19/05/2022
စက်ဘီးစီးခြင်းရဲ့ အကျိုးကျေးဇူး ၁၂ ချက် နှင့် ဘေးကင်းရေး အကြံပြုချက်များ
--------------------------------------------------------
စက်ဘီးစီးခြင်းသည် အကျိုးကျေးဇူးများစွာ ပေးစွမ်းနိုင်သော အေရိုးဗစ်လေ့ကျင့်ခန်းတစ်ခုဖြစ်ပါတယ်။ တစ်ဦးချင်းဆီ လုပ်နိုင်တဲ့ပေါ်မူတည်ပြီး ပြင်းထန်မှုကို လိုသလိုချိန်ညှိနိုင်တဲ့အတွက် အရွယ်အမျိုးမျိုးနဲ့လဲ သင့်တော်ပါတယ်။ စက်ဘီးစီးခြင်းကို လိုရာသွားနိုင်ဖို့ စီးနိုင်သလို၊ ကျန်းမာရေးအတွက် သို့မဟုတ် အပျော်တမ်းအနေနဲ့လဲ စီးနိုင်တယ်။ စက်ဘီးစီးခြင်းသည် သင့်အားတက်ကြွနေစေမည့် လေ့ကျင့်ခန်းတစ်ခုလဲ ဖြစ်ပါတယ်။ ရုပ်ပိုင်းဆိုင်ရာရော စိတ်ပိုင်းဆိုင်ရာရော ကျန်းမာတဲ့ နေထိုင်မှုပုံစံကို ပုံဖော်ပေးနိုင်ပါတယ်။
စက်ဘီးစီးခြင်းက သင့်ရဲ့ ကြံ့ခိုင်မှုနှင့် ကျန်းမာရေးကို မြှင့်တင်ပေးနိုင်သည့် နည်းလမ်းအချို့ကိုသိရှိရန် ဆက်ဖတ်လိုက်ရအောင်....
စက်ဘီးစီးခြင်းရဲ့ အကျိုးကျေးဇူးများ
၁။ စက်ဘီးစီးခြင်းက ကိုယ်အလေးချိန်ကျအောင် ကူညီပေးနိုင်ပါတယ်။
ပုံမှန် စက်ဘီးစီးပေးခြင်း၊ အထူးသဖြင့် ပြင်းပြင်းထန်ထန် စက်ဘီးစီးခြင်းက သင့်ခန္ဓာကိုယ်ရဲ့ အဆီပမာဏကို လျှော့ချပေးပြီး ကျန်းမာသော ကိုယ်အလေးချိန်ကို ထိန်းညှိပေးပါတယ်။ ပုံမှန်စက်ဘီးစီးတဲ့ လေ့ကျင့်ခန်းကို လုပ်ပေးခြင်းဖြင့် သင်၏ဇီဝဖြစ်ပျက်မှုနဲ့ ကြွက်သားတည်ဆောက်မှုကို တိုးစေပြီး အနားယူနေချိန်မှာတောင်မှ ကယ်လိုရီတွေကို ပိုမိုလောင်ကျွမ်းစေနိုင်ကြောင်း လေ့လာမှုများအရ တွေ့ရှိထားပါတယ်။
၂။ စက်ဘီးစီးခြင်းက သင့်ခြေထောက်တွေကို သန်မာစေပါလိမ့်မယ်။
