05/06/2023
Age 18နှစ်ထဲက Sale & Marketing လောကထဲကိုခြေချလာတာ အခုထိရုန်းထွက်လို့မရသေးဘူး ။ ကိုယ့်ရဲ့အသက်မွေးဝမ်းကြောင်းအလုပ်ပဲ📟💵💵
စျေးရောင်းတာက စီးပွားရေးရဲ့အခြေခံပဲ
◾
ငယ်ငယ်က ရွာထဲမှာ စျေးပတ်ရောင်းခဲ့ရဖူးတယ်။ အိမ်က ပဲတောင့်ရှည်တို့၊ မုန်လာရွက်တို့လို ရာသီပေါ်ဟင်းသီးဟင်းရွက်တွေ စိုက်တော့ စားဖို့အပြင် ပိုလျှံတာလေးတွေ မိသားစုအပိုဝင်ငွေရအောင် ရောင်းတာ။ မှတ်မိသလောက် အဲဒီတုန်းက စျေးရောင်းခိုင်းရင် ကျွန်တော် လှည့်ပတ်ပြေးနေတာ။ ကိုယ်က ရှက်စိတ်၊ ကြောက်စိတ်ကြီးတော့ စျေးလိုက်ရောင်းတဲ့အလုပ်ကို မလုပ်ချင်ဘူး။ အော်ရောင်းရင် အသံကမထွက်၊ လည်ချောင်းမှာတင် တစ်နေတာ။
ဒါပေမဲ့ စျေးရောင်းရလို့ပျော်တဲ့အချိန်တစ်ချိန်တော့ရှိခဲ့တယ်။ ရောင်းလို့ကုန်သွားတဲ့အချိန်ပဲ။ စျေးရောင်းရတာသာရှက်တာ၊ မရောင်းရရင်လည်း စိတ်ကမကြည်ပြန်ဘူး။ ပြီးတော့ စျေးရောင်းရတဲ့အခါ မုန့်ဖိုးပိုရတော့လည်း ပျော်သားဗျ။ (နည်းနည်းပါးပါးစျေးရောင်းဖူးတဲ့ ငယ်ငယ်ကအတွေ့အကြုံလေးပါ။)
အခုနောက်ပိုင်း ကိုယ့်စီးပွားရေးကိုယ်လုပ်တော့မှ ကိုယ့်ကို စျေးရောင်းခိုင်းခဲ့တဲ့ မိဘတွေကို သိပ်ကျေးဇူးတင်တာ။ သူတို့က ကိုယ့်ကို ငယ်ငယ်ကတည်းက စီးပွားရေးပညာသင်ပေးခဲ့တာလို့ပြောလို့ရတယ်။ (ကိုယ်ကသာ သေသေချာချာ မယူတတ်ခဲ့တာ။ စျေးရောင်းတာက ကောင်းရောင်းကောင်းဝယ်ဆိုရင် ရှက်စရာမှမဟုတ်တာ)
စျေးရောင်းတာ (Sales) က စီးပွားရေး(Business) ရဲ့အခြေခံပဲဗျ။ ဘယ်စီးပွားရေးလုပ်လုပ် ခင်ဗျား တစ်ခုမဟုတ်တစ်ခုတော့ ရောင်းနေရတာပဲ။ Product ရောင်းမှာလား၊ Service ရောင်းမှာလား၊ B2C (Business to Consumer) လား၊ B2B (Business to Business) လား ဒါတွေပဲ ကွာတာ။ အနည်းဆုံးဗျာ ဝန်ထမ်းလုပ်ရင်တောင် ကိုယ့်ရဲ့ Skill ကိုတော့ ရောင်းရတာပဲ။
နောက်တစ်ခုက ငယ်ငယ်ကတည်းက အရောင်းအဝယ်အလုပ်လုပ်တာက ငွေရှာချင်တဲ့ဆန္ဒရှိဖို့၊ ငွေရှာတဲ့နည်းလမ်းကိုပိုမြင်တတ်ဖို့အပြင် ငွေကိုတန်ဖိုးထားတတ်အောင်လည်း လေ့ကျင့်ပေးရာရောက်ပါတယ်။ အောင်မြင်နေတဲ့လုပ်ငန်းရှင်တွေရဲ့ Story တွေကိုကြည့်ရင်လည်း ငယ်ငယ်ကတည်းက ကိုယ်တိုင်စျေးရောင်းရင်ရောင်း၊ ဒါမှမဟုတ် မိဘတွေရဲ့စျေးဆိုင်မှာ ကူရောင်းပေးခဲ့သူတွေများပါတယ်။
စျေးရောင်းတာက စီးပွားရေးလုပ်ခြင်းရဲ့ အခြေခံပဲ။ စျေးရောင်းသူတိုင်း မချမ်းသာပေမဲ့ ချမ်းသာသူတိုင်းကတော့ စျေးရောင်းသူတွေချည်းပဲ။
#စျေးရောင်းခြင်း
