19/05/2026
(Please follow Sports Ta Bai and share)
CEBU NORTH HIGHLANDERS
MIDOMINAR SA CPBL 16-U;
11-0 SA TIBUOK KOMPETISYON
CEBU, Philippines - Saktong dominasyon maoy gipakita sa Cebu North Highlanders sa dihang ilang gipukan ang Cebu Stars, 49-41, aron langkaton ang kampiyonato sa ika-9 nga edition sa Cebu Professional Basketball League (CPBL) nga gipahigayon niadtong Mayo 3 sa Aulga Gym, dakbayan sa Talisay.
Tam-is ug makasaysayon nga kalampusan maoy naangkon sa North Highlanders sanglit ilang giharos sa pagpukan ang tanan nilang kaatbang sa torneyo nga mokabat ngadto sa 11 nga panagsangka lakip na niini ang championship match batok sa Cebu Stars.
Taliwala ning talagsaon nga nakab-ot sa mga batos ni coach Elmer Gumila, ang nag-unang pambato sa team nga si Kent Toyco maoy napiling most valuable player sa kompetisyon.
Gawas kang Toyco, milangkob usab sa team sila si Josh Braulio, Hervies John Ma, Arc Araw-araw, Al Robert Uy, Karlo Montesa, Bryle Bono, Casey Kiseo, Mark Regis.
Anaa usab sila si Arnold Jose Olandria, Carlos John Garcia, Sheik Bardoquillio, Jian Mike Tapdasan, Ryle Alexis Arong ug Jamar Miguel Armidilla.
Nadasig sa kalampusan sa ilang kampanya, ang Cebu North Highlanders mopadayon sa gihapon sa ilang pagsalmot og mga lega sa tinguha nga madugangan pa ang exposure sa mga bata nga sa samang higayon makapahanas sa ilang tagsatagsa ka abilidad. STB