စက်ဘီးစီးခြင်းဟာ သင့်ခန္ဓာကိုယ်အောက်ပိုင်းရှိ လုပ်ဆောင်မှုအားလုံးကို တိုးတက်စေပြီး အဆစ်များကို အရမ်းအားသုံးလုပ်စရာမလိုပဲ ခြေထောက်ရှိ တံကောက်ကြောများနှင့် ခြေသလုံးကြွက်သားများကို သန်မာစေသည်။ သင့်ခြေထောက်များ ပိုမိုသန်မာလာစေဖို့နဲ့ စက်ဘီးစီးနိုင်စွမ်းကို မြှင့်တင်ဖို့အတွက် Squat ထိုင်ထလုပ်ခြင်း၊ Leg Press နဲ့ Lunges အစရှိသဖြင့် အလေးမလေ့ကျင့်ခန်းများကို တစ်ပတ်လျှင် အကြိမ်အနည်းငယ် ပြုလုပ်ကြည့်ပါ။
၃။ စက်ဘီးစီးခြင်းသည် အခုမှ စလုပ်မယ့်သူများအတွက် အဆင်ပြေစေပါတယ်။
စက်ဘီးစီးရတာဟာ မခက်ခဲပဲ ရိုးရှင်းပါတယ်။ တကယ်လို့ mountain bike ကဲ့သို့သော စက်ဘီးမျိုးစီးရန် အခက်အခဲရှိပါက၊ ရိုးရိုးစက်ဘီးကိုလဲ ရွေးချယ်နိုင်ပါတယ်။ လေ့ကျင့်ခန်းအခုမှ စလုပ်မယ့်သူမျိုး၊ ဒဏ်ရာရလို့ နားနေရာမှ ပြန်လည်လှုပ်ရှားလိုသူမျိုး ဆိုပါက ပြင်းထန်မှုနည်းသော စက်ဘီးစီးတာမျိုး လုပ်နိုင်ပါတယ်။ ပိုမိုကျန်းမာ ကြံ့ခိုင်လာတာနဲ့အမျှ ပြင်းထန်မှုအားကို တိုးမြှင့်နိုင်ပါတယ် ဒါမှမဟုတ် ဖြေးဖြေးအေးအေးပဲ စီးမယ်ဆိုလဲ သက်သက်သာသာ စီးနေနိုင်ပါတယ်။
၄။ စက်ဘီးစီးခြင်းက ကိုလက်စထရောကို ကျစေနိုင်ပါတယ်။
စက်ဘီးစီးခြင်း၏ အကျိုးသက်ရောက်မှုများထဲတွင် ကိုလက်စထရောအဆင့်ကို တိုးတက်ကောင်းမွန်စေပြီး သင့်နှလုံးသွေးကြော ကျန်းမာရေးကို မြှင့်တင်ပေးနိုင်ကာ လေဖြတ်ခြင်းနဲ့ နှလုံးဖောက်နိုင်ခြေကို လျှော့ချပေးနိုင်ပါတယ်။ လေ့လာမှု 300 ၏ သုံးသပ်ချက်တစ်ခုအရ စက်ဘီးစီးခြင်းသည် ကိုလက်စထရောအပေါ် သက်ရောက်မှုရှိသည်။ ကောင်းသောကိုလက်စထရော (HDL) နဲ့ မကောင်းသောကိုလက်စထရော (LDL) ဆိုပြီး ၂မျိုး ရှိပါတယ်။ စက်ဘီးစီးခြင်းဟာ LDL ကိုလျှော့ချပေးရုံမကပဲ HDL Level ကိုမြှင့်တင်ပေးနိုင်ပါတယ်။
၅။ စက်ဘီးစီးခြင်းသည် စိတ်ကျန်းမာရေးနှင့် ဦးနှောက်စွမ်းအားကို တိုးစေသည်။
