06/07/2024
ဂရုစိုက်ကြပါနော် 😍
🧼 သန့် ၄ သန့်နဲ့ ကာလဝမ်းရောဂါ 🫧
ဟိုဒီနားမှာ ဝမ်းပျက်ဝမ်းလျှော case တွေ များလာတာမို့ Page Messenger မှာ မိဘတွေအပူကို ပြန်ကြားရပါတယ်။
တကယ်ပဲ ကာလဝမ်းရောဂါ Cholera Outbreak ဖြစ်နေတာလား?
ကူးစက်မြန်တယ်ဆို ဘယ်လိုကာကွယ်ရမလဲ?
အမေးများတာမို့ အားလုံးအတွက် ဆောင်းပါးရေးလိုက်ပါတယ်ရှင်။
🦠 ကာလဝမ်းရောဂါအကြောင်း ဆောင်းပါးတွေလည်း သူ့ထက်ငါ ရေးပေးနေကြတာမို့ သူ့ရဲ့ လက္ခဏာတွေကို ဖေဖေမေမေတို့အနေနဲ့ အကျဉ်းရုံးလောက် သိပြီး ဖြစ်ပါလိမ့်မယ်။ မသိသေးတဲ့ မိဘတွေအတွက် ပြောပြရမယ်ဆို
💩 ညှီစို့စို့အနံ့ရှိပြီး ဆန်ဆေးရည်ရောင်ဝမ်းကို ပမာဏများများ အကြိမ်ရေများများသွားခြင်း
🤮 ပျို့အန်ခြင်း
💦 ရေဓာတ်ဆုံးရှုံးခြင်း
- ခါတိုင်းထက် ပိုအီမယ်
- ရေအငမ်းမရတောင်းမယ်
- နုန်းချိနေမယ်
- မျက်တွင်းချိုင့်မယ်
- ငိုပေမယ့် မျက်ရည်မထွက်တော့ဘူး
- ဆီးသွားနည်းမယ်
🦵🏻 ကြွက်တက်ခြင်း စတာတွေ ကြုံရနိုင်ပါတယ်။
🦠 ကာလဝမ်းရောဂါ ဟုတ်မဟုတ် သေချာဖို့ ဝမ်းစစ်မှ သိနိုင်မယ်။ ဓာတ်ခွဲခန်းမှာ ခွဲခြမ်းစိတ်ဖြာရမှာမို့ အချိန်လိုတယ်။ Outbreak ဖြစ်ပြီဟေ့ဆို သက်ဆိုင်ရာက ထုတ်ပြန်မှာမို့ မလိုအပ်ဘဲ စိတ်ပူနေမယ့်အစား သန့် ၄သန့်နဲ့ ကာကွယ်လို့ ရတယ်။ 🧫
💦 ရေသန့်ရမယ်
- အသင့် သောက်ရေသန့်ဘူး မရနိုင်ရင် အနည်းဆုံး ၃မိနစ်ပွက်"ဆူတဲ့ထိ ကြိုချက်ပြီးမှ သောက်ပါ။
- အိမ်သုံးရေကို ကလိုရင်းဆေးပြားခပ်ပါ။
🍲 အစာသန့်ရမယ်
- ယင်နားစာ ရှောင်ပါ။
- အပြင်စာ မစားနဲ့။
- သေချာကျက်အောင်ချက်ပြီး မစားခင် နွှေးပါ။
🧼 လက်သန့်ရမယ်
- ရောဂါသည်ရဲ့ ဝမ်းနဲ့ အန်ဖတ်ကတစ်ဆင့် ကူးနိုင်တာမို့ ထိမိရင် လက်ကို ဆပ်ပြာနဲ့ စင်အောင် ဆေးရမယ်။
- အစာမစားခင်နဲ့ ဝမ်းသွားပြီးတိုင်း လက်ကို သေချာဆေးပါ။
- ရေနဲ့ဆပ်ပြာ ခဲယဉ်းရင် လက်သန့်ဆေးရည် သုံးလို့ ရပါတယ်။
🚽 အိမ်သာသန့်ရမယ်
- ယင်လုံအိမ်သာ သုံးပါ။
- သန့်ရှင်းရေး ဂရုစိုက်ပေးပါ။
- ရေအရင်းအမြစ် (မြစ်၊ ချောင်း၊ ကန်) မှာ အညစ်အကြေး မစွန့်ရဘူး။
ဒီ သန့် ၄သန့်ကို လိုက်နာမယ်ဆို ကာလဝမ်းရောဂါတင်မကဘဲ တခြားသော မိုးရာသီမှာ အဖြစ်များတဲ့ ပြင်းထန်ဝမ်းပျက်ရောဂါ အထက်လန်အောက်လျှောပြဿနာတွေပါ ကာကွယ်နိုင်ပါလိမ့်မယ်။
💩 ဝမ်းရောဂါဖြစ်လာပြီဆို ကုသမှုရဲ့အသက်က " ဓာတ်ဆား " ပါပဲ။ ကမ္ဘာ့ကျန်းမာရေးပဖွဲ့အစည်း WHO ရဲ့ နည်းအတိုင်း ထုတ်ထားတဲ့ ဓာတ်ဆားရေ ဖြစ်ရပါမယ်။ သီးစုံဓာတ်ဆား လုံးဝ မရပါဘူး။ အညွှန်းအတိုင်း တိတိကျကျဖျော်ပြီး ဝမ်းသွားသလောက် အန်သလောက် ပမာဏအတိုင်း ကလေးကို ပြန်တိုက်ပေးပါ။ ပြီးတာနဲ့ နီးစပ်ရာ ကျန်းမာရေးဌာန (ဆေးရုံ/ခန်း) မှာ တိုင်ပင်ပြီး ကုသမှုခံယူပါ။
ကာလဝမ်းရောဂါ သေချာခဲ့ရင် သက်ဆိုင်ရာက ထုတ်ပြန်ကြေငြာပြီး ညွှန်ကြားပါလိမ့်မယ်။ မိုးရာသီကာလဟာ ဝမ်းပျက်ဝမ်းလျှောရောဂါ ပုံမှန်ထက် အဖြစ်များနေကြပါ။ ဒါကြောင့်မို့ ဖေဖေမေမေတို့ အစိုးရိမ်မလွန်စေဖို့ ကာကွယ်နည်းနဲ့ ကုသနည်းကို လိုတိုရှင်းပဲ ရေးပေးလိုက်ရပါတယ်ရှင်။
⚠️ Copy ယူပြီး ပြန်တင်ခြင်း ခွင့်မပြုပါဘူး။
✅ လွတ်လပ်စွာ Shareလို့ ရပါတယ်။
ဆန္ဒမွန်ဖြင့်
ကလေးတို့ရဲ့ဆရာဝန်
ဒေါက်တာရွှေစင်ဝင်း 👩🏻⚕️
