10/10/2024
Ikinatuwa ni Sen. Idol Raffy Tulfo ang agarang aksyon ng PhilHealth sa kanyang rekomendasyon na isama ang basic dental care sa PhilHealth coverage, partikular na ang oral check-up at ang pagpapalinis ng ngipin o oral prophylaxis.
Ayon sa PhilHealth, ire-release na ang dental package sa darating na Disyembre 2024 kung saan mapapakinabangan na ito ng ating mga kababayan.
Matatandaan sa hearing ng Senate Committee on Health noong July 30 ay iminungkahi ni Sen. Idol kay PhilHealth President and CEO Emmanuel Ledesma Jr. na ilibre na dapat ang basic dental care sa lahat ng mga miyembro nila — lalong-lalo na sa mga senior citizens, PWDs at minimum wage earners.
Agad naman siyang sinang-ayunan ni Ledesma at nangakong ipatutupad ang rekomendasyon ni Idol Raffy bago matapos ang taong 2024.
Sa pagpapatuloy ng nasabing pagdinig noong Sept. 10 ay muling siningil ni Sen. Tulfo si Ledesma, maging si PhilHealth Chief Operating Officer Atty. Eli Dino Santos, kung kailan maisasakatuparan ng ahensya ang mungkahi niya ukol sa libreng dental care. Dito ay ginarantiya ni Santos kay Idol na makakapag-comply sila sa direktiba ngayong taon na ito.
At bilang pagsunod nga sa ipinangako nila kay Idol, inanunsyo ng PhilHealth noong Oct. 2 sa publiko na sagot na nila ang libreng linis ng ngipin at dental checkup ng kanilang members.
Ilan lamang ito sa mga ipinangako ng PhilHealth kay Sen. Tulfo. Patuloy na kakalampagin ng Opisina ni Idol ang PhilHealth upang isakatuparan ang pagbibigay ng mas marami pang benepisyo para sa lahat ng mga miyembro ng ahensya.