စက်ဘီးစီးခြင်းဟာ စိတ်ဖိစီးမှု၊ စိတ်ဓာတ်ကျခြင်း သို့မဟုတ် စိုးရိမ်ပူပန်မှုတို့ကို သက်သာစေနိုင်သည်။ စက်ဘီးစီးသည့်အခါ လမ်းပေါ်တွင် အာရုံစိုက်ခြင်း၊ စက်ဘီးစီးခြင်းအား အာရုံစိုက်နေရခြင်းက လက်ရှိအခိုက်အတန့်ရဲ့ အာရုံစူးစိုက်မှုနဲ့ သတိရှိမှုကို တိုးတက်စေရန် ကူညီပေးပါတယ်။ ၎င်းသည် သင့်တစ်နေ့တာ၏ စိတ်ပိုင်းဆိုင်ရာ တင်းမာမှုများမှ သင့်အာရုံကို ဖယ်ထုတ်ရန် ကူညီပေးပါတယ်။ အပြင်မှာ စက်ဘီးစီးတာက သက်ကြီးရွယ်အိုတွေအတွက် သိမြင်နိုင်စွမ်းနဲ့ သုခချမ်းသာကို တိုးတက်စေတယ်လို့ လေ့လာမှုတစ်ခုက တွေ့ရှိခဲ့ပါတယ်။
ထုံထိုင်းနေတာမျိုး သို့မဟုတ် ဦးနှောက်တက်ကြွစွာအလုပ်မလုပ်သလို ခံစားနေရပါက၊ အနည်းဆုံး 10 မိနစ်ခန့် စက်ဘီးနင်းကြည့်လိုက်ပါ။ လေ့ကျင့်ခန်းလုပ်ခြင်းသည် သင့်ခန္ဓာကိုယ်တွင်းရှိ Endorphin များထွက်ရှိမှုကို မြှင့်တင်ပေးတဲ့အတွက်ကြောင့် စိတ်ဖိစီးမှုကို လျော့ကျစေနိုင်သည်။
အပေါ်မှာပြောထားတဲ့ အချက်ကတော့ အပြင်ထွက်ပြီး လေ့ကျင့်ခန်းလုပ်ခြင်း (စက်ဘီးစီးခြင်း) ကသာ ယင်းအကျိုးသက်ရောက်မှုများကို ရရှိစေနိုင်မှာပါ။
ပုံမှန်စက်ဘီးစီးပေးခြင်းသည် ကိုယ့်ကိုကိုယ် ပိုမိုယုံကြည်မှုရှိပြီး ပိုပြီး ရောင့်ရဲနိုင်မည်ဖြစ်ပါသည်။
၆။ စက်ဘီးစီးခြင်းသည် ကင်ဆာရောဂါရှိသူများကို ကူညီပေးနိုင်သည်။
စက်ဘီးစီးခြင်းသည် ကင်ဆာရောဂါရှိနေပါက သို့မဟုတ် ပြန်လည် ကောင်းမွန်ပျောက်ကင်းစလူများအတွက် အံ့သြဖွယ်ကောင်းလောက်အောင် အကျိုးကျေးဇူးပြုပါတယ်။ သို့သော်လည်း ကင်ဆာလူနာများစွာသည် ကုသမှုကာလအတွင်းမှာ စွမ်းအင်နည်းပါးပြီး နာကျင်မှုကို ခံစားရသည့်အတွက်ကြောင့် ကိုယ့်ကို စောင့်ရှောက်ပေးနေသူရဲ့ အကူနဲ့လုပ်ဆောင်တာမျိုး၊ ကိုယ့်ခန္ဓာကိုယ်ကို သတိနဲ့နားထောင်ပြီး လေ့ကျင့်ခန်းလုပ်မှသာ စိတ်ချရမည်ဖြစ်ပါသည်။
စက်ဘီးစီးခြင်းက သင့်ကို ပိန်ပိန်ပါးပါးနဲ့ ကြံ့ခိုင်နေအောင် ကူညီပေးနိုင်ပြီး ရင်သားကင်ဆာ အပါအဝင် ကင်ဆာအမျိုးအစားအချို့ ဖြစ်နိုင်ခြေကို လျှော့ချပေးနိုင်ပါတယ်။
