29/12/2025
Ka Yi Ƙoƙarin Zama Mutumin Kirki Ko da a Wajen Maƙiyi
Manzon Allah tsira da aminci su tabbata a gare shi ya koya mana manyan darussa da halaye masu kyau. Ko a cikin maƙiyansa waɗanda ba su karɓi addinin da ya zo da shi ba, suna yaba masa saboda gaskiya, riƙon amana da kyawawan ɗabi'unsa. Wannan yana nuna cewa mutumin kirki yana da daraja da samun yabo, ko daga wajen wanda bai yarda da shi ba, saboda halaye da ɗabi'un kirki.
Abu ne mai kyau ace duk wani Musulmi yana ƙoƙarin ya kasance mutum mai gaskiya da adalci a duk lokacin da mu'amala ta haɗa shi da wani, ya kasance mai amana da tsoron Allah a aikace, ba kawai a magana ko a rubutu ba. Ya zama mai kyautatawa duk wanda yake mu'amala da shi, ko masoyi ne ko maƙiyi.
A matsayinka na Musulmi, ko maƙiyinka zai iya yaba maka saboda halayenka, ba zai zage ka saboda wani mummunan hali da kake da shi ba, sai dai ya zage ka saboda ƙiyayya kawai, ba saboda ka masa wani laifi ba. Wannan hali ya kamata duk wani Musulmi ya ɗauka a matsayin darasi daga halayen Annabi tsira da amincin Allah su tabbata a gare shi. Ka kasance wanda yake tabbatar da cewa halaye nagari da riƙo da gaskiya sun fi ƙiyayya ko zazzafar gaba saboda bambancin fahimta daraja.