါးသူတွေကို စိတ်ပူပန်သောက မဖြစ်စေရအောင်…အကြည်ဓါတ်ကလေးရှိအောင်နေမယ်..။ ကောင်းတဲ့အတွေးလေးတွေပဲတွေးမယ်..။ အဆင်မပြေတာလေးတွေ..အခက်အခဲလေးတွေကို ရယ်မောနိုင်အောင်ကြိုးစားမယ်…။ အဲ့ဒိလိုစိတ်ထားမျိုးရှိတဲ့သူရဲ့ဘဝဟာ…ငြိမ်းချမ်းတဲ့ဘဝပါပဲ..။ ငြိမ်းချမ်းတဲ့ဘဝဆိုတာ ဘာနဲ့မှ လဲလှယ်ယူလို့မရနိုင်တဲ့..ငွေနဲ့လည်း ပေးဝယ်လို့ မရတဲ့…ကိုယ်တိုင်သာ ဖန်တီးနိုင်စွမ်းရှိတဲ့ ဘဝဖြစ်ပါတယ်..။
အပူတွေကြားထဲမှာ ငြိမ်းအေးအောင်နေမယ်..။ နာကျင်မှုတွေရှိရင်တောင်..ကိုယ့်စိတ်မှာ မနာအောင်နေမယ်..သောကအတွေးတွေအစား..ဒါကလည်းအမြဲကြီးမဟုတ်ပါဘူးလေ…အချိန်တန်ရင် ပြောင်းလဲသွားမှာပဲဆိုတဲ့အတွေးနဲ့ တုံ့ပြန်မှုတွေ မလုပ်မိအောင်နေမယ်…။ဖြစ်လာသမျှ အရာရာကို လက်ခံမယ်…ဆိုတဲ့စိတ်ထားမျိုးနဲ့ရင်ဆိုင်ဖြတ်သန်းရင်း…ဟိုးအဝေးကြီးဆီထိ မတွေးဘဲ…တစ်နေ့စာချင်း တစ်ရက်စာချင်းကို အကောင်းဆုံး ရင်ဆိုင်ကျော်ဖြတ်နိုင်ဖို့ ကြိုးစားနေခြင်းဟာ…ငြိမ်းချမ်းတဲ့ဘဝကို ထုဆစ်ပုံဖော်နေခြင်းပဲဖြစ်ပါတယ်…။
ဆုံးရှုံးမှုတွေ..နာကျင်စရာတွေနဲ့ရင်ဆိုင်နေရပါစေဦးတော့…ဖြစ်လာသမျှကို လက်ခံပြီးအကောင်းဆုံးဖြစ်အောင် ကြိုးစားနေထိုင်နေတဲ့ဘဝဟာ..ငြိမ်းချမ်းတဲ့ဘဝဖြစ်ပါတယ်…။ အခက်အခဲတွေကြားထဲကနေ အပြုံးမပျက်ဘဲ ခေါင်းလေးမော့ပြီး တစ်လှမ်းချင်း ဖြေးဖြေးမှန်မှန် လျှောက်လှမ်းနေခြင်းဟာ..ငြိမ်းချမ်းတဲ့လမ်းကနေ လျှောက်လှမ်းနေခြင်းလည်းဖြစ်ပါတယ်….။
#လွန်းထားထား
#ငြိမ်းချမ်းတဲ့ဘဝဆိုတာ