2019 ခုနှစ်မှ သုတေသနပြုချက်များအရ သင့်တွင် ရင်သားကင်ဆာရှိနေပါက တက်တက်ကြွကြွ နေထိုင်ခြင်းသည် ပင်ပန်းနွမ်းနယ်ခြင်း အပါအဝင် ကင်ဆာကုသမှု၏ ဘေးထွက်ဆိုးကျိုးများကို လျော့ချနိုင်ပြီး သင့်ဘဝတစ်ခုလုံး၏ အရည်အသွေးကို တိုးတက်စေပါတယ်။
၇။ စက်ဘီးစီးခြင်းက သင့်မနက်ခင်းကို အကောင်းမြင်မှုနဲ့ အစပြုနိုင်ဖို့ ပေးစွမ်းနိုင်ပါတယ်။
စက်ဘီးစီးခြင်းကဲ့သို့ ကျန်းမာရေး လှုပ်ရှားမှုတစ်ခုခုဖြင့် သင့်တစ်နေ့တာကို အစပြုခြင်းသည် သွေးလည်ပတ်မှုကို မြှင့်တင်ပေးခြင်းအားဖြင့် သင့်ကို နိုးကြားစေပြီး သင့်တစ်နေ့တာကို ပြီးမြောက်အောင်မြင်စေမည့် ခံစားချက်ဖြင့် စတင်စေပါသည်။ တစ်နေ့ချင်းတစ်နေ့ချင်းနဲ့ ကောင်းမွန်တဲ့အလေ့အကျင့်ကို လုပ်သွားခြင်းဖြင့် ကျန်းမာပြီး အပြုသဘောဆောင်တဲ့ ရွေးချယ်မှုတွေ ပြုလုပ်ဖို့ ပိုစိတ်ဆန္ဒရှိလာနိုင်ပါတယ်။
နံနက်ခင်းမှာ စက်ဘီးစီးခြင်းလိုမျိုး အားကစားတစ်ခုခုကို နည်းနည်းပြင်းပြင်းထန်ထန်ပြုလုပ်ခြင်းက အဆီတွေလောင်ကျွမ်းစေကာ ခံနိုင်ရည်စွမ်းဆောင်မှုကို မြှင့်တင်ပေးပြီး တစ်နေ့တာလုံးရဲ့ စွမ်းအင်နှင့် ဇီဝဖြစ်ပျက်မှုအဆင့်ကို မြှင့်တင်ပေးနိုင်ပါတယ်။
၈။ စက်ဘီးစီးခြင်းသည် ဆေးဘက်ဆိုင်ရာ အခြေအနေများကို တားဆီးထိန်းချုပ်ရာတွင် အထောက်အကူ ဖြစ်စေပါတယ်။
သင့်အနေဖြင့် ကျန်းမာရေးဆိုင်ရာ စိုးရိမ်ပူပန်မှုများ မဖြစ်ပေါ်စေရန် သို့မဟုတ် လက်ရှိအခြေအနေများကို ကိုင်တွယ်နိုင်ဖို့က ပုံမှန်လေ့ကျင့်ခန်းလုပ်ရန် လိုအပ်ပါတယ်။ ပုံမှန်စက်ဘီးစီးခြင်းသည် အထိုင်များသော လူနေမှုပုံစံကို ရှောင်ရှားရန် နည်းလမ်းတစ်ခုဖြစ်ပြီး၊ ၎င်းနောက်ကပါလာနိုင်သော ကျန်းမာရေးပြဿနာများကို ရှောင်ရှားပေးပါတယ်။
ပုံမှန်လေ့ကျင့်ခန်းလုပ်ခြင်းသည် လေဖြတ်ခြင်း၊ နှလုံးဖောက်ခြင်းနဲ့ သွေးတိုးခြင်း ကဲ့သို့သော နှလုံးဆိုင်ရာ ပြဿနာများကို ကာကွယ်နိုင်ပါတယ်။ စက်ဘီးစီးခြင်းသည် အမျိုးအစား 2 ဆီးချိုရောဂါကို ကာကွယ်ရာတွင်လည်းကောင်း၊ ကုသနေစဉ်မှာသော်လည်းကောင်း ကူညီပေးနိုင်ပါတယ်။
အမှန်တော့၊ မကြာသေးမီက သုတေသနပြုချက်များအရ ပုံမှန်စက်ဘီးစီးခြင်းသည် ဆီးချိုရောဂါရှိသူများ၏ သေဆုံးမှုနှုန်းကို 24% လျှော့ချနိုင်ပြီး အနည်းဆုံး 5 နှစ်အထိ ဆက်လက်လုပ်ဆောင်ပါက သေဆုံးနှုန်း 35% အထိကို လျှော့ချနိုင်သည်ဟု အကြံပြုထားသည်။
၉။ စက်ဘီးစီးခြင်းသည် ပတ်ဝန်းကျင်နှင့် လိုက်လျောညီထွေရှိစေပါသည်။
စက်ဘီးစီးလို့ရမယ့် အချိန်တိုင်း စက်ဘီးစီးခြင်းဖြင့် သင်၏ကာဗွန်ဒိုင်အောက်ဆိုဒ်ထုတ်လွှတ်မှုကို လျှော့ချပါ။ ဥရောပတွင် မကြာသေးမီက သုတေသနပြုချက်များအရ တစ်နေ့လျှင် တစ်ကြိမ် ကားဖြင့်သွားမည့်အစား စက်ဘီးဖြင့်သွားခြင်းသည် ကာဗွန်ဒိုင်အောက်ဆိုဒ်ထုတ်လွှတ်မှုကို 67% လျော့နည်းစေကြောင်း တွေ့ရှိခဲ့သည်။
စက်ဘီးစီးခြင်းသည် ယာဉ်ကြောပိတ်ဆို့ချိန် ဘယ်မှသွားမရပဲ ထိုင်ပြီးအချိန်ကုန်သွားခြင်းအတွက် အကောင်းဆုံး ဖြေရှင်းနည်းတစ်ခုဖြစ်ပါတယ်။ လမ်းလျှောက်သွားဖို့ ဝေးတဲ့နေရာကိုသွားဖို့ရန် ကားလဲမစီးချင်သည့်အခါတွင် စက်ဘီးဟာ အထူးအသုံးဝင်ပါတယ်။
နောက်ထပ်ကောင်းတဲ့တစ်ချက်ကတော့ လူစည်ကားတဲ့ နေရာတွေမှာ ကားပါကင်နေရာအတွက် တိုက်ပွဲဝင်စရာမလိုတော့ပါ။
၁၀။ စက်ဘီးစီးခြင်းသည် ဟန်ချက်၊ ကိုယ်ဟန်အနေအထားကို တိုးတက်စေသည်။
သင့်ခန္ဓာကိုယ်ကို တည်ငြိမ်စေပြီး သင့်စက်ဘီးကို မတ်တတ်ထားခြင်းဖြင့်၊ ဟန်ချက်ညီအောင်ထိန်းနိုင်လာပြီး ကိုယ်နေဟန်ထားကိုလဲ ပိုမိုကောင်းမွန်လာစေမှာ ဖြစ်ပါတယ်။
ဟန်ချက်ညီအောင်ထိန်းနိုင်ခြင်းသည် အသက်အရွယ်ကြီးလာသောအခါနှင့် လှုပ်ရှားမှုမရှိခြင်းတို့နဲ့အတူ ကျဆင်းသွားတတ်သောကြောင့် ဟန်ချက်ညီအောင် လေ့ကျင့်ထားသင့်သည်။ အသက်ကြီးလာချိန်မှာ ဟန်ချက်မထိန်းနိုင်ဖြစ်ပြီး အလွယ်တကူ မလဲကျအောင်၊ အရိုးကျိုးတာတွေမဖြစ်အောင် တားဆီးရာမှာ အကျိုးပြုပါတယ်။
၁၁။ စက်ဘီးစီးခြင်းသည် အထူးတလည်လေ့ကျင့်စရာမလိုသော အားကစားနည်းဖြစ်သည်။
စက်ဘီးစီးခြင်းသည် သင့်ခန္ဓာကိုယ်အတွက် လုပ်ရလွယ်ကူပြီး အဆစ်များကို ဖိအားမပေးဘဲ ပြင်းထန်သောလေ့ကျင့်ခန်းကို လိုချင်သူများအတွက် အထူးတလည်လေ့ကျင့်နေစရာမလိုပဲ အလွယ်တကူ လုပ်နိုင်တဲ့ လေ့ကျင့်ခန်းတစ်မျိုးဖြစ်ပါတယ်။ စက်ဘီးစီးခြင်းသည် အဆစ်ပြဿနာများ သို့မဟုတ် ခန္ဓာကိုယ်အောက်ပိုင်း တောင့်တင်းနေတတ်သူများအတွက် အကောင်းဆုံး ရွေးချယ်မှုတစ်ခုဖြစ်ပါသည်။
၁၂။ စက်ဘီးစီးခြင်းက နှလုံးသွေးကြောဆိုင်ရာရောဂါ ဖြစ်နိုင်ခြေကို လျှော့ချပေးနိုင်ပါတယ်။
စက်ဘီးစီးခြင်းသည် သင့်နှလုံးခုန်နှုန်းကို မြှင့်တင်ရန်၊ နှလုံးသွေးကြောဆိုင်ရာ လုပ်ဆောင်ချက်များကို မြှင့်တင်ရန်နှင့် သင့်ရဲ့ကြံ့ခိုင်မှုအဆင့်ကို မြှင့်တင်ရန် ကောင်းသောနည်းလမ်းဖြစ်သည်။
2019 ခုနှစ် ဆန်းစစ်ချက်တစ်ခုရဲ့ ရလဒ်များအရ စက်ဘီးစီးခြင်းဟာ နှလုံးသွေးကြောဆိုင်ရာ ရောဂါဖြစ်နိုင်ချေ နည်းပါးခြင်းနှင့် ဆက်စပ်နေကြောင်း အကြံပြုထားသည်။ ၎င်းသည် ဆီးချိုရောဂါ၊ ကိုယ်လက်လှုပ်ရှားမှုမရှိခြင်းနှင့် သွေးတိုးခြင်းကဲ့သို့သော ဇီဝကမ္မဆိုင်ရာ အန္တရာယ်အချက်များ နည်းပါးသည့်နှုန်းနှင့် သေဆုံးမှုနှုန်း နည်းပါးခြင်းနဲ့လည်း ဆက်စပ်နေသည်။
စက်ဘီးစီးရာတွင် သတိထားရမယ့် အားနည်းချက်များနှင့် အန္တရာယ်ကင်းစေရန်
စက်ဘီးစီးခြင်းမှာ အားနည်းချက် အနည်းငယ်ရှိပါတယ်။ ဒီအားနည်းချက်တွေကတော့ အပြင်မှာစီးတဲ့သူတွေအတွက်ပါ။
- ဆိုးရွားတဲ့ အားနည်းချက်တစ်ခုကတော့ မြို့ပြတွင်ဖြစ်စေ ကျေးလက်ဒေသတွင်ဖြစ်စေ မတော်တဆမှု ဖြစ်နိုင်ခြေ ဖြစ်သည်။ အနောက်နိုင်ငံတစ်ခုမှာဆိုလျှင် 2014 ခုနှစ်တစ်ခုတည်းတွင် မတော်တဆ စက်ဘီးစီးသူ 726 ဦး သေဆုံးပြီး 50,000 ဒဏ်ရာရရှိခဲ့ကြောင်း သိရသည်။
- ဖြစ်နိုင်လျှင် စက်ဘီးစီးသူများအတွက် (သို့မဟုတ်) ရပ်ကွက်လမ်းများပေါ်တွင် လုပ်ပေးထားသော သီးသန့်လမ်းများတွင် စီးပါ။
- စက်ဘီးလမ်းများနှင့် မီတာ ၅၅၀ ခွာထားသော လမ်းများတွင် စက်ဘီးနှင့်ယာဉ် တိုက်မှု နည်းပါးကြောင်း သုတေသနအချို့က ပြသထားသည်။
- လမ်းစည်းကမ်းကို အမြဲလိုက်နာပါ။ လမ်းဆုံလမ်းခွများနှင့် လူရှုပ်သောနေရာများကို ဖြတ်သန်းရာတွင် ကိုယ့်ရဲ့လမ်း မှန်နေပေမယ့်လည်း သတိထားပါ။ အရည်အသွေးမီသော ဦးထုပ်တစ်လုံးနှင့် သင်လိုအပ်နိုင်သော အခြားအကာအကွယ်ပစ္စည်းများကို ဝယ်ယူအသုံးပြုပါ။
- သင့်စက်ဘီးချိန်းကြိုးများအတွင်း ဖမ်းမိသွားနိုင်သည့် ပွယောင်းချောင်ချိတဲ့ အဝတ်အစားတွေကို ဝတ်ဆင်ခြင်းမှ ရှောင်ကြဉ်ပါ။ ညအချိန် စက်ဘီးစီးခြင်း (သို့မဟုတ်) မနက်အစောကြီး စက်ဘီးစီးခြင်းအတွက် စက်ဘီးမီးရောင်နှင့် ရောင်ပြန်ကို အသုံးပြုပါ။
- အလုပ်ကို စက်ဘီးနဲ့သွားမည်ဆိုပါက ခရီးလမ်းဝေးသူဖြစ်လျှင် လဲဝတ်ရန် အ၀တ်အစားများ ထည့်ယူလာရန် စဉ်းစားပါ။
- နေ့ခင်းဘက်တွေမှာ အချိန်ကြာကြာ စီးမယ်ဆိုရင် အသားအရေကို ကာကွယ်ရန်အတွက် နေရောင်ကာခရင်မ်ကို အသုံးပြုပါ။ အထူးသဖြင့် ချွေးထွက်လျှင် ၂ နာရီခြားတိုင်း ပြန်လိမ်းပေးပါ။ ခရမ်းလွန်ရောင်ခြည် ကာကွယ်တဲ့ နေကာမျက်မှန်နဲ့ ဦးထုပ်ဆောင်းပါ။ ခရမ်းလွန်ရောင်ခြည် ကာကွယ်ရေး အဝတ်အစားများ ဝယ်ယူအသုံးပြုဖို့ စဉ်းစားပါ။
- မြို့ထဲမှာ စက်ဘီးစီးရင် လေထုညစ်ညမ်းမှုရှိနေတာ စိုးရိမ်စရာပါ။ လေကောင်းလေသန့်ရသောနေ့များတွင် စက်ဘီးစီးရန် သို့မဟုတ် လူသူနည်းပါးသော လမ်းများပေါ်တွင် စီးနင်းနိုင်သည်။
နေ့စဉ်နေ့တိုင်း စက်ဘီးစီးရင်ရော....
အထူးသဖြင့် သွားလာရေးအတွက် ဒါမှမဟုတ် ပြင်းပြင်းထန်ထန်မဟုတ်ပဲ အပျော်တမ်းအနေနဲ့ စက်ဘီးကို အသုံးပြုပါက နေ့စဉ် စက်ဘီးစီးတာက ဖြစ်နိုင်ပါတယ်။
နာကျင်ခြင်း၊ ပင်ပန်းနွမ်းနယ်ခြင်း သို့မဟုတ် ကြွက်သားများ နာကျင်ခြင်းတို့ ခံစားရပါက အနားယူပါ။
အကယ်၍ သင်ဟာ ကြံ့ခိုင်မှုအတွက် စက်ဘီးစီးနေသူဖြစ်ပါက၊ တစ်ပတ်လျှင် အနည်းဆုံး 1 ရက် အနားယူရန် လိုအပ်နိုင်သည် — အထူးသဖြင့် သင်စီးတဲ့ပုံစံဟာ အချိန်ကြာကြာစီးခြင်း သို့မဟုတ် ပြင်းပြင်းထန်ထန်စီးပါက၊ ဒဏ်ရာမရအောင် ကာကွယ်ရန်နဲ့ စွမ်းဆောင်ရည်ကို မြှင့်တင်ရန်အတွက် ပြန်လည်ကောင်းမွန်ရန် လိုအပ်တာကြောင့်ပါ။
ဘယ်သူတွေ စက်ဘီး မစီးသင့်ဘူးလဲ။
စက်ဘီးစီးခြင်းကြောင့် ထိခိုက်ဒဏ်ရာများရှိပါက အပြည့်အဝ ပြန်လည်ကောင်းမွန်လာသည်အထိ စက်ဘီးမစီးပဲနေခြင်းသည် အကောင်းဆုံးဖြစ်သည်။
စက်ဘီးစီးခြင်းကြောင့် ထိခိုက်စေတဲ့ အခြေအနေများရှိပါက သင့်ဆရာဝန်နှင့် ဆွေးနွေးပါ။ ဟန်ချက်ညီမှု၊ အမြင်အာရုံ သို့မဟုတ် အကြားအာရုံနှင့်ပတ်သက်တဲ့ ပြဿနာများရှိသူများဆိုလျှင် Indoor ဘီးစီးခြင်း၊ ကိုယ်နဲ့ လိုက်လျောညီထွေရှိမယ့် စက်ဘီးကိုရွေးချယ်နိုင်သည်။
စက်ဘီးမစီးချင်ဘူး ဒါပေမဲ့ သင့်ခန္ဓာကိုယ်ကို အလားတူ cardio လေ့ကျင့်ခန်းမျိုးကို ပေးလိုပါက လှေလှော်ခြင်း၊ လှေကားထစ်တက်ခြင်း၊ တောင်ကုန်းတွေပေါ် ပြေးတာ၊ ရေကူးတာ၊ လမ်းလျှောက်တာတွေလည်း လုပ်နိုင်ပါတယ်။
အဓိကအချက်ကတော့
စက်ဘီးစီးခြင်းဟာ ကျန်းမာစွာ နေထိုင်ရန်နှင့် သင့်ပတ်ဝန်းကျင်ကမ္ဘာနှင့် ထိတွေ့နိုင်ရန် ပျော်ရွှင်ဖွယ် နည်းလမ်းတစ်ခုဖြစ်သည်။
ရာသီဥတု အဆင်ပြေရင် စက်ဘီးပေါ်တက်ပြီး ခပ်ဝေးဝေးကို စီးသွားပါ။ စက်ဘီးစီးခြင်းသည် သင့်နေရာဒေသကို စူးစမ်းရန် ကောင်းသောနည်းလမ်းတစ်ခုဖြစ်သည်။ ထပ်ခါတလဲလဲ ရိုးအီနေတဲ့ လေ့ကျင့်ခန်းတွေကနေ ဖြစ်ပေါ်လာနိုင်တဲ့ ငြီးငွေ့မှု ခံစားချက်ကို ကျော်လွန်သွားစေပါတယ်။
ရာသီဥတုကြောင့် အပြင်မှာ စက်ဘီးစီးဖို့ အဆင်မပြေတဲ့အခါ၊ Indoor စက်ဘီးစီးတာက အန္တရာယ်နည်းပါးပြီး ကျန်းမာရေး အကျိုးကျေးဇူးများစွာကို ပေးစွမ်းနိုင်တဲ့ အကောင်းဆုံး ရွေးချယ်မှုတစ်ခုဖြစ်ပါတယ်။
Photo credit : Internet